PRESS RELEASE
NO.82/2026
SIAHA, 29 Thlarâh, 2026 (Hriaheihnoh): Atanoh dawh 10:30 AM pa ta SDFA Ground Meisatlâh, Siaha liata Siaha District Secondary School Sport 2026 Opening Programme pachhuahpanohpa châ ta, Puhpa Tiahlei Syuhlo, EM i/c Environment, Forest & Climate Change Department, etc. MADC chata Khichhai Laipa châpa ta â hmâkhei ei.
Programme he Puhpa J. Chhitha, Organizing Chairman ta chhihtha ta, Puhpa TT. Khulua, Organizing Secretary ta report piena a hnei.
Puhpa Tiahlei Syuhlo, EM, MADC chata, “Atanoh ta achuhaipazy ei chi he mylâ hânoh ta eima râh chhihthatuhpazy vaw châ awpa châ ei chi ta, atahmâ no he khotlyna nama hnei daihti châ ta, khotlyna dopa, phapa namâ tlyh thai khiahta la, chyhsa hmâtlâh châ kawpa nama kaw châ aw,” a tah.
“Hro avao pahnie ta, hro a control thei kaw awpa he a peimawh ngaita kaw. Khotlyna do leipa namâ tlyh pathlei khiahta la nata, nama hro nama control thei leipa a châ khiahta la, nama hro rao aw ta, nama career a rao khai haw ta, ochhôh nata khitlâh patypamâtuhpa deita nama châ aw.”
“Khazohpa lâta thlahchhâ hluh ta khotlyna dopa namâ tlyh awpa he peimawh kaw ta, atahmâ he khotlyna dopa namâ tlyh daihti cha a châ.”
“Eima yna su liata reih ama cheipa he thai lymâ a pha. Su hro râh hro lâ y hra sih la, ama reih eima thai lymâpa a châ khiahta la, hmahsiena eima hnei lymâ aw. Eima reih hmâpa he âzapa raihrie thai kaw awpa he a peimawh ngaita kaw.”
“Chyhsa thaisopazy ta cha, Man is social animal ama tahpa hawhta viasa pha kawpa hnei ta, chyhsa sia kawpazy deita apakyh awpa he peimawh kaw ta, cha hawhta a châ nota, reikah hmâhna kyh lia heta eimâ sohsi kaw awpa a byuh. Reih hropa mohnao leipa ta palôh kawh kawpa phaoh ta chi hro pho hropazy apakyh dâh thai kaw awpa he a peimawh ngaita kaw.”
“Châ a kaw chu lymâ awpa châ ei chi ta, State hro lâ, Râh hro lâzy chhao achu lymâ awpa nama châpa vâta viasa apakyh dâhzy nama thai kaw awpa a byuh. Reih hropazy thai lymâ namâ chhuah awpa a châ.”
“Sports heta hro taopathi ta, exercise la pha kawpa ta hnatlâna phapa sa papua ta, Sports he papeimawhsa kaw awpa a châ. Sports Competition liata sâkhana la ta, atlô chaipa châ ngâlâh he châ leipa ta, Sports Spirit pahno thai ta, Sports peimawhzie he eima pahno thai kaw awpa a byuh.”
“He Sport Meet heta viasa phapa vaw tlôkhei sala, theilâ phapa a vaw tlôkhei cheingei nata ei pangiasa,” tahpa ta Khichhai Laipa ta pasyunabie pha kawpa reina a hnei.
DLDDRC (District Level Drug Demand Reduction Committee) tawhta Puhpa Ng. Lalbiaknunga, IDC, DSWO ta pasyunabie pha kawpa reina a hnei hra.
DLSA (District Legal Service Authority) lâ tawhta pasyunabie pha kawpa reina hnei hra ei ta, District Tobacco Control Society lâ tawh chhaota meipazy pha leizie reina ama hnei hra.
Mosia Vanlalhriata, Secretary Technical Board ta School Team Leaders nata participants zydua hnohta Oath Taking a pahneisa ei.
Angelina Vanlalchhanhimi, CI-X GHS ta pahnie kawpa ta hlasapa ta zawpi a palôhpahawh.
School 16 ta ataopasuana he ama hnei.
Puhpa Tiahlei Syuhlo, EM, MADC he Official lâ tawhta Puhpa Vabeikhaihmo Solo, Conservator of Forests, MADC, Puhpa Pawsa Lava, Asst. I&PO, MADC, Puhpa K. Nehemia, I&PD, MADC nata Puhpa N. Zachhua, Forest Dept., MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
