PRESS RELEASE
NO.2/2026
SIAHA, 08 Nawh, 2026 (Pobienoh): Atanoh dawh 12:00 Noon khata EM (Sports) MADC Official Chamber liata Puhpa T. Seido, EM i/c Sports, MADC nata Sports Department liata hriapazy ta Obed VT. Lalrinsanga nata Florence J. Beihropathaingia zy Sports liata hlaotlohna ama topa alykheina programme ahmâhpa a châ.
Programme he Puhpa VT. Martin Vabeiduakhei, ASPO, MADC ta chhihtha ta, Rev. RK. Chozah, Lecturer, MTC ta Abeipa lâta pavaosana thlahchhâna a hnei.
Puhpa T. Seido, EM, MADC chata, “Atanoh eima programme pachhuahpanohpa liata ahlao awpa ta hruapazy pachâ peimawh ta avaw hlao theipa zydua hnohta alynabie ei cha hlâ ei.” a tah.
“Sports nano nanopa taopa ta su hro lâ y haipazy arypaoh thai sala, â raohpa ta Siaha khihpi vaw pangaipata vaw tlô thei khai u la, programme ahmâh khoh ta hlasa thaipazy hrua ta programme ahmâh khoh thei sih la tahpa he ei byuh hmeiseih. Atanoh programme he eimâ thao dyutapa nah a châ e tahpa nama pahno awpa ta ei vaw khoh ngaita kaw.”
“Sports & Youth Services Department liata hriapazy he sia kaw sai ei ta, Sports châta peimawhpa patuapalua thai kaw ei ta, ama chô liata ei ly hmeiseih. Eima sawzy he duasu pha kawpa liata kaw y khai ei sala tahpa he khoh khai pi ta, anodeikua, a theory lia ngâlâh heta y pi ta, a practical ta taokhei byuhpazy taokhei ta buakhei awpa he ho tlâ tyh leipa pi ta, a pei hmeiseih.”
“Atanoh nôpaw he programme avaw hlao theipazy ei chi he la, cha reithai kaw ei na ta, nama chô liata ei châ ly hmeiseih ei. A chhâpa cha, nama sawzy hrâkyu kaw ei chi ta, back up pha kaw ei chi ta, bao amâ ngiahna liata bao lymâ ei chi ta, deichhy amâ ngiahna liata deichhy lymâ ei chi ta, nama sawzy pachâ kaw ei chi ta, ei châ ly hmeiseih ei.”
“Nâmo nô nata pawzy tiamana vâ deita ta keimo Sports Department zy moh phana eima vaw to tyh. Nâmo nô nata paw tawh heta âchu awpa hluhpi ei hnei. Atanoh Nô nata Pawzy chô liata alynabie ei reih hmeiseih.”
“Siaha District liata Sports nano nanopa liata chhihthatuhpazy ei chi he sia kaw sai ei chi ta, nawh veih ei chi na tahpa he ei za reih khoh kaw. Cricket, Badminton, etc liata chhihthatuhpazy nama hriapasana, tiamana he hria pazao lymâ awpa ta khokheina sâh chaipa ei cha hlâ chyu ei.”
“Eima nawhtazy Sports liata vaw pahâh kawpazy he ama hmipha kaw sai ta, ama pôraohzy vaw pha kaw sai ta, Mararâh nohâh taotuhpa nama vaw châ bao. Abeipa ngiachhiena a châpa ta ei pahno. Ei notebook liata roh tyh na ta, reih tlâh eima vaw châ ha. National lâ taihta azâ hlaophapa y thlâh hra ei chi, State player vaw hnei ngâ kaw hra pi, District player cha reih khao ma pi. Atanoh eima nawhtazy ei cha pasyu khoh kawpa ei cha, namâ thao dyuta châ ta, tiama nama vaw papua via lymâ awpa ta ei châ haw ei.”
“Sports nama tao nota rairunazy namâ tyh khiahta la, miah vaw chho lymâ u la, sôh nah thih chhao nama rairu khiahta la, miah vaw chho lymâ u la, eima tao theina rakha liata la leibâh chhaota eima tao lymâ thlâh ha aw,” tahpa ta EM ta pasyunabie pha kawpa a reih.
Cricket liata hlaotlohna a topa cha Florence J. Beihropathaingia D/o Puhpa J. Kholai, Siahatlâh a châ.
Badminton liata Obed VT. Larinsanga S/o Puhpa John VT. Hniehu, College Vaih, Siaha.
Pihnô HC. Nano w/o Puhpa T. Seido, EM (Sports) ta hlaotlohna atopazy he ano sôh tawhta lymâ a pie rairie ei.
Puhpa S. Vabeihasa, S&YO ta Vote of thanks reina a hnei khai tawhta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
