PRESS RELEASE
NO.98/2026
SIAHA, 19 Phiapi, 2026 (Pobiehnoh): Atanoh dawh 11:00 AM pa ta MADC Forest Hall, Siaha liata Special Campaign On Schemes Of NALSA And Capacity Building And Leadership Training For Elected Women Representatives Of Mara Autonomous District Council programme (Jointly Organised by Mizoram State Legal Services Authority & All Mizoram Elected Women Representatives) ahmâhpa châ ta, Puhpa S. Lalremthanga, Dy. CEM, MADC chata Khichhai Laipa (Chief Guest) châpa ta â hmâkhei ei.
Programme he Pihnô R. Zomuanpuii, President, AMEWR’s ta a chhihtha.
Puhpa S. Lalremthanga, Dy. CEM chata, “Atanoh programme a vaw hlao theipa zydua alynabie ei cha hlâ ei. Mizoram State Legal Services Authority nata All Mizoram Elected Women Representatives zy ta he hawhpa programme pha kawpa ama vaw pachhuahpanohpa he aly’pa a châ hmeiseih. Mararâh (Siaha District) liata he hawhpa programme he a ei khana a châ,” a tah.
“India sawhkhâ heta women’s reservation he pachâ peimawh kaw ta, MADC lia chhaota 4 nominated seats liata chanô châta nominated seat sâno y ta, hmâh ngâhaipa a châ hra. MADC area Village council lia chhao chanô châta seat reserve khaipa a châ hra.”
“Atanoh eima râh liata chanô VC nata Chanô VC members zy he khitlâh ta eima pahnaikhei hmeiseih. Chhienoh phanoh daihti lia zy, baongiahpa baona kyh lia zy, MTP liata chanô chhihthatuhpazy, MCHP liata chhihthatuhpazy, VC liata chanô members zy he ama yna khih nata vaih liata apalaikheitlâh ama châ kaw sai.”
“Atanoh ta dâh nata phôh namâ chupa he hmâh phahnai namâ chhuah chyu awpa a châ. Dâh nata phôh pahno leipa ta la, riahphana y thei khao leipa ta, dâh nah phôh a pahnopazy ta cha bo liata châh hawhta dâh ta reih ta, ama tah khiahta la, dâh pahno leipazy ta la, reih awpa pahno khao tyh v’ei. Chavâta sawhkhâ dâh nata phôh pahno he a peimawh ngaita kaw.”
“Achuna he a hawh tu tahpa y thai leipa ta, chavâta atanoh ta dâh na phôh namâ chupa he khitlâh châta hmâh phahnai namâ chhuah chyu awpa a châ. Dâh nama pahno hluh khiahta la nama raihriana liata nama riahpha aw ta, adona pachâ peimawh lymâpa ta khitlâh liata deichhy byuhpazy deichhy ta, reikheituh hnei leipazy reikhei ta, baongiah hialiapazy baokhâtuhpa châ namâ chhuah chyu awpa a châ,” tahpa ta Khichhai Laipa ta pasyunabie pha kawpa reina a hnei.
Puhpa Thomas Lalrammawia, Joint Secretary, Mizoram State Legal Services Authority chhaota biereina hnei hra ta, “Lok Adalat (Zawpi Court) he sôh nah thih a chyh via hryuhpa ta biebuapa aparyhna a châ. Lawyer hmâh byuh leipa ta, biebuana a hneipazy a vy rairie ei ta, ama rairuna nata buana reihpasia ei ta, bieparyhtuhpa (Conciliators) zy ypa ta, âmo heta phahnaingiah kawpa ta biebuapa ama likawh liata ypa cha paryhna rai ama vaw hria tyh,” a tah.
“Chhôhkha nôhrâhpazy ei chi he peimawh kaw ei chi ta, O chhôh liata nama maophaohna â sâh kawpa hawh heta khitlâh nata vaih hmah pasiesa n’awpa kyh liata chhao nama maophaohna â sâh kaw tahpa he nama pahno chanei awpa ta ei reih chanei khoh. Tiama papuapa ta vaih nata khitlâh châta rai nama hria via lymâ awpa ta khokheina ei cha hlâ ei,” tahpa ta Puhpa Thomas Lalrammawia ta pasyunabie pha kawpa a reih.
Laihsa Mimi Rosiamliani, Project Co-Ordinator, SLSA ta Khichhai Laipa hnohta alykheina hmo hlâna a hnei.
Atanoh programme he Mara Chanô Py (MCHP), General Headquarters, Siaha chhihthatuhpazy chhao amâ vaw hlao thei hra.
Puhpa S. Lalremthanga, Dy. CEM he Official lâ tawhta Puhpa Pawsa Lava, Assistant Information & Publicity Officer, MADC nata Puhpa K. Nehemia, Cameraman zy ta ama zi.
ISSUED BY:
Information & Publicity Department
Mara Autonomous District Council
Siaha.
























