PRESS RELEASE
NO.21/2026
SIAHA, 20 Hmypi, 2026 (Chutynoh): Puhpa M. Laikaw, Hon’ble CEM, MADC nata a hrialâhpa Puhpa S. Lalremthanga, Dy. CEM, MADC, Puhpa T. Seido, EM i/c Sports, etc., MADC, Puhpa Beihu Nôhro, Deputy Chief Whip, MADC nata Puhpa Viasai Solo, Sr. EE (PHE), Govt. of Mizoram zy ta Tipa khih liata New Light School ama tly.
Puhpa M. Laikaw, Hon’ble CEM, MADC chata, New Light Shool a tlyna liata Awnanopa School a châna hawhta paritheipa nata pa-ôpazypa liata asohsi ta School hawtizy amopâtlâh châ awpa ta pasyu ta, Pachutuhpazy ta paritheipa taopazy cha school hawtizy châta apahniehna tlâh a châ leizie, a reih.
“Oxford, Cambridge nata Kolkata zy tawhta B.A apuapazy pasâhsa kaw tyh pi ta, châhrasala, Awnanopa School tawhta apuapazy chhao he sawhkhâ School tawh apuapazy nahta amâ nanona y lei awpa hawhta hnabeiseihna lai kawpa ei hnei.”
“Awnanopa School eima châna hawhta, eima school hawtizy he ngiapâna kyh lia chhao ta thata deichhy awpa byuh ta, a eih viapa ta High school tawh chhochhi cha paritheipa nata pa-ôpazypa liata thata nama kohki awpa a byuh.”
“Awnanopa School a châna hawhta, â nano viana eima hnei awpa byuh ta, cha liata Middle Level tawh chhochhi cha ama o chhôh liata Devotion zy hnei theina taihta eima pachu awpa byuh ta, su hro lâ tawhta school vaw kiahpazy ama o nata khihzy ama tlôna daihti chhaota, khitlâh Awnanopa liata hmâtlâh châpa ta, Awnanopa school tawh puapa ama châpa â hnona taihta pachuna eima pie awpa a byuh.”
“School lia chhaota music zy nata solfa zy chhao he vaw pachu tyh u la, he he Awnanopa school a châna â lâ n’awpa a châ.”
“Awnanopa School cha school chhôh nata compound zy chhao a pathaih awpa byuh ta, Pachutuhpazy cha paritheipa nata pa-ô pazypa liata nama pathaih awpa a byuh. Pachutuhpa ta paritheipa taopa cha, nâmo lia chhaota pha kawpa ta namâ pasipaao awpa a byuh,” tahpa ta CEM ta pasyunabie pha kawpa a reih.
Puhpa S. Lalremthanga, Dy. CEM, MADC chhaota biereina hnei hra ta, Thlahchhâ tiama kaw hra u la apakhy nata khitlâh liata hmâtlâh châ kaw hra u la, nama pachuna kyh liata diathlâ kaw tlôh u la, School hawtizy chô liata zawngiahna nama hnei tlôh lei khiahta la, cha cha hmo pei kawpa châ ta, School hawtizy chô liata zawngiah thei awpa nata daothei awpa he Khazohpa khozie chhao a châ, tahpa ta Pachutuhpazy hnohta pasyunabie pha kawpa a reih hra.
School Principal Puhpa S. Lalhruaia chhaota alynabie reina a hnei hra.
ISSUED BY:
Information & Publicity Department
Mara Autonomous District Council
Siaha.
