PRESS RELEASE
NO.18/2026
SIAHA, 17 Hmypi, 2026 (Hriaheinoh): Atanoh dawh 12:00 Noon khata MADC Golden Jubilee Hall, Siaha liata Urban Development & Poverty Alleviation Development, Government of Mizoram under Swachh Bharat Mission (Urban) ta Mizoram Cleanliness Competition 2025 Category – 11 (District Headquarters) a pachhuahpanohpa liata Siaha District ta sâkhana (1st Rank) lymâ daopa cha Puhpa M. Laikaw, Hon’ble CEM ta Seih thiepa ta alyna programme he a pachhuahpanohpa ei. LAD Department, MADC lâ tawhta lymâ ama daopa sôh tawhta Vao sâkha ama thie pâ hra.
Programme he Pihnô S. Lalmuanpuii, Sr. LAO, MADC ta chhihtha ta, Rev. T. Salaw, Sr. Executive Secretary, ECM ta Bible reading and prayer daihti â hmâh.
Puhpa M. Laikaw, Hon’ble CEM, MADC chata, “Siaha District ta he hawhpa alyna programme he eikha eimâ hmâna a châpa ta ei pahno. Pathaihna liata sâkhana eima la theipa he hriaparaohna phapa eima hnei va châ ta, aly’pa a châ hmeiseih. Puhpa K. Chhuabei, EM i/c LAD, MADC nata Pihnô S. Lalmuanpuii, Sr. LAO, MADC leadership ry lia nata Siaha Town chhôh liata Department zydua nata Siaha zawpi zydua hriaparaohna theilâpa sâkhana lymâ eima la theipa he aly’pa a châ hmeiseih,” a tah.
“Pathaihna liata sâkhana la ha pi ta, sânona châ achhuah khao leipa ta, sâkhana châ pazao eimâ chhuah lymâ aw. A next liata la clean Maraland he eima target awpa a byuh. Homework apie pâ aw pi ta, pathaihna liata Siaha District sâkhana châ ha pi ta, a next liata la DAO yna Tipa, CAO Vahia nata CAO Chakhei he pathaihna liata amâ taopasua aw.”
“Mawrâh pôhpalôh liata pathaihna ataopasuana liata sâkhana eima châpa he chhôh to ta eimâ mohpasia awpa a byuh. Eima ochhôhzy a pathaih ma, eima compound a pathaih ma tahpa he eimâ mohpasia awpa a byuh. Eima khih nata râh he chyhsa ta a pathaih miah ama tah ma? Eimâ mohpasia ngâthlâh ha awpa a byuh.”
“A heihpa liata Siaha District ta pathaihna liata sâkhana eima la heipa a châ khiahta la, MADC liata Executive Members zy ta keimo ta alyna kyhchhi eima pachhuahpanohpa aw ama tah. He hlâta rônah viapa ta eima tao aw, ama tah,” tahpa ta CEM ta a reih.
“Pathaihna liata eikha sâkhana eima la tawhta la pathlie khao lei awpa a châ. A khih hawh chhaota pathaihna liata eima taopasua lymâ aw. Mararâh cha râh pathaihpa, khih pathaihpa châ eimâ chhuah chyu aw.”
“Pathaihna heta chyhsapa standard of living a phualuahtuhpa châ ta, chyhsa pathipalôh moral â nai nata â sâh thliena chhao a châ hra. Pathaihna ta a sapapuapa cha alyna zy, hri-ia pathaihnazy châ ta, Siaha District ta pathaihna liata sâkhana eima la ha tawhta cha, eima pathipalôh chhao a pathaih hra awpa a châ.”
“Zakô kha vaih kha liata na eimâ piechhie ha e, tah ei ta, vaih kha chhao heta maophaohna eima hnei kaw hrana tahpa he a thiehpa ta eima pahno awpa a byuh. Eima zydua hriaparaohpa ta sâkhana la ha pi ta, eima individual chyu he pathaihna liata maophaohna eima la pazao lymâ awpa he a za peimawh ngaita kaw.”
“Khihtlyh na ta ei chysia a pua khiahta la, keima kho ta pasu na ta zawh na ta Istari ta ei hnao thlâh tyh. Ei phana rakha ta pathaihna he ei zâ vao hra. Thokha cha khôtho lâta amâ lâ dâh liata pathaih kaw ei ta, ama ochhôh pua kawpazy ama y thlâh. He hawhpa he la pasâhsa âchhih hlei vei.”
“Thokha nônahzy pathaih kaw ta smart kaw ta nama Paw nahzy pathaih leipa nata smart leipa ama y thlâh hra. Pathaihna kyh liata mo hropazy mopâtlâh châ achhuah chyu suh vy. Eima raihriana Department chyu liata pathaih chaipa châ eimâ chhuah chyu awpa a châ.”
