PRESS RELEASE
NO.87/2026
SIAHA, 09 Phiata, 2026 (Chutyhnoh): Atanoh dawh 9:00 AM khata Puhpa M. Chiadung, EM i/c Soil, AH & Vety, MADC chata Siata Khih liata MTP Information Centre pahyna nata 72nd MTP Day Programme â hmâkhei.
Programme he Puhpa Lalduatsanga, President, MTP Branch, Siata ta chhihtha ta, Evan. L. Khailawng ta Abeipa lâta pavaosana thlahchhâna a hnei.
Puhpa M. Chiadung, EM, MADC chata, “Atanoh Siata Khih liata MTP Information Centre pahy awpa ta hruapa ei châpa he ei ly hmeiseih,” a tah.
“Atanoh daihti he daihti sôh kawpa nata daihti peimawh kawpa, ei hrochhôh ta ei my thei lei awpa a châ. MTP Day noh ta MTP Information Centre sa patlôpa vaw châ ta, pahy theipa a vaw châpa he ei ly hmeiseih.”
“He MTP Information Centre sa patlôpa a vaw châ thei n’awpa ta sôh apasaih kawpa ta vaw thyutuhpazy, tha nata zâh hmâpa ta vaw satuhpa zy, sa patlôpa a vaw châ thei n’awpa ta lathli pahsopa hmâh ta, hmah vaw latuhpa zydua hnohta alynabie ei cha hlâ chyu ei.”
“MTP Branch, Siata Chhihtuhpazy, Chhihtuh paropazy he MTP Information Centre sa patlôpa a châ thei n’awpa ta tiama kawpa ta hriatuhpa zydua chô liata alynabie ei reih hmeiseih.”
“He MTP Information Centre he pasô kaw sih la, Khazohpa byhnâ châ ta, Khazohpa ta miah apiepa châ ta, MTP he khitlâh apahniehna châ ta. Rietheipa zy, Hâra Nôhmeizy amâ pahniehna nata thlah amâ palôhna a châ tahpa he ei reih chanei khoh ngaitapa a châ.”
“Khihsa thei kawpa, Hneirôhpa nata dyhchhiepazy pathlua leipa ta rai nama hria lymâ awpa a châ. Chhôhkha khokhei patluana y leipa rai nama hria lymâ awpa ta ei châ haw ei.”
“Uhthei viapa chizana nata reingiahna, Chhihtuhpazy zana, reingiahna lia heta byhnâ chhao a y. Chhihtuhpazy deichhy thaina he a peimawh ngaita kaw.”
“Awnanopa chhihtuhpa zy, NGOs Chhihtuhpa zy, Khitlâh Chhihtuhpazy nama za thai kaw khiahta la khitlâh hmahsiena y lymâ aw ta, Khazoh byhnâ chhao a y hra.”
“Khahlâ via no cha Khichhai Siata khih a vaw tlô hapa Siata khih liata amâ rie tua leipa ta la, ama ngia aryh leipa ta. Atahmâ deikua la Siata khih liata arie awpa he tlaichhai tu khao v’ei. Chavâta, eimâ taopathi awpa he a peimawh ngaita kaw. Chyhsa hropa hmiapasah tua ta, hrâkyu tuapa he Khazoh khozie chhao châ ta, Khazoh byhnâ chhao a y hra.”
“Khizaw hmahsiena he chatlie kaw bâ ta, ataopathi abyuhna liata eimâ taopathi lymâ awpa he a peimawh ngaita kaw. Eima reih he pasô sih la, reih a zakheipa cha Khazohpa a zakheipa ama châ.”
“Paritheipa he khitlâh liata thata â vaw ngia lei n’awpa ta hmahlana pha kawpa hnei ta, paritheipa adyuhna kyh liata tiama nama vaw papua via lymâ awpa ta ei châ haw ei.”
“NGOs â rao khiahta la, khitlâh â rao aw. Adyryh kawpa nata kyhpachâna hnei lymâna chôta hmo eima taona maih kaw liata Khazohpa hmiapasah lymâna chôta raihria lymâ awpa ta ei châ haw ei,” tahpa ta Khichhai Laipa ta pasyunabie pha kawpa reina a hnei.
Puhpa Albert TT. Sachu, MDC, Guest of Honour Puhpa FC. Khihnia, Vice President, MTP HQ, Siaha, Puhpa Hrebi, VCP Siata – I, Puhpa L. Buikhang, First & Former President, MTP Branch, Siata, C. Thadô, Asst. Gen. Secy, MTP Sub-HQ, Chhaolô nata P. Buisingsang, Secretary i/c Art & Culture, MTP Branch, Iana zy ta pasyunabie pha kawpa reina ama hnei hra.
George J. Syrus, Gen. Secretary, MTP Branch, Siata ta Technical Report piena hnei ta, Puhpa C. Daniela, Advisor, MTP Branch, Siata ta vote of thanks reina a hnei.
Puhpa Thychha Chozah, Secretary, Siaha District, BJP, Puhpa Kt. Apaw, Convener, IT& Media, Siaha District, BJP nata Pihnô K. Sangi chhaota Puhpa M. Chiadung, EM he ama zi thei hra.
Puhpa M. Chiadung, EM he Official lâ tawhta Dr. Hc. Joane Mary, Clinical Veterinary Officer, MADC, Puhpa Pawsa Lava, Assistant Information & Publicity Officer, MADC, Puhpa L. Beilychhua, Dy. Ranger, Soil Dept., MADC nata Puhpa K. Nehemia, I&PD, MADC zy ta ama zi.
B. Priskili, J. Vahneisô nata T. Builaisui zy ta pahnie kawpa ta hlasapa ta zawpi ama palôhpahawh.
ISSUED BY:
Information & Publicity Department
Mara Autonomous District Council
Siaha.
