PRESS RELEASE
NO.33/2026
SIAHA, 13th Pachawh, 2026 (Hriatuanoh): Târi 11.04.2026 lia khata Puhpa K. Hrahmô, MLA, Vahia biatuhpa Puhpa K. Chhuabei, EM i/c LAD, MADC, Puhpa T. Seido, EM i/c Sports, etc., MADC nata Puhpa J. Khotha, SDO, PWD zy ta Laki nata Vahia likawh lâpi upgrade haipa a su tlypa ta moh padona ama hnei.
Puhpa K. Hrahmô, MLA chata, “Atanoh cha Vahia lâthlôh pha kawpa avaw ngia ha ta, nôpaw thokhazy he lâthlôh phapa avaw ngia awpa angiatiah leipa, thina lâthlôh âchhih hapa thokhazy ei pachâ nahta ei palôh a pasa hmeiseih. State Sawhkhâ ry liata Committee peimawhpa, DISHA paduapa liata Chief Minister he Chairman châpa ta, kei chhao he Member pakha ei châ hra. Mawrâh liata raihriapazy he DISHA Committee heta eimâ laichaidai pazi lymâ. Rai phapa ama hria lymâ thei n’awpa ta a chhâna taihta eimâ chadaipazi lymâ aw. Eima khih chyu liata Central nata State sawhkhâ tawhta rai ama hriapa zydua chhao he a phalei khiah complaint-na vaw pangia lymâ u la, eimâ chadai pazi lymâ aw,” a tah.
He lâpi tao chiehpa liata taopathi byuhpa liata rai phaleipa a y khiahta la, moh pazi lymâpa ta Vahia VC nata MTP zy ta ahriatuhpenawh hnohta thlaita pahnosa lymâ awpa ta a chho ei. NABARD Loan tawhta he lâthlôh he taopa châ ta, Amount he Lo 2858.00 (Lakh) a châ.
He rai he Shri Balaji Construction Company zy ta hria ei ta, EE, PWD, Siaha Division ry liata implemented pa a châ. Târi 27th June, 2026 hlâta he lâthlôh tao patlôpa a châ aw. Shri Balaji Construction Company zy ta kô 5 chhôhta he lâthlôh he ama mohôh pazi pâ hra aw.
Puhpa K. Chhuabei, EM, MADC ta, hmia pahnosana a hnei khai nahta, biereina chyupa hnei ta, Vahia khih liata High School Teacher Quarters sa n’awpa, total Amount Lo 28.00 (Lakh) tawhta Lo 24 (Lakh) cha phusâ la khaipa a châzie, a reih. A rai he a chyhta ngâlâh taopa a châzie, a reih. He Teacher Quarters sa patlô khao leipa he Biatuhpa MLA hnohta hmahlakhei awpa ta â haw pâ hra.
Puhpa K. Hrahmô, MLA he Siaha tawhta Puhpa K. Chhuabei EM i/c LAD, MADC, Puhpa T. Seido, EM i/c Sports, etc., MADC, Puhpa J. Khotha SDO, PWD (GoM) Siaha Div., Puhpa L. Vabeihlathie, Convener IT&MC, Puhpa Jeffrey Khara, Moonlight Editor nata Puhpa K. Nehemia, I&PD, MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
