PRESS RELEASE
NO.77/2026
SIAHA, 17 Thlarâh, 2026 (Pobienoh): Atanoh zâlâ dawh 1:00 PM khata Puhpa M. Laikaw, CEM, MADC nata a hrialâhpazy ta Rev. L. Mark (Late) Pathliena Programme, Mission Compound, Lorrainville, Saikao liata amâ hmâkhei.
Rev. L. Mark (Late) kô 97 h/o Revd. VLA Mark Lapi (Late) he zâhnia târi 16.09.2026 pa ta a pahâ ta, atanoh târi 17.09.2026 pa ta Pathliena Programme he Mission Compound, Lorrainville, Saikao liata ahmâhpa a châ.
Pathliena programme he Rev. Khabi Chozah, ES (Mission), ECM HQ, Saikao ta chhihtha ta, Rev. Stephen Beihrosia Chozah, Saikao Pastor Biatuhpa ta thlahchhâna a hnei.
Rev. K. Laichhua Azyu, Sr. Executive Secretary, ECM Assembly Office, Siaha ta bietana hnei ta, Rev. AZ. Beirakaw, ES (SM&D), ECM HQ, Saikao ta athihpa thâtih reina a hnei.
Puhpa M. Laikaw, CEM, MADC chata, “Atanoh Rev. L. Mark (Late) Pathliena programme liata bie reih thei hra awpa ta programme liata pahlaopa ei châpa he ei ly hmeiseih?” a tah.
“Rev. L. Mark (Late) he MTP founder hry liata pakha châ hra ta, sapa nata thlahpa liata Marapa sawzy hry liata hmâtlâh châ kawpa a châ.”
“Khazohpa ta Mongyuh râh tawhta Missionary miah kaw tuapa ta, Missionary zy vâta he duasu liata aduahpa eima châ. Marapa sawzy pi he eima vâhnei hmeiseih.”
“Mongyuh râh tawhta Missionary zy kha September thlâpa liata kaw tlô ei ta, Rev. L. Mark (Late) chhao he September thlâpâ liata miah â pahâsai. Khazohpa ryhrao dâh he noâh â chhih kaw.”
“Eima Missionary vâta MADC hnei theipa châ pi ta, eima Missionary zy vâta Awnanopa chhao a vaw duah ta, atahmâ âmo y khao vei hra ei sala, khizaw y chhôhta la, eima Missionary zy he my thei lei p’aw pi ta, Mararâh tha ama pasanazie nata kyh miah ama pachanâzie he my beih aw ma pi.”
“Eima Missionary zy hawhta Khazohpa chi ta, Khazohpa kho dâh hawhta hro hmâh he Mara zawpizy ta eima papeimawhsa chai awpa he a peimawh ngaita kaw.”
“Rev. L. Mark (Late) nata eimâ hmô hnôh chai nota, “Khâpa ma na peimawh chai na chho tua la” tah na ta, “Atahmâ nota ei peimawh chaipa cha chyhsa ta eina vaw tly nota ama iepazô sâ n’awpa a y leipa hena pei ei tah chai e, he he y thei sala na ei khoh chai e” na tah ta, taopa na ta, â ly ngâsâ,” tahpa ta CEM ta pathliena bie a reih.
Puhpa S. Vabeihasa, President, MTP Gen. HQ, Rev. NC. Vabeilua, Chairman, EPPF nata Rev. Dr. L.B. Siama, Moderator of Mara Evangelical Church (MEC) zy ta biereina ama hnei hra.
ECM Assembly choir zy ta pathliena hla ama paryh.
Rev. Jimmy F. Sachai, Moderator, ECM Assembly ta pabuna daihti a hmâh.
ISSUED BY:
Information & Publicity Department
Mara Autonomous District Council
Siaha.
