PRESS RELEASE
NO.86/2026
SIAHA, 06 Phiata, 2026 (Hriaheinoh): Atanoh dawh 1:00 PM khata Puhpa T. Seido, EM i/c Sports, etc., MADC chata a Office chhôhpadâh liata Junior National Hockey Player Mara Laihsa T. Ruthi Lallawmzuali D/o. T. Tleikha, Siahatlâh, apakyhna nata thopi dokheina hnei ta baona sôh a hlâ pâ hra.
Programme he Puhpa VT. Martin Vabeiduakhei, Sports Promotion Officer ta a chhihtha.
Puhpa T. Seido, EM, MADC chata, “Junior National Hockey Player Mara Laihsa T. Ruthi Lallawmzuali, Siaha kaw tlô ta ei Office chhôhpadâh liata thopi dokhei thei awpa ta a daihti parua ta programme chynawh kawpa hmâkhei theipa a vaw châpa aly’pa a châ hmeiseih,” a tah.
“Marapa saw tawhta Junior National Hockey Player eima cha hnei thlâhpa he aly kaw na ta, ei châ palaikhei kaw. Chanô tiamapa nata palôh chhyu kawpa na châ nahta ei pangiasa. Tiama papua lymâ la, Hockey Player asâh viapa kaw châ lymâ awpa achhuah lymâ mah y.”
“Mara pasaiphazy he ama riah vaw pha kaw ta, Chakeih zy, Masiah zy abyh ei ta ama ka tyh. Sahrâhpa khana ka awpa ama khoh chai tyh. Cha yzie cha ama palôh kha a vaw pi kawna tahpa â lâ. Chavâta Marapa saw tawhta na vaw pihpa he na vâhnei kaw.”
“Vaw tiama lymâ la, adona nata ngâchhihna hnei lymâna chôta nata thlahchhâ lymâna chôta hmahsie via lymâ achhuahna palôh hnei lymâna chôta Hockey akhaih pazao lymâ awpa ta khokheina ei cha hlâ.”
“Hmopha leipa na kiapâhta liata y ta, na hro a control pahnie kaw la, hmopha leipa tao tlâ lei awpa ta ei cha pasyu. Rairuna nâ vaw tyh hapa chhaota palôh pa down sa n’awpa ta hmâh leipa la, tiama via n’awpa ta na hmâh awpa ta a byuh.”
“Pahmôh chhao he a nô ta a bu liata ahloh pasopa ta cha tawhta a mohôh lymâ. A mathlaw a châ hlâta pazawsa raruah ta, a tla pathla hlâta a patu pakhua tyh. Cha hawhta rough kawpa ta a mohôh tyh. Chahawh pyly hrana chata, rairuna nâ vaw tyh pathleipa chhaota hnabeidyna ta na hmâh lei awpa ta ei cha pasyu,” tahpa ta EM ta pasyunabie pha kawpa a reih.
Mara Laihsa T. Ruthi Lallawmzuali D/o. T. Tleikha, Siahatlâh, kô 18, Junior National Hockey Player he Mawrâh State vyuhpa ta atlyhpapuapa a châ.
Laihsa T. Ruthi Lallawmzuali he Mawrâh State tawhta Players 16 atlyhpapuapa liata Ruthi he â hlao hra. Bangalore NCOE (National Centre of Excellence) liata a y ngâhaipa a châ.
Puhpa Derick Salai Solo, S&YO, MADC, J. Lalzuimawii, President, Siaha District Hockey Association nata Satlia L. Peace Hrathao, Secretary, SDHA, zy ta pasyunabie pha kawpa reina ama hnei hra.
ISSUED BY:
Information & Publicity Department
Mara Autonomous District Council
Siaha.
