PRESS RELEASE
NO.123/2025
SIAHA, 27 Phiata, 2025 (Hriatuanoh): Atanoh zâlâ dawh 1:00 PM khata MADC Golden Jubilee Hall, Siaha liata Puhpa Beirahmo Syhly, EM i/c Road Transport, MADC ta Siaha Town chhôh liata Vehicle Night Parking Permit Road Transport Department, MADC ry liata hneipazy meeting a hneikhei ei.
Meeting he Puhpa B. Sawma, MVI, MADC ta chhihtha ta, Puhpa Kaisanga Chozah, LDC, MADC ta Parking rules and regulations chhopasiana a hnei.
Puhpa Beirahmo Syhly, EM chata, “Tahmâ cha o to ta motor avaopa hawh châ bâ pi ta, eima lâpizy he pakawh baichhina awpa y khao leipa ta, Hmahla n’awpa dâh pachâkhoh awpa ta meeting he awpa a châ. Keimo RT Department, MADC chhochhi ta la eima khohdâh ta la Road-side parking he y khao leipa sala tahpa he eima khoh. Anodeikua la, he he hmo theipa châ khao leipa ta, a chhâpa châ o a sa tuapazy khata garage zy tao leipa ei ta, chahleikhôta, o tlôh ta Siaha liata pahrâpazy châta garage hneipa kha za ru ha bâ ta, garage hnei leipazy châta cha Lâkia liata park leipa ta cha tao n’awpa y thai khao leipa ta. Chavâta permit he a piepapuapa châ pi ta, chata a châ nona chata, a hluh via heta fee pie pha leipa ei chi ta. DTO zy, Traffic zy nahta thatlô kawpa ta hmahlana eima hnei khiahta la, vehicle permit taihta a hluh viapa he cancel awpa byuh aw ta, chazy eimâ tyh lei n’awpa ta atanoh ta meeting he awareness pa hawhta awpa eima châ ,” a tah.
EM chata, “Roadside o kathi nata o kachha ta Motor eima vaw park ha nahta cha lâpi (road) he buah kaw bâ ta, phei ta siepazy châta chi â chhih kaw bâ, chyhsa hronapa he sôh kaw tlôh ta. Chahleikhôta, keimo lâ tawh chhaota o kathi nata o kachha parking permit eima vaw pie hapa a châ khiahta la, eima taochheipa châ ta, chavâta O kathi nata O kachha he cha atahmâ tawhta permit pie pakaoh leipa châ bâ sala, tahpa he eima khohdâh a châ,” a tah.
EM chata, â theipa a châ khiahta la, Motor ahneipa maih ta, garage hnei chyu awpa ta atanoh meeting a vaw hlaopazy hnohta bie a ta, chyu ei.
Atanoh meeting hneina liata Night Parking fee nata Vehicle Night parking slot kyh reihpahmaohpa châ ta. Meeting agenda zy he executive meeting liata reih pathi awpa ta biepathlupa a châ.
Siaha liata Vehicle Night Parking Permit a hneipa he 329 ama y hai.
Puhpa Joel B. Nôtlia, ESI, RT Department, MADC ta vote of thanks reina a hnei khai tawhta meeting pachhâsapa a châ.
ISSUED BY:
Information & Publicity Department
Mara Autonomous District Council
Siaha.
