PRESS RELEASE
NO.9/2026
SIAHA, 04 Hmypi, 2026 (Pakhynoh): Atanoh dawh 12:00 Noon khata Puhpa K. Chhuabei, EM i/c LAD, MADC chata a official chamber (chhôhpadâh) liata Mara Thyutlia Py (MTP) General Headquarters, Siaha Chhihthatuhpazy â pakyhna nata thopi dokheina a hnei.
Puhpa K. Chhuabei, EM chata, MTP General HQ, Siaha Chhihthatuhpazy ama daihti sôh kawpa parua ta, a hruana nawh kawpa pachâ peimawh ta, a official chamber (chhôhpadâh) liata ama vaw pua theipa â lyzie reih ta, alynabie a hlâ chyu ei.
EM chata, Paritheipa adyuhna kyh liata thapiphia via ta Siaha khihpi vaih lialôh kawpazy liata thyutliapazy ta â lâhâh kawpa ta paritheipa ama tao tyhpazy â ngialeizie reih ta, MTP Gen. HQ chhihthatuhpazy tiama papua ta paritheipa adyuhna kyh liata hriaparaohna phapa hnei via lymâ awpa ta ahawna a tao.
Puhpa K. Chhuabei, EM chata MTP Gen. HQ, Siaha nata NGOs zydua a byuh â ngiahna hawhta Chhâtlâh liata Solid Waste Management Center sa haipa he ama sa patlô thei n’awpa ta hmahla chyu awpa ta ahawna a tao.
Pihnô S. Lalmuanpuii, Sr. LAO, MADC chhaota Urban Development & Poverty Alleviation Development, Government of Mizoram under Swachh Bharat Mission (Urban) ta Mizoram Cleanliness Competition 2025 Category – 11 (District Headquarters) a pachhuahpanohpa liata Siaha khihpi (Town) ta sâkhana (1st Rank) lymâ dao ta aly â chhihzie reih ta, NGOs zy chhaota pathaihna kyh liata tiama papua ta hmahlakhei lymâ hra awpa ta ahawna a tao pâ hra.
Puhpa Henry PL. Hnaihly, LAO, MADC chata, Solid Waste Management Center, Chhâtlâh liata sa haipa he 28 September 2024 tawhta DJ Consultancy Service zy ta ama sa pathaopa a chazie reih ta. He Solid Waste Management Center Chhâtlâh lliata sa haipa he, ama sa noh tawhta thlahrawhhleino (within 12 months) chhôhta sa khai awpa a châ taraw nota, tahmâ taih ta sa khai mâh leipa a châzie a reih.
Puhpa S. Vabeihasa, President, MTP Gen. HQ Siaha nata Puhpa N. Solomon Beihlôtha, General Secretary, MTP Gen. HQ Siaha chhaota biereina hnei hra ei ta, Chhâtlâh liata Solid Waste Management Center sa haipa ama vaw patlô thei n’awpa ta nata paritheipa adyuhna kyh liata a byuh â ngiahna hawhta hmahlakhei lymâ amâ chhuahzie ama reih hra.
Puhpa K. Chhuabei, EM heta MTP Gen. HQ Siaha hnohta â byuh â ngiahna liata ama hmâh awpa sôh a hlâ pâ hra ei.
ISSUED BY:
Information & Publicity Department
Mara Autonomous District Council
Siaha.
