PRESS RELEASE
NO.74/2026
TIPA, 03 Thlarâh, 2026 (Pobienoh): Atanoh dawh 11:30 AM pa ta MTP Hall, Centenary Square Tipa liata Mara Students’ Organisation Sub-Headquarters, Tipa pachhuahpanohpa Teachers’ Day ei 65th-na celebration programme ahmâhpa châ ta, Puhpa S. Lalremthanga, Dy. CEM, MADC chata Khichhai Laipa (Chief Guest) châpa ta â hmâkhei ei.
Celebration Programme he KT. Benry, President, MSO Sub-HQ, Tipa ta chhihtha ta, Rev. Enawsa Siakhai, ECM Tipa Biatuhpa ta Abeipa lâta pavaosana devotion daihti â hmâh.
Puhpa S. Lalremthanga, Dy. CEM chata, “A hmiatua ta ‘PACHUTUHPAZY NOH’ ei 65th-na celebration programme ahmâna liata Khichhai Laipa châ awpa ta hruapa ei châ vâta nama zydua chô lâ liata alynabie ei reih hmeiseih,” a tah.
“Teachers’ Day he pachutuhpazy noh a châna chhâpa he reichanei ngâ kaw awpa he â phuh hmeiseihpa ta ei pahno. India Vice President hmiatua chaipa Dr. Sarvepalli Radhakrishnan pihna noh Târi 5th Thlarâh,1962 tawhta he Teachers’ Day he ahmâh pathaopa a vaw châ. Sarvepalli Radhakrishnan he Indian politician, philosopher nata châ athai kawpa a châpa vâta atanoh taihta ano zana palâsana châta 5th Thlarâh noh he Pachutuhpazy Noh tahpa ta a rônah kawpa ta eimâ vaw hmâh tyhpa a vaw châ.”
“Atakô 5th Thlarâh noh deikua (Saturday/Pachynoh) a châ hapa vâta Sawhkhâ ta târi 3rd Thlarâh, 2026 (Pobienoh) liata Pachutuhpazy Noh he ahmâh chyu awpa ta maniah a vaw pahnosapa hawhta, he noh lia heta thapawh kawpa nata a rônah kawpa ta Pachutupazy zana palâsana chôta eima palyupalih chyu awpa a peimawh hmeiseih.”
“American bieso sâkha ta la, ‘If you can read this, thank a teacher,’ a tah. Cha yzie cha “He châ he na reih thai khiahta la, Pachutuhpa hnohta alynabie hlâ mah y” tahpa a châ. A bie chyu sia kaw hra sala, â phuh ta, yzie a hnei ngaita kaw. He bieso tawh heta châ chu a peimawzie nata châthai awpa a phahnaizie â lâpasia ngaita kaw.”
“Achuna he hmah pasiesa via lymâ awpa ta atahmâ ta 12th Term MADC chhaota thapiphia hmeiseih ta, cha hawh pyly chata Pachutuhpazy chhaota tiama eima papua via lymâ awpa he a peimawh hmeiseih. Achuna O tawh heta thaina sona dei châ leipa ta, hrozie nôchâ phapa taihta achu papua theina Opi a châpa vâta Pachutupazy eima maophaohna âsâh ngaita kaw tahpa he a thiehpa ta nama pahno heih awpa ta ei cha pasyu khoh ngaita kaw ei. Pachutuhpa he kao totie liata mopâtlâh châ awpa he achhuah chyu sih la, cha chata hmahsiena hluhpi eima tlôkhei cheingei nahta ei hnabeiseih.”
“Achuna O he chyhsa hmâtlâhpa, niebawtluana khi châ thaina,sona nata novâhna hmeiseih âchupapuana Opi châ ta, cha hawh pyly chata Achuhaipazy chhao eima Chipho nata Khitlâh châta byhnâ châ eimâ chhuah chyu thei n’awpa ta a thiehpa ta tiama eima papua via lymâ heih awpa he a peimawh ngaita kaw.”
“Pachutuhpazy Noh ei 65th-na liana heta Pachutupazy he eima Chipo hmahpasiesa theituhpa, hmahsiena lâpi maniah chhihtuhpa nama châ tahpa he nama my pathlei aw tahpa he ei vaw chi ngaita kaw. Mararâh Education hmah pasiesa ta, quality education sapapua awpa ta Mara zawpi zydua cha hrua ei na ta, eima zydua ta palôh miakha phaohpa ta Mararâh Education hmahpasiesa achhuah chyu awpa ta a thiehpa ta keih chakâ khoh chyu awpa ta ei cha hrua chanei ei”
“Pachutuhpazy ta paritheipa taona chôta siku hawti châ nama pachu awpa châ vei. Pachutuhpa cha paritheipa a tao awpa châ vei. Paritheipa ataopa nama y pathlei khiahta la, nama pathleih para awpa a châ. Paritheipa tao ta, pathleih khoh leipa nama y khiahta la nata paritheipa taona chôta siku hawti châ pachupa nama y khiahta la action eima la lymâ aw,” tahpa ta Khichhai Laipa ta pasyuna bie pha kawpa a reih.
Puhpa HC. Lalropuia, DAO, MADC Sub-HQ, Tipa cha Guest of Honour châpa ta pasyuna bie pha kawpa a reih hra.
New Light School, Tipa ta Opening Song angia kawpa ta ama paryh. Mesak B. Vanlaldawta, Secretary i/c Lit. & Culture ta welcome speech reina a hnei.
S. Byhnadaosa, Gen. Secretary ta report piena hnei ta, Ls. Chhiezi Khaimeichhô, Executive Member, MSO Sub-HQ, Tipa ta Dr. Sarvepalli Radhakrishnan thâtih reina a hnei.
TT & SA zy ta ama hrialâhpa pachutuhpa Puhpa K Lalnuntluanga, Headmaster, Govt Middle School, Tipa Dairy cha pathliena hnei ei ta, ryuchâ (citation) ama hlâ pâ hra.
Robi Bôhia, Asst. Gen. Secy., MSO Sub-HQ, Tipa ta pachutuhpazy palyuhpalihna pawpi pa-aosana daihti â hmâh.
Laihsa Priscilla Nôtlia nata Felina, Tipa P/S – 11 zy ta pahnie kawpa ta hlasapa ta zawpi ama palôhpahawh.
Puhpa S. Lalremthanga, Dy. CEM he Official lâ tawhta Puhpa Albert Hlychho, Sr. EO (P/S), MADC, Puhpa Pawsa Lava, Asst. I&PO, MADC, Puhpa K. Nehemia, I&PD, MADC nata Puhpa Pakhai Hlychho, Edu, Department (P/S), MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
