PRESS RELEASE
NO.137/2025
SIAHA, 24 Phiapi, 2025 (Hriatuanoh): Atanoh dawh 10:30 AM khata Golden Jubilee Hall, MADC Siaha liata Shri Ram Nath Thakur, Hon’ble Union Minister of State for Agriculture and Farmers Welfare, Government of India ta All Elected Office Holders, All Heads of department, MADC nata Siaha liata Mawrâh sawhkhâ ry liata hriapazy programme a hneikhei ei.
Programme he Puhpa VL Hruaizela Khiangte, Deputy Commissioner, Siaha District, Siaha ta chhihtha ta, Puhpa David K. Azyu, AHEO ta reih a palie.
Shri Ram Nath Thakur, Hon’ble Union Minister of State for Agriculture and Farmers Welfare, Government of India chata, “Atanoh he su liata avypa Puhpa M. Laikaw, CEM, MADC, Puhpa VL Hruaizela Khiangte, DC Siaha, SP Siaha nata officers zachhih kawpazy, atanoh he su liata ei vyna chhâpa cha Prime Minister of India bie hawhta avypa nata vaw tlypa ei châ.”
“Zachhih kawpa nata rônah kawpa ta eina vaw dy vâ ei chi ta, kei nata Government of India vyuhpa ta alynabie ei cha hlâ hmeiseih ei. Aly kawpa nata kyhpachâna nata khokheina nata rônah kawpa ta eina palyupalihna ei chi nata ei chô liata nama hmotaophana zydua he, my beih aw va na.”
“He su liata pahrâpazy he hmotaotheina nama hnei tahpa he ei pahno thei. Kei chhao he nâmo hawhta lyutaopa châ hra na ta, a hlawfah tyhpa ei châ hra. He su ei vaw tlô tawhta nama rairuna keima liata nama vaw tlôkheipa zydua he Prime Minister of India tlôkhei aw na ta, a hlao a tloh cheingei nahta chhao ei pangiasa hra.”
“India sawhkhâ heta lyu taotuhpazy he kheihtama hmah lakhei sih la hmahsiena ama hnei thei aw tahpa he pachâ peimawh kaw ta, leilô pha dâhzy moh laih pi ta, thata hmah eima la ngâhai.”
“He su liata ei vy nota nama Exhibition moh na ta, Âhiahzy, Iasohzy nata athei (Cucumber) zy hmô na ta, anodeikua, âhnalahsi lâchhâh hmô tlâ leipa na ta, ei vaw tlyh heih tita cha, âhnalahsi lâchhâh ei hmô nahta ei hnabeiseih. Â thei chhochhi khiahta la a suzy kei cheingei ta tly laih ta, he su leilô lia heta a kheihawhpa chicheipa ma chhei sih la, a tla aw tahpa moh ei khoh.”
“He su liata population he chyhsa ta eina chho dâh ei ta cha thycharu rachhôh ypa hawhta na chho ei ta, Primary school, Middle school, High school, College, BA, MA achuna khazie y, Hospital, Dawhty, Nurse khazie y tahpa zydua he ei pahno khoh kaw.”
“Lyu taotuhpa zy, Awh zaopa zy, Mie zaopazy, etc ama duasu, lyu ama tao hlâ, sahroh ama zao hlâ nata ama zao khai tawhta ama hmahsiena duasu chhao ei pahno khoh kaw. Kei he India chyhsa pakha châ hra na ta, he tlupo ta eina palyupalih vâ ei chi ta, ei châ ly hmeiseih ei,” tahpa ta a biereipa a pachhâsa.
Puhpa M. Laikaw, Hon’ble CEM, MADC chhaota District council châta Central sawhkhâ liata bie tlôkhei awpa peimawhpazy reina a hnei hra.
Golden Jubilee Hall, MADC, Siaha liata programme a hmâh khai tawhta, Union Minister ta District Hospital, Siaha tly ta, Hospital campus chahryhna a hnei pâ ta, hospital liata a hriapa nata apakyhna a hnei pâ hra.
District Hospital a tly khai tawhta Krishi Vigyan Kendra (KVK) tly pâ hra ta, he liata daihti chyuta hmâpa châ ta, KVK liata exhibition zy mona daihti nata Lyutaona liata hlaotlohpazy hnohta lymâ raina a hnei pâ hra.
Lymâ alapazy:
- Puhpa V. Photlu – Oil Palm
- Pihnô C. Nuso – Kitchen Garden
- Puhpa N. Lalsiama – Strawberry
- Pihnô Lalbiakkimi – Mushroom.
KVK Siaha liata daihti ahmâna lia heta Dr. H. Vanlalhmuliana, Senior Scientist & Head, KVK Siaha chhihthana ry liata ahmâhpa a châ. Don Bosco School hawtizy ta “Rakhâtla” angia kawpa ta ama lâh.
ISSUED BY:
Information & Publicity Department
Mara Autonomous District Council
Siaha.
