PRESS RELEASE
NO.90/2026
SIAHA, 23 Phiata, 2026 (Chutyhnoh): Atanoh zâlâ dawh 2:00 PM khata St. L. Joseph Buihringpachha, Champion, LPS Pro-Fight 2026 Bantamweight cha MTP Gen. HQ Siaha ta a rônah kawpa ta Traffic Point, Siaha Vaihpi Bazar liata dypa a châ.
Programme he Ls. Roseline Nôtlia, Treasurer, MTP Gen HQ ta chhihtha ta, Rev. B. Beilua, Adviser, MTP Gen. HQ ta Abeipa lâta pavaosana thlahchhâna a hnei.
Puhpa T. Seido, EM, MADC chata, “Puhpa L. Khaichyu nata Chhôhkha, Programme host tuhpa, MTP HQ Siaha nata MSO HQ, MCHP HQ, MHP HQ Chhituhpazy, Students nawh zy, Programme a vaw hlao theipa zydua nata Aizawl tawhta Boxer vaw zituhpa zydua, nama zydua ta MADC Sports & Youth Dept. mohta Samaw ei cha hlâ chyu ei,” a tah.
“A pahchaipa ta MTP General HQ Siaha Chhihthatuh penawh chô liata a vaw ly kaw na ta, he hawhpa Programme taona châh nama pahnopa he a rônah kawpa ta pahno na ta, nama chô liata alynabie ei reih hmeiseih.”
“Atanoh Mara Satlia L. Joseph Beihringpachha, Chi nata Pho châta nata râh châta mohphana rônah ngaitapa Mara Satlia nata Laihsa châta pahaona rônah ngaitapa kaw phaohpa ta, eima râh â vaw ngiapa he a rônah tah hmeiseih na ta, aly â chhih hmeiseihpa ta pahno na ta, a chô liata alynabie ei reih hmeiseih.”
“He hawhpa hlaotlohna to awpa ta a lâthlôh he a pahsi kaw nahta pangiasa na ta, tha nata zâh, sôh nata thih chhao vâro tlai ama hryuh cheingei aw.”
“Cha lâthlôh cha pahsi kaw hra sala, na tao hualuana zy, na hriapasana zy, Ring chhôh liata na luhzy a vaw pahiah ngâpa chhaota Maraland châta, a kaw pasai chita, na tao hualuana zydua kha, Abeipa ta khâchâ a thei ta, Atanoh he Maraland Khihpi Siaha Bazar liata palyupalihna na topa he a vaw châ.”
“He palyupalihna na topa dei châ leipa ta, Siaha District Satlia nata Laihsa châta pahaona rônah ngaitapa kaw phaopa ei chi ta, a theilâpa chhao thlai ta eima hmô cheingei nata khâchâ ei ngiapâ.”
“Siaha District liata Satlia nata Laisa zydua saih u, Satlia L. Joseph Beihringpachha hawhta tiama papua la, rairunazy vaw hmiachhy tua hra la, na yna su kha a vaw pasiesai la, he mohphana lâpi he a vaw chhih ha hra mah y.”
“He hlaotlohna duasu he, na khoh hmeiseih khiahta la, na kiapâh liata a y tahpa he, Satlia L. Joseph Beihringpachha tawhta a vaw chu mah y.”
“Marapa sawzy pi he, Celebrity he eima pahnie âh tla ma i tahpa na pachâsa ta. A pahchaipa ta Marasaw Boxer eima hnei penawhzy he ama goal ama tlô hlâta, Sahma lâta arâ ei ta, zâhnia khiahma zawpi ta eima palyupalih eima tah nota zawpi ta a thâtih phaleipa sai thei awpa, a vaw pazi thlâh ha tyh bao, a pei ngâsâ.”
“Boxing dei chhao châ vei, Sport Discipline nanopa chhao, eima artist nawhzy chhao tao hualua ei sih la, Abeipa ta eima tovyuh miah a sopa khai thlâh ha taraw. Châhrasala, ahy hmahta kaw tlô pha khao ma pi. Mohpha phiephuh a chhâna tlô khao tlôh va tahpa a hluh kaw,” tahpa ta EM ta pasyunabie pha kawpa a reih.
Puhpa Sete-a, Sete Boxing Academy hneituhpa L. Joseph Beihringpachha Coach tawhta report nahthliepa châ ta, Puhpa L. Khaichyu F/o L. Joseph Beihringpachha nata ano St L. Joseph Beihringpachha tawh chhaota alynabie reina nata biereina chyupa nahthliepa a châ hra.
Atanoh ta L. Joseph Beihringpachha dyna programme liana heta Ls. Jessica Ngôdy Hlychho ta thai kawpa ta hlasana hnei ta, MTP, MCHP, MSO Gen, HQ nata SiDBA tawhta palyupalihna ryuchâ, pawpi nata hmosaipazy St. L. Joseph Beihringpachha nata ano vaw zituhpazy hnohta hlâpa a châ hra. St. L. Joseph Beihringpachha he Aizawl tawhta ama Coach Puhpa Sete-a, St. Zira (Boxer) nata St. Jeremy (Boxer) zy ta ama kaw zi thei hra.
Puhpa T. JB. Rôna, Secretary i/c Games & Sports, MTP Gen. HQ chhaota pasyunabie pha kawpa reina a hnei hra.
Daihti chhâna lâ liata St. Beithlapahrua Nôhro, Secretary i/c Info & Publicity, MTP Gen. HQ, Siaha ta alynabie reina a hnei khai tawhta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
