PRESS RELEASE
NO.125/2025
SIAHA, 28 Phiata, 2025 (Hriaheinoh): Atazâ dawh 6:30 PM khata NSV Studio, New Colony, Siaha liata MSO General Headquarters, Siaha in collaboration with LESDE, Government of Mizoram pachhuahpanohpa “Awareness on today’s job opportunities” programme cha Puhpa T. Seido, EM i/c Social Welfare, MADC chata khichhai laipa châpa ta â hmâkhei ei.
Programme he S. Arona, General Secretary, MSO Gen. HQ, Siaha ta chhihtha ta, Puhpa Beimosia Lapi, Sr. Adviser, MSO Gen. HQ, Siaha ta Abeipa lâta pavaosana devotion daihti â hmâh.
Puhpa T. Seido chata, “Tazâ ta he hawhpa programme pachhuahpanohpa a châpa he aly â chhih hmeiseih. MSO nata LESDE zy ta he hawhpa programme ama pachhuahpanohpa he nama tao thai kaw, cha liata kei Chief Guest ta eina hruapa ei chi he ei ly ngaita kaw. MSO he zawpi nahzy ta eima cha saina dâh he, chyhsa hluh viapa hlâta â sâh viapa ta eima cha hmô. Students eima tah khiahta la, chyhsa pathaih kawpa, vision hnei phapa, idea hnei pha kawpa hawhta eima cha hmô dâh a châ.” a tah.
“MSO nata a memberzy lia heta eima hnabeiseihna â sâh kaw. Nô nata paw ta riethei kawpa ta ama sawnahzy châ pachusa ei ta, ama hnabeiseihna liata cha, ama patlô tita khih nata râh châta hmâtlâh châpa, Awnano liata hmâtlâhpa nata mo hropazy châta byhnâ ama châ awpa he ama hnabeiseihna dâh a châ. Thokha he la kaw patlô ei ta, pachâ chhie amâ chhih kaw tyh. MTP he la chi nata pho/râh châta ama sie papua tita, chaihraizy thao thei awpa ta pachâpa châ ei ta, MSO deikua cha Pen hmâpa ta buanazy pathlâ thei awpa ta hnabeiseihpa nama cha.”
“Athaipazy ta ‘Education is all round development’ za tah tyh ei ta, sawhkhâ rai heta eima zydua maniah adaih leipa ta, châthaipa ta la, sawhkhâ rai leipa chhaota nietluana phapa a hnei thei. Tahmâ hlâta eima râh duahmo liata cha, BA degree zy hnei tlôh ta, hmâh phahnai leipa, eikha chhao hmahta rai hia n’awpa châta hmâh leipa he eima hluh ngaita, a pahchaipa ta, civil service exam eikha chhao hmahta a face leipa eima hluh kaw. ADC he Khazohpa ta maniah pie ta, anodeikua, eima zydua ta District Council lia hria khai thei ma pi, nietluana hropazy eima pachâ thai awpa he a peimawh kaw.”
“Eima râh liata a chhiena eima reih nona heta, a phana chhao hluhpi Khazohpa ngiachhiena vâta eima to hra. Civil Service liata eima district tawhta a tlohpa he ama y hôlô hra. Anodeikua la , he hlâta hmahla via’pa a byuh.”
EM chata, “Châ achu pathi ta tiama kawpa ta achu awpa he ei khoh ngaita kaw, tahmâ ta student nahzy nama vâhnei cha tah ei na ta, namâ chuna pachâ peimawh u la, hlaotlohna nama to cheingei aw. Tiama kawpa ta tahmâ ta namâ chunazy he pahnie kawpa ta pahno u la, mylâ hânoh rai nama tluana daihti liata nata Civil Service exam liatazy namâ thôhkhei kaw aw. Cha hleikhô ta, tahmahlâ khizaw hmahsiena liata nâmo la ochhôh tawhta nietluana hnei thei ei chi ta, he hawhpa lâzy he nama pachâna patipavy thai u la, hmeiseihna hneipa ta achu pasia u la, nama niekhi la nama hmô ngâthlâh ha aw,” tahpa ta Awareness programme he athôhkhei kawpa ta hmâh chyu awpa ta students nata rai atlua haipazy khokheina hlâ chyu ei ta, pasyunabie a hlâ chyu ei.
Puhpa Reuben T. Kompa, Dy. Director, District Employment Exchange, Siaha chhaota biereina hnei hra ta, “Atazâ ta eima programme pachhuahpanohpa ta â chhuah chaipa cha, eima district chhôh liata unemployment pachyh ta, rai a hnei mâh leipazy châta lâpi pahmôpa he châ ta, Sawhkhâ rai heta eima zydua maniah a daih leipa ta, private sector liata raihria awpazy eima tlua thai awpa a byuh. Eima office chhôh liata MCC hnei pi ta vaw charei u la, Wi-Fi zy, Coffee machine zy nata atyuna pha kawpazy hnei pi ta, career guidance zy chhao eima pie thei hra,” tahpa ta pasyunabie a reih.
Puhpa NT. Vabeibiehro, Data Operator, DEE chhaota District Employment Exchange office liata ama raihria tlâhpipa reina a hnei hra.
Awareness session he sâ 2 lâta pachhaihpa châ ta, 2nd session liata Career in Sales & its Opportunities’ tahpa biepipa hmâpa châ ta, apachuna he Pihnô Femina Hlychho (Moderator) ta a chhihtha. Puhpa Siabei Solo ta Resource Person châpa ta hmo zuana kyh liata pahno awpazy nata â rypaohnazy pachuna a hnei.
He awareness he Phase sâpalih lâta siekheipa châ ta, topic zy cha – Career in Sales & its Opportunities, Career in Hotel Management & its opportunities, Career in BPO (Call Centre) and its opportunities nata Career in Civil Aviation & its opportunities tahpazy a châ.
Satlia K. Lychhi ta pahnie kawpa ta hlasapa ta zawpi a palôhpahawh.
ISSUED BY:
Information & Publicity Department
Mara Autonomous District Council
Siaha.
