PRESS RELEASE
NO.30/2026
SIAHA, 1 Pachawh, 2026 (Pakhynoh): Atamy dawh 11:00 AM khata Executive Secretary, MADC Chhôhpadâh, Siaha liata Puhpa K. Vanlalliana, Executive Secretary, MADC ta Satlia K. Vâbeihmôsa ta châbu a ropa “Krista châta riahphapazy râhpathopa râh tlyna” tahpa a palâhâh.
Châbu palâhâhna programme he Puhpa Laicho Nôtlia ta chhihtha ta, Rev. M. Beichi ta Abeipa lâta pavaosana thlahchhâna a hnei.
Puhpa K. Vanlalliana, ES, MADC chata, “Châbu ro he hmo rainaopa châ leipa ta, hmo rairu kawpa châ ta, châthaipa momaih heta châbu he roh thei leipa ei ta, roh thai viapa achhuahna sianôpa hnei ta, pahâhna hneina chôta, tiama kaw’pa a byuh,” a tah.
“Châbu roh thei awpa heta Literature liata eima pahâh tua’pazy he za peimawh ta, eima literature he hmahsie via lymâ ta, â tielaw ngâ kaw ta, cha hawhpa patu theipa maih cha literature thaipa, rozie thaipa ama châ.”
“Châ âdo kawpa ta ropa ta sopa he literature cha a châ tahpa ta eima nôpawzy ta miah ama chho tyh. Ropa ta pasopa hra hro he sôh ta a pha chai hra. Pakah ta reipa he châ anano ngâthlâh thei ta, âdo leipa haipa bie chhao â hlao thei. Âdo kawpa ta roh ta châbu ta papuapa nata sopa he a pha chai.”
“Ropa nairu lia hmahta âdopa ta ropa he sôh pahchai heih ta, Father of Mara Literature Rev. RA. Lorrain ta Mara Alphabet nata Grammar miah taopa ta, atahmâ cha a Grammar bu taopa he moh sih la, pahnothai a ru kaw. A chhâpa cha literature he â thla ngâthlâhpa nata hmahsie via lymâpa a châpa vâta a châ.”
“Eima chhâ chyu liata literature vaw puapa he eima thai’pa a byuh. A rozie he uasa ta pachâ peimawh ta thai eimâ chhuah lymâ awpa byuh ta, eimâ chu lymâ awpa a byuh. Achu leipa ta la, thai thai’pa châ vei.”
“Mara reih he kô 30 tlai ei vaw chu ha bâ. Nama hoh hr’aw tly ma? Literature he palôhzy pie khaipa ta angiahnao ta, palôh hmeiseih ta, thai achhuahna hmeiseih hneipa ta achu awpa a byuh.”
“Rev. RA. Lorrain ta Biehrai a vaw paliepazy kha atahmâ cha, a rei a ru kaw bâ. Biehrai thiehpazy vaw pua laih ta, a rei chhao a za nao via laihpa a vaw châ.”
“Literature zy hmahsie lymâ ta â vaw nano lymâpa lia heta thai lymâ achhuah ta, patu lymâ hra awpa he eimâ chhuah lymâ awpa byuh ta, thai eimâ chhuah lymâ hra awpa chhao a châ.”
“Châbu rohtuhpa he Missionaryzy thâtih vaw roh ta a pha hmeiseih. Thlahmih leidiapazy pachha papuana raihriatuhpazy he hmo pha chaipa a vaw châ,” tahpa ta ES ta pasyunabie pha kawpa a reih.
Satlia K. Vâbeihmôsa heta châbu he Mara reih ta bu charu a vaw papua haw.
Satlia K. Vâbeihmôsa, Author chhaota biereina hnei hra ta, Mara reih ta châbu hnei hluh ta, papua hluh a peimawhzie reih ta, chi hro pho hrozy châ ama reih ta châbu hnei hluh kaw sai ei ta, Library liazy a hluhpi paso awpa nata reih thei awpa hnei ei ta, keimo Mara sawzy pi chhao eima reih Mara reih ta châbu roh hluh ta, Library liazy chhao paso awpa hnei hluh a peimawhzie reih ta, pasyunabie pha kawpa, a reih.
Programme he Abeipa Thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
