PRESS RELEASE
NO.122/2025
SIAHA, 27 Phiata, 2025 (Hriatuanoh): Atanoh my dawh 11:00 AM khata Forest Hall, MADC, Siaha liata Revd. NC. Vabeilua châbu ropa sâno palâhâhpa châ ta, Puhpa C. Chehnei, Deputy Chairman, MADC ta “Zamie châbu achu pakawhna” palâhâh ta, Puhpa Tiahlei Syuhlo, EM i/c Forest, MADC ta “Missionary riahphapa Evan Z. Mathia thâtih” a palâhâh.
Châbu palâhâhna programme he Puhpa K. Beingiachhie, Secretary, BML, MADC ta chhihtha ta, Rev. VBH. Sathei Thlyutha, MTC ta Abeipa lâta pavaosana thlahchhâna daihti â hmâh.
Revd. NC. Vabeilua ta châbu saichhieliena hnei ta, Laihsa Priscilla Nôtlia ta pahnie kawpa ta hlasapa ta zawpi a palôhpahawh.
Puhpa Tiahlei Syuhlo, EM chata, “Mararâh Awnanopa heta missionary hluhpi tua tyh pi ta, anodeikua Evan. Z. Mathia hawhta chyhsa riahphapa Missionary pahno’pa ama chyh kaw. Pension taihta missionary raihriapa ama hluh kaw tarawpa ta, Evan Z. Mathia hawhta kô 6 chhôh ngâlâh chaokaona daihti hmâh ta, vâduachhih kawpa ta a chakaona su liata thi ta, a chakaona su liata pabupa a châ,” tahpa ta a reih.
“Châbu roh awpa heta daihti pahryuh kaw ta, Revd. NC. Vabeilua heta châbu bu 13 tlai a vaw roh haw. Reithai tlâh a châ hmeiseih. Reih he eima identity châ ta, Northeast lia heta hmi âlyupa hluh kaw pi ta, eima reih deikua â lyu tlâ vei, eima chi nata pho palaiseihsa n’awpa he ta reih eima hneipa he ropa ta châbu ta eima hnei hluh awpa he a peimawh ngaita kaw,” a tah.
Puhpa C. Chehnei, Deputy Chairman chata, “Eima sapa nata thlahpa châta hmahsiena a châ thei n’awpa châbu palâhâh theipa a vaw châpa he ei ly ngaita kaw. Eima Local Church KTP zy ta Evan. Z. Mathia thlâ tly awpa ama tah nota, kei chhao keima phusâ tlai ta ama hnohta sie hra na ta, KTP nahzy ta Evan. Z. Mathia thlâ liata bie ama ropa ‘Mâty thisaih a saipa ta loh vei’ tahpa bie kha a rônah ei tah hmeiseih,” a tah.
Deputy Chairman chata, “Revd. NC. Vabeilua ta a châbu ropa palâhâh awpa ta hruapa ei châpa he ei ly hmeiseih. Zamie châbu ta a reina liata cha, hmotaopa y leina liata ngiapâna cha ngiapâna thipa a châzie reih ta, chavâta, eimâ ngiapâna he eima hro liata eima palâsa awpa a peimawh ngaita kaw. Angiapâ mâh leipazy ta miah ama hmô tita, eima hro liata nata raihriana liata angiapâtuhpa eima châzie ama hmô awpa palâsa awpa he a peimawh ngaita kaw,” a tah.
Revd. P. Riabi chhaota biereina hnei hra ta, Evan. Z. Mathia thâtih tlâhpipa nata a chakaona mopâtlâh a châziezy a reih. Evan. Z. Mathia uhtapa Beikhochhua Paw chhaota biereina a hnei hra.
Revd. NC. Vabeilua ta alynabie reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
