PRESS RELEASE
NO.89/2026
SIAHA, 23 Phiata, 2026 (Chutyhnoh): Atanoh zâlâ dawh 1:30 PM khata Siaha DFA Playground, Tlyzôh by, Meisatlâh liata Siaha District Football Association pachhuahpanohpa CEM MADC Trophy 2026 Final Programme ahmâhpa châ ta, Puhpa M. Laikaw, Hon’ble CEM, MADC chata Khichhai Laipa châpa ta programme â hmâkhei ei.
Programme he Puhpa Khusa Khaila, Vice President, SDFA ta chhihtha ta, Puhpa T. Vabeichhuakhu, Sr. Advisor, SDFA ta Abeipa lâta pavaosana thlahchhâna a hnei.
Puhpa M. Laikaw, CEM, MADC chata, “Atanoh CEM MADC Trophy 2026 Final Match akhaih awpa nata he su liata avypa zydua MADC mohta samaw ei cha hlâ ei,” a tah.
“A kô hro ta CEM MADC Trophy liata châ hlaokhei thei beih leipa ei na ta, atakô final match liata ei vaw hlao theipa nata khokheina ei topa he ei ly hmeiseih.”
“Football he eima râh liata cha individual game tah leipa ta cha eima pahno chaipa nata alâluah chaipa châ ta, atanoh taihta football match pha kawpa hnei pazao thei lymâpa a châna chhâpa he chhihthatuhpazy hriapasana vâ deita châ ta, ama chô liata alynabie reih na ta, ama sie lymâ n’awpa liata khokheina ei hlâ ei.”
“Eima râh lia heta thyutlia hluhpi paritheipa tao ei ta, thyutliapa thokha football akhaih thai kawpa paritheipa ama tao vâta akhaih pazao thei khao leipa ta ypa vâro y ei ta, a pei hmeiseih.”
“Thyutliapa râh chhihthatuhpa phapa kaw châ awpa heta chyhsa siapa, palôhru thatlôpa, physical soundness hnei phapa nata physical fitness hnei pha kawpa he peimawh ta. Cha hawhpa hnei awpa heta exercise la pha ta Sports zy tao hluhpa he a peimawh ngaita kaw.”
“Kô uhthei lâ liata pasapanana thisaih sâhpa, thisaih thlôhpa hneipazy, etc hneipa hluhpizy he ama thyutlia daihti liata Sports tao beih leipa zy, football akhaih leipa zy, ama thyutlia daihti liata niedohpazy ama châ thai kaw.”
“CEM MADC Trophy liata sâkhana châ achhuah chyu ei chi ta, sâkhana châ dei kha peimawh chai leipa ta, physical fitness nama hneina nata physical soundness hneina a châpa vâ heta training pha kawpa na a châ e tahpa he nama pahno awpa a byuh.”
“Sports nama kaw pahâh lymâ khiahta cha châhnamei pazy a ryh khao leipa ta, niedoh a ryh khao hra leipa ta, pa-ôpazy a ryh tlâ khao hra vei. Nama siesai khai’pa a byuh. Paripangapa nata Sports he pakaoh thai’pa châ khao vei,” tahpa ta Khichhai Laipa ta pasyunabie pha kawpa a reih.
Puhpa M. Laikaw, CEM, MADC heta District Hospital, Siaha liata Indian Medical Association (IMA) Mizoram pachhuahpanohpa Free Medical Camp a tly pâ hra.
Laihsa Teresa Ngianô Hlychho ta pahnie kawpa ta hlasapa ta zawpi a palôhpahawh.
Puhpa AZ. Daolai, Match Commissioner ta report piena hnei ta, Puhpa Puhpa VT. Martin Vabeiduakhei, President, SDFA ta vote of thanks reina a hnei.
Football Final Match he Chhôchhôpaw FC nata College Vaih FC akhaih ei ta CCPFC 7-6 CVFC (Penalties) ta Chhôchhôpaw FC ama tlôh.
Puhpa M. Laikaw, CEM, MADC he official lâ tawhta Puhpa Pawsa Lava, Asst. I&PO, MADC nata Puhpa K. Nehemia, I&PD, MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
