PRESS RELEASE
NO.10/2026
SIAHA, 04 Hmypi, 2026 (Pakhynoh): Atanoh zâlâ dawh 2:00 PM khata Hraisua Hills, Tlâhpi Siaha liata Puhpa K. Chhuabei, EM i/c LAD, MADC ta Urban Development & Poverty Alleviation Development, Government of Mizoram under Swachh Bharat Mission (Urban) ta Mizoram Cleanliness Competition 2025 Category – 11 (District Headquarters) a pachhuahpanohpa liata Siaha khihpi (Town) cha sâkhana (1st Rank) lymâ daopa alyna programme â hmâkhei ei.
Programme he Puhpa Henry PL. Hnaihly, LAO, MADC ta chhihtha ta, Puhpa M. Hniedo, ASO, MADC ta Abeipa lâta pavaosana thlahchhâna a hnei.
Puhpa K. Chhuabei, EM, MADC chata, “Mizoram Cleanliness Competition 2025 liata Siaha khihpi (Town) ta sâkhana (1st Rank) lymâ eima lapa he aly â chhih hmeiseih. LAD, MADC liata Sr. LAO, Pihnô S. Lalmuanpuii nata a hrialâhpa zy, Puhpa Vanlalchhuanliana, SDO (S) & DPO nata UD&PA liata hriatuhpa zy, VCs, NGOs, Awnanopa zy, Officers, Pastors, Professor pensioners-zy, Senior Citizenship, Media chyhsa zy nata Mara zawpi, etc zy hriapasana nata hriaparaohna pha kawpa vâ deita ta he sâkhana lymâ a la theipa eima châ,” a tah.
“Atanoh alyna programme he zawpi hluhpizy hrua awpa eima khoh kaw tarawpa ta, LAD, MADC liata hriapa, UD&PA nata RGSA staff zy deita ta â hmâh chy pi ta, Puhpa M. Laikaw, Hon’ble CEM, MADC ta sâkhana eima lana alykheina programme miah a pachhuahpanoh tita a hluh via ta alyna programme eimâ hmâh heih aw.”
EM chata, “Pathaihna liata sâkhana lymâ eima la ha tawhta cha tiama papua via lymâ ta, eima pathaih via lymâ awpa he peimawh ta, sâkhana lymâ chhao la eimâ chhuah via lymâ awpa he a peimawh ngaita kaw,” a tah.
“Cleanliness competition liata ama thliena Parameter (standard, measure, or criterion) zy pahno kaw bâ pi ta, tiama papua via lymâ ta sâkhana châ pazao lymâ eimâ chhuah aw,” tahpa ta EM ta pasyunabie pha kawpa a reih.
Atanoh ta alyna programme liata ahlaopazy cha LAD, MADC, UD&PA nata RGSA liata hriatuhpazy ama châ.
Puhpa Vanlalchhuanliana, SDO (S) nata Pihnô S. Lalmuanpuii, Sr. LAO, MADC chhaota pasyunabie pha kawpa reina ama hnei hra.
Puhpa John Beizachhi Phuto ta pahnie kawpa ta hlasapa ta zawpi a palôhpahawh. Pihnô Zache nata viasazy ta special item alyna lâ angia kawpa ta ama lâ.
Puhpa Joshua Chozah, Under Secretary, LAD, MADC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
Programme pachhâsa khai tawhta aly kawpa ta zâ pati dôhkhohpa a châ.
ISSUED BY:
Information & Publicity Department
Mara Autonomous District Council
Siaha.
