PRESS RELEASE
NO.58/2026
SIAHA, 17 Khihpa, 2026 (Chutynoh): Atanoh dawh 01:00 PM khata Forest Hall, MADC, Siaha liata Forest Guard Trainees Convocation Programme ahmâhpa châ ta, Puhpa S. Lalremthanga, Dy. CEM, MADC chata Khichhai Laipa (Chief Guest) châpa ta â hmâkhei ei.
Programme he Puhpa Vabeikhaihmô Solo, CF, MADC ta a chhihtha.
Puhpa S. Lalremthanga, Dy. CEM chata, “Forest Guard training thla thôh chhôh nama hnei khô lâ liata Convocation Day zy hmâh theipa a vaw châpa he aly’pa a châ hmeiseih,” a tah.
“Nama training-na he nama raihriana kyh liata namâ thôkhei kaw nahta ei pangiasa. Reingiah kawpa nata tiama kawpa ta training zy pachâ peimawhpa ta training chhâna taih nama patlôh chyupa vâta, nama zydua hnohta alynabie ei cha hlâ chyu ei.”
“Khizaw he pha khao leipa ta, eima yna râh chhao pha khao hra leipa ta, cha liata a taopathituh chaipa cha Forest Department he nama châ tahpa he nama pahno awpa a châ.”
“Taopathina raihriatuhpa hmeiseih châ ei chi ta, Office staff nama châpa chhaota, Officers nama châpa chhaota, palôhru hmeiseih ta rai nama hria awpa a châ. Atahmâ khizaw liata chyhsa nata Scientists zy ta ama pachâ peimawh chaipa cha Global Warming tah pi ta, Climate Change he USA chhao, Developed Country chhaota ama buakhei chaipa a châ.”
“Mararâh buah kawpa lia chhao heta Sahdô nata Lyu tao n’awpa châ chhaota pha khao leipa, hmâhtlâh châ khao leipa a hluh kaw bâ. Cha taopathina rai cha Forest Department liata â pahnieh tahpa he nama pahno chanei awpa ei khoh kawpa a châ.”
“Nama training-na nama hmâh phahnai nata hmâh phahnai lei cha, kô chhâna lâta â hno aw. Nama training-na he hmâh phahnai namâ chhuah chyu awpa a châ. Forest Department he nama achievement chhao pha kaw ta, eima châ palaikhei kaw. Roadside plantation, etc vaw tao pha kaw ei chi ta, aly’pa a châ hmeiseih. Nama puhpa parohpa vaw pension ha ta, puhpa thiehpa vaw hnei ei chi ta, a parohpa hlâta achievement chhao pha viapa eimâ hnabeiseih kaw.”
“Khâ hlâta cha, su hro lâ Mawrâh lâ sôh hluhpi hryuhpa ta training hnei tyhpa châ ta, tahmâ cha su hro lâ pangai byuh leipa ta he su, eima râh MADC liata Forest Department liata hriapa Officers zy hmâpa ta training hnei theipa a vaw châpa he aly’pa a châ hmeiseih.”
“Khizaw liata Mararâh he, he deita hnei pi ta, chavâta, he râh taopathina rai he kyhpachâna hneina chô nata chhâ vaw y lymâ awpazy pahrâna tlâh ta nama tao awpa he a peimawh ngaita kaw. Khazohpa khozie hawhta rai nama hria lymâ awpa he a peimawh ngaita kaw. Training patlôpa zydua palôh hmeiseih ta châ lykhei ei na ta, pha kawpa ta rai hria chyu awpa ta khokheina ei cha hlâ chyu ei,” tahpa ta Khichhai Laipa ta pasyuna bie pha kawpa a reih.
Forest Guard training 2026 lia heta 21 zy ta training ei ta, ama zydua ta training na liata hlaotlohna ama to khai. Ama hry liata pano ta honours hmô ei ta, cha nahzy cha:
Puhpa K. Ramsiamliana – 1st Rank
Puhpa Thanhrea – 2nd Rank
Puhpa Jimmy N. Ramdina, DCF, MADC & Principal, Forest Guard Training ta result phuana a hnei khai nahta, Khichhai Laipa ta Certificate hlâna a hnei.
Laihsa Clara K. Melita ta pahnie kawpa ta hlasapa ta zawpi a palôhpahawh.
Puhpa Beichatlaisa Azyu, ACF, MADC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
