PRESS RELEASE
NO.35/2026
SIAHA, 22 Pachawh, 2026 (Pakhynoh): Atanoh 12:00 Noon lia khata Road Transport Department, MADC, Siaha Office liata Puhpa Beirahmo Syhly, EM i/c Road Transport Department, MADC chata MADC Enforcement personnel-zy hmâh awpa Uniform Vest a palâhâh.
Programme he Puhpa B. Sawma, MVI, MADC ta chhihtha ta, Puhpa Kaisanga Chozah, LDC ta Abeipa lâta pavaosana devotion daihti â hmâh.
Puhpa Beirahmo Syhly, EM chata, “Council cha eima pahnopa hawhta eima Budget tatawta ta, Budget lia cha head soh tyhpa châ ta, anodeikua cha head dâh hawhta hmo siekhai thai leipa ta, RTO phahnaingiahna ta, nâmo (MADC Enforcement personnel-zy) kyhpachâna vâta Vest vaw order ta aly’pa a châ kaw,” a tah.
“MADC liata Road Transport Department he Department laipa hawhta rei thai’pa châ hlei tlôh vâ, Department tatawpa hawhta za rei thai’pa châ heih tlôh va tah ta, a kheihawhpa rai cha châ sala, he Vest he nama duty na liata nama hmâh awpa châ ta, nama phahnaikhei kaw nahta ei pangiasa.”
“A hlâta RTD, MADC liata Enforcement pano pathôh deita y tyhpa kha, tahma cha pahrawh hlei nama vaw y haw. Duty tuh awpa chhao vaw hluh via ha ei chi ta, aly’pa a châ hmeiseih. Hriatuhpa nama vaw hluh via hapa vâta Motor parking zy hawhpa nama duty awpa hria awpa zydua kha cha pahnie kawpa ta nama hria bâ awpa a byuh.”
“Tipa chhao a byuhna hawhta palai via laih awpa a byuh hra. Eima pahno chyupa hawhta eima khihpi Siaha he acha-ie kaw bâ ta, eima lâpi hra khiah pakawh thai’pa châ khao tlôh va, yzie hnei kawpa ta parking tao ta, nama mokhei awpa he a peimawh ngaita kaw.”
“Duty liata Motor pheichakiena tao pi ta, phone nawhbaw roh khai awpa eima tahpa kha thokha liata roh mâh leipa y hôlô ta, roh mâh leipa lia khata, thlai nama vaw roh khai awpa a châ. Tao awpa eima tahpa he cha pachâ peimawh ta nama tao para lymâ awpa a châ.”
“Motor pheichakiena kyh liata thokha cha kei na vaw phone ei ta, kei ta decision tao va na, duty nawh reisaina a châ e, âmo ku liata power ei pie khai ha na, tahpa ta ei chhy lymâ ei. Chavâta, nâmo chhaota â do kawpa nata dâhta hawhta rai nama hria lymâ aw.”
“Night parking permit chhao pasia byuhpa nama pasia para lymâ aw. Duty na Jersey namâ ky nota la â khiekhâ chakhyh lei awpa, duty nama châpa pahno thlâh hana chôta, Jersey aky nota la, a pha kawpa nata tiama kawpa ta rai nama hria awpa a byuh. Traffic Police zy nata hriaparaohna phapa hnei namâ chhuah lymâ aw. Nama rai kyh liata a peimawh raihrie ei chi ta, chavâta, hriaparaohna phapa nama hnei lymâ aw,” tahpa ta EM ta pasyunabie pha kawpa a reih.
Puhpa John Kenneth Syhly, RTO, MADC, Puhpa Pawsa Lava, Asst. I&PO, MADC nata Puhpa Joel B. Nôtlia, ESI zy chhaota pasyunabie pha kawpa reina ama hnei hra.
ISSUED BY:
Information & Publicity Department
Mara Autonomous District Council
Siaha.