“LAD MADC tawhta ochheipâh liata Vao o phie khai awpa ta order vaw papua ei ta, CEM Bungalow chheipâh liata vao ozy eima phie khai ha. Tahmâ cha Vao o y tlâ khao leipa ta ziza pathaih kawpa ry liata eima charei bâ.”
“Siaha Town area liata Vao o sa lei awpa tahpa châ ta, thokha rei angiah khai leipa ama y thlâh. Eimâ lâ lei vâ tlâ a châ. Keimo châ dei châ leipa ta mo hropa châta rairuna tlôkheituhpa châpazy he a vaw pha lei kaw.”
“Pathaihna kyh liata khâchâ eima pachyu khiahta la, eima saw, samohzy chhao pathaihna hro ama za hnei lymâ thlâh ha aw. Mara chipho he chi pathaihpa na ama châ e miah ama tah thei awpa ta pathaih eimâ chhuah chyu awpa a byuh.”
“Pathaihna kyh liata LAD, MADC nata miah chhihtha ei ta sâkhana la ha pi ta, eima hmiahao lai chaipa Drugs adyuhna kyh liata MTP (NGO) zy ta miah chhihtha hr’aw ei ta, paritheipa Drugs he eimâ dyuh lymâ aw. Maraland he Drugs free ta eima tao awpa a byuh,” tahpa ta CEM ta pasyunabie pha kawpa a reih.
Puhpa VL. Hruaizela Khiangte, DC Siaha chata, khih hro lâ tawhta miah vaw tly ei ta, Siaha khihpi la nama pathaih kawna miah ama tah tyhpa he aly â chhih ta, ei ly thei kaw tyh. Siaha District liata HIV Positive a hluh chhâ chaina chhâpa he Syringe ahlypa vâ a châzie a reih. Sex vâta châ hlei vei na tahpa ta, a reih.
Puhpa K. Chhuabei, EM i/c LAD, MADC chata, “Atanoh he su liata â vypa zydua he LAD Department nata UD&PA liata a hriapa hawhta apachâ khai u la, pathaihna kyh lia hriaparaohna phapa hnei lymâ sih la, sâkhana châ pazao eimâ chhuah lymâ aw,” a tah.
“Mizoram Cleanliness Competition 2025 liata Siaha District ta sâkhana (1st Rank) lymâ eima lapa he aly â chhih hmeiseih ta, LAD, MADC liata Sr. LAO, Pihnô S. Lalmuanpuii nata a hrialâhpa zy, Puhpa Vanlalchhuanliana, SDO (S) & DPO nata UD&PA liata hriatuhpa zy, VCs, NGOs, Awnanopa zy, Officers, Pastors, Professor pensioners-zy, Senior Citizenship, Media chyhsazy nata Mara zawpi, etc zy hriapasana nata hriaparaohna pha kawpa vâ deita ta he sâkhana lymâ a la theipa eima châ.”
“Siaha khihpi dei châ leipa ta Mararâh thotlâh lâ chhao pathaihna eima pachâ peimawh lymâ hra awpa a byuh. Thotlâh khih chakichakô chaipa chhao a pathaih kaw awpa a châ,” tahpa ta pasyunabie pha kawpa a reih.
Puhpa T. Seido, EM i/c Sports, etc MADC ta Siaha District ta Mizoram Cleanliness Competition 2025 liata sâkhana a lana alykheina châta alynabie pakah deita ta reipa he a pha thaipa ta pahno leipa pi ta, eimâ lykheina he atheithlâhna Memento ta pie’pa eima khoh tahpa ta he a ry liata moh palâsapazy hnohta a hlâ chyu ei.
- Pihnô S. Lalmuanpuii, Sr. LAO, MADC
- Puhpa Vanlalchhuanliana, SDO (S) & DPO
- Puhpa K. Chhuabei, EM i/c LAD, MADC
- Puhpa M. Laikaw, Hon’ble CEM, MADC
- Puhpa VL. Hruaizela Khiangte, DC Siaha.
Staffs of LAD Department, MADC Siaha zy ta variety show hnei ei ta, Laihsa Jessica Ngôdy Hlychho, Puhpa John Beizachhi Phuto, Laihsa Sandy Zomuanpuii nata Teresa Ngianô zy ta pahnie kawpa ta hlasapa ta zawpi ama palôhpahawh.
Puhpa Vanlalchhuanliana, SDO (S) ta concluding remarks nata vote of thanks reina a hnei khai tawhta Rev. K. Vabeinochô, Moderator, ECM ta byhnâ awna ta daihti a pachhâsa.
Programme pachhâsa khai tawhta aly kawpa ta zâ pati dôhkhohpa a châ.
ISSUED BY:
Information & Publicity Department
Mara Autonomous District Council
Siaha.
