PRESS RELEASE
NO.94/2026
Kaochao East, 09 Phiapi, 2026 (Hriatuanoh): Atanoh my dawh 7:30 AM khata Puhpa M. Laikaw, Hon’ble Chief Executive Member, MADC chata Kaochao East (Siaha District, Mizoram) liata Cold Storage Plant a pahy. He Cold Storage Plant he Rs. 309.70 Lakhs hryuhpa ta sapa châ ta, SASCI 2024-25 Part-1 (U-A) sôh hmâpa ta sapa a châ.
Programme he Puhpa C. Beichhua, EE (PWD), MADC ta chhihtha ta, Rev. Tlyzawbeihlô Lapi, Kaochao Biatuhpa ta Abeipa lâta pavaosana thlahchhâna a hnei.
Puhpa M. Laikaw, CEM, MADC chata, “Mararâh liata Cold Storage eima hnei tua chaipa Kaochao East liata pahy theipa a vaw châpa he aly â chhih hmeiseih,” a tah.
“Kaochao he Mararâh liata raihria tiamapa, hriapasa kawpa khih châ ei chi ta, chavâta Cold Storage he khih liata pasopa a châ. Âhnalasi, thothei, Âteih, etc Off-Season lia chhaota a pha kawpa ta nama paso thei n’awpa ta Cold Storage pasopa a châ.”
“Kaochao khih chheipâh liata ypa chhaota he Cold Storage he vaw hmâh hr’aw ei ta, Electric Power hmâpa ta Âhnalasi, Thothei, Âteih, etc â rao lei n’awpa ta, Electric Power a vaw pha lei daihti lia chhao ta Solar hmâ theipa a châ.”
“A hneituhpa cha Zawpi châ ei chi ta, chado kawpa ta nama hmâh awpa a châ. Ku raihriapazy châta Ring Road tao achhuah lymâpa a châ.”
“Ku raihriapazy ta ama peimawhpa he sawhkhâ ta pachâpa lymâ a chhuah ta, hnabeidy leipa ta thapawh kawpa ta rai nama hria lymâ awpa he a peimawh ngaita kaw.”
“Nama ku raihriana tawhta sôh nama hmôpa he a hmâh dâh thai ta management nama thai kaw awpa he a peimawh ngaita kaw. Saving he nama pachâ peimawh kaw awpa a byuh.”
“Nama raihria pasana tawhta sôh nama hmôpa he yzie hnei kawpa ta hmâh ta, plan pha kawpa hnei ta, yzie hnei kawpa ta hmâh namâ chhuah chyu awpa a châ. Nama hriapasana sôh he Bank liata saving nama paso lymâ awpa a châ.”
“Kaochao he raihria tiamapa châ ei chi ta, anodeikua la, sôh saving kyh liata saving pachâ peimawh veih ei chi. Atahmâ tawh deikua la, saving nama pachâ peimawh lymâ awpa a byuh.”
“Kaochao khih he hmialâ nama sie lymâ n’awpa liata sapa nata thlahpa liata hmahsiena a y lymâ thei n’awpa ta khokheina sâh chaipa ei cha hlâ ei,” tahpa ta CEM ta pasyunabie pha kawpa a reih.
Puhpa L. Prisila, EM i/c PWD, MADC chhaota biereina hnei hra ta, “Kaochao East liata Cold Storage hmâh thei awpa ta a vaw ypa he ei ly hmeiseih,” a tah.
“SASCI sôh tawhta Kaochao East liata Cold Storage building he PWD, MADC ta vaw sa pi ta, eima raihria chhôh zydua he VCP nata Kaochao zawpizy ta thata miah baokhâ ei chi ta, patlô theipa a vaw châpa he VCP, nôpaw nata Kaochao zawpi chô lâ liata alynabie ei reih hmeiseih.”
“He Cold Storage he hmâh phahnai namâ chhuah chyu awpa a châ. He Cold Storage a vaw y tawhta raihria nama tiama via heih awpa a byuh. Cold Storage hnei ei chi ta, rai nama hria hoh vei khiahta la, Cold Storage he yzie hnei aw vei.”
“Chavâta he Cold Storage he hmâh phahnai achhuah u la, a lâpizy papha via lymâ achhuah u la, nama chado kaw awpa a byuh. Nama khih chheipâh he chicheizy pha ta, tiama via suh,” tahpa ta EM ta pasyunabie pha kawpa a reih.
Laihsa Priscilla Nôtlia nata Laihsa Clara K. Melita zy ta pahnie kawpa ta hlasapa ta zawpi ama palôhpahawh.
Puhpa C. Rahre, AE (PWD), MADC ta Technical Report piena hnei ta, “He Cold Storage he SASCI 2024 – 2025 Part – I ( Untied Addll ) phusâ tawhta sapa a châ. A building kawhna he (Cold Storage 36×60)ft, L-Shape lâ he office châ ta (15 x 24)ft ta sapa châ ta. Rs.309.70 lakhs ta patlô khaipa a châ. Târi 19/9/2025 tawhta pathaopa châ ta, Târi 28/2/2026 khata, Civil work cha a pha kawpa ta sa patlô hapa a châ,” a tah.
“Eima Puhpa L.Prisila, EM i/c PWD nata Puhpa A. Viahra, SE, PWD, MADC zy phahnaingiahnazy vâta 6 months chhôhta patlô theipa a châ, ama chô lâ liata alynabie ei reih hmeiseih.”
“A chhôh liata khaw chhaichhi machinery nata equipment installation patlôpa a châ tawhta atanoh he thlai ta pahypa a vaw châ. He building complex he (LSC) 295.00Sq.m ta kawhpa a châ.”
“A hriatuhpazy nata mohôhtuhpazy châta Office taopa châ ta,Toilet chhao attached pa a châ.
Solar hmâh thei awpa ta fit khaipa châ ta, â vaw rao tlamawpa chhaota electric Transformer ta back up thei lymâ awpa ta tao khaipa a châ,” a tah.
Puhpa K. Beichhua, JE (PWD) MADC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
Puhpa C. Vanneithanga, Ex. VCP & Chairman (Mango Society) Kaochao East ta biereina a hnei hra. Laihsa Beipawngia Khailah ta pawpi CEM hnohta a hlâ.
Puhpa M. Laikaw, CEM, MADC he Puhpa MH. Tiabi, EM (Education) (M/S), Puhpa L. Prisila, EM, PWD, Puhpa Beirahmo Syhly, EM, RD, Puhpa Tiahlei Syuhlo, EM, EF&CC, Puhpa J. Vabeikiasa, EM, Agri., Puhpa M. Chiadung, EM, Soil, Puhpa Vabeikhaihmo Solo, CF, EF&CC, Puhpa Pawsa Lava, Asst. I&PO Puhpa K. Nehemia, I&PD, Puhpa LC. Apaw, GS, BJP Siaha District, Puhpa B. Luaha, Secretary, BJP Siaja District, Puhpa L. Vabeihlathie, Convener, IT & Media BJP Siaha District, Puhpa M. Baithai, Editor, Chhim Aw nata Puhpa Naik Lalnunfela, PSO zy ta ama zi.
ISSUED BY:
Information & Publicity Department
Mara Autonomous District Council
Siaha.
