PRESS RELEASE
NO.121/2025
SIAHA, 24 Phiata, 2025 (Chutynoh): Atanoh my dawh 11:00 AM khata Puhpa K. Chhuabei, EM i/c LAD, MADC ta Media zy a Official chhôhpadâh (Chamber) liata Siaha khichhôh pathaina ataopasuana kyh reihpahmaohna a hneikhei ei.
Puhpa K. Chhuabei, EM chata, “Puhpa M. Laikaw, CEM chhihthana ry liata 12th term MADC heta Siaha khihpi nata eima district chhôh liata khih a ypazy pathaihna lâchhâh ta hmah eima sie thei n’awpa ta thata hmahla ty pi ta, Mizoram Cleanliness Competition (MCC) 2023 District headquarters category liata sâthôhna lymâ la pi ta, MCC 2024 liata Sânona lymâ la heih pi ta, atakô he sâkhana lymâ la achhuahpa ta hmahlana nano nanopa siekhei hai pi ta, cha liana chata, Siaha khichhôh VC ôna 25 châta nata thotlâh khih 74 zy châta ataopasuana pachhuahpanohpa châ sa la tahpa ta pathlupa a châ. MCC 2025 châta apachhuahpanohna sâkha a châzie,” a reih.
“Siaha Biatuhpa MLA Dr. K. Beichhua ta sôh ₹100,000 tlai miah pie ta, a chô liata eimâ ly hmeiseih, he sôh he Siaha khichhôh liata VC ôna 25 châta lymâ awpa ta tao pi ta, sâkhana lymâ he ₹50,000, sânona ₹30,000 nata sâthôhna ₹20,000. He hleikhô heta, Thotlâh lâ chhao tahmâ la pathai kaw bâ hra ei ta, anodeikua la, khih thokha he khodâh hawhta pathaihna lâchhâh hmahsie tu leipa ei ta, chavâta LAD fund tawhta District chhôh liata thotlâh khih 47 zy châta pathaihna lâ ta sâkhana a lapa châta lymâ ₹30,000, sânona ₹20,000 nata sâthôhna ₹10,000 pachhuahpanohpa a châ,” a tah.
EM chata, “Result he Republic Day 2026 noh ta phuahpa châ aw ta, Siaha khichhôh liata judge awpa ta MJA nata MSO zy raopa châ ei ta, hmah maniah nama lakhei lymâ awpa ta eimâ haw. Chata a châ no chata, pathaih chaipa khih namâ tlyh raohpa ta a pua chaipa khih chhao namâ tlyh pâ aw,” a tah.
Pihnô S. Lalmuanpuii, Sr. LAO, LAD chhaota biereina hnei hra ta, LAD ta hmah a lana tlâhpipazy reih ta, district chhôh liata ataopasuana liata parameters hmâh awpa chhopasiana nata MCC 2025 liata parameters zy chhao chhopasiana daihti â hmâh hra.
He hleikhô ta LAD biehneituhpazy nata MJA members zy ta Siaha khichhôh liata pathaihna kyh liata ama kho a khi leina nata hmahla n’awpazy reihpahmaohna chhao ama hnei hra.
He meeting lia heta MJA President nata members zy, DDK Stringer, NSV Manager, HS Vision Manager nata I&PO, MADC zy amâ hlao.
ISSUED BY:
Information & Publicity Department
Mara Autonomous District Council
Siaha.
