PRESS RELEASE
NO.32/2026
SIAHA, 10 Pachawh, 2026 (Chutynoh): Atanoh zâlâ dawh 3:00PM khata RDO Official Chamber (Chhôhpadâh), MADC, Siaha liata Puhpa HC. Beikhai, RDO, MADC Superannuation pension pathliena programme âhmâhpa châ ta, he pathliena programme lia heta Puhpa Beirahmo Syhly, EM i/c RD, MADC ta â hmâkhei ei.
Puhpa HC. Beikhai, Rural Development Officer, MADC he târi 30.04.2026 noh ta a pension aw.
Pathliena programme he Puhpa Rakhu Chozah, AE, MADC ta chhihtha ta, Puhpa KT. Dena, UDC, MADC ta Abeipa lâta pavaosana devotion daihti â hmâh.
Puhpa Beirahmô Syhly, EM, MADC chata, “Puhpa HC. Beikhai, RDO, MADC a vaw pension awpa he vaw i kaw na ta, kao kha lâta atlâhboh kawpa ta a vaw pension theipa he ei lykhei kaw heih. Chyhsa hluhpi sawhkhâ raihria ta, pension kôzy tlô thei leipa ta apahâ hapa hluhpi ama yna hryta, a pension na noh nata daihtizy a vaw tlô theipa he a rônah ta na ta, ei lykhei hmeiseih,” a tah.
“Puhpa HC. Beikhai he chyhsa punctual, strict, sincere kawpa a châ. Chyhsa thokha cha ama pension khai tawhta ama thâtih ama reihpachhuahpa nahthlie khoh chhihlei kawpa a y tyh. Atanoh ta eima pathliepa deikua he la, cha hawhpa cha châ vei.”
“Puhpa HC. Beikhai he Awnanopa lia chhaota chyhsa sincere kawpa a châ. Atanoh ta eima pathliepa he Awnanopa sâkha liata y khohpa châ pi ta, Awnanopa chhaota chyhsa â do kawpa nata ngâchhih kawpa ta eima hmôpa a châ.”
“Hawti viapa hmah châ hr’ei sih la, a mohta EM ei chana lâ tawhta chyhsa thlahsapakhei dâhzy thai kaw ta, mopâtlâh châ kawpa nata manner pahno kawpa a châ. Sapa lâ liata RD Department, MADC liata hriapazy hry liata chiehlei viapa hnâtlâna phalei viapa hawhta azâ la hra sala, Office hours pachâ peimawh kaw ta, chyhsa punctual kawpa nata disciplined kawpa a châ.”
“Keimo a pension mâh leipazy pi, a y chy awpazy pi heta, a hâ ala ta office hours zy pachâ peimawh ta puctual achhuah chyu suh vy.”
“A pension tawh heta chhôhkha châta a daihti he hmâh hluh sala, Awnanopa châta a daihti hmâh hluh sala tahpa ei khokheina ei hlâ,” tahpa ta khokheinabie nata pasyunabie pha kawpa EM ta a reih.
Puhpa HC. Beikhai, RDO chhaota biereina hnei hra ta, “Ei phuhlei kawpa ta ei hrialâhpa nata eima Puhpa EM i/c RD zy chhaota pathliena programme kei châta vaw pachhuahpanoh ei chi ta, hmosai piena, khokheinabie nata alykheina ryuchâ (citation) zy na pie ei chi ta, nama zydua chôlâ liata alynabie reih na ta, ei ly hmeiseih,” a tah.
“Kei he Mawhro khih liata a pihpa châ na ta, kei paw he Mawhro khih liata pachutuhpa raihria ta, kei nô he Mawhro zuah châ ta, unawh pahrawh châ pi ta, chapaw unawh pathôh châ pi ta, sietanô pasari eima hnei.”
“Ei lahpinô he Siaha vaihpi zuah nô châ ta, Abeipa ta saw pacharu miah pie ta, chanô papalih nata chapaw pano, chapaw pakha deikua cha miah â pahâsai haw. Khazohpa ngiachhiena vâta samoh pacharu ei hnei ha hra.”
“Azipa eima châpa pahnopa ta, hriaparaohna pha kawpa hneipa ta, tiama kawpa ta nama hria lymâ awpa ta khokheina ei cha hlâ chyu ei. Khazohpa ta hnatlâhna na pie ta superannuation pension theipa ei vaw châ thlâhpa he ei ly hmeiseih.”
“Mongyuh nah ta “Respect is earned” (Respect comes from what you do, not what you say or who you are) ama tahpa hawhta, tiamana, tao awpa eima ngiatlâh liata âpahniehpazy tiama kawpa ta tao patlô lymâpazy, maophaohnazy pachâ peimawh ta, hlao patloh lymâ, chyhsa ngâchhihpa châpazy he zachhihna cha a châ,” tahpa ta pasyunabie pha kawpa RDO ta a reih.
Puhpa N. Beichhotha, D/A ta hlasapa ta zawpi a palôhpahawh.
Puhpa S. Vahro, H/A ta alynabie reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
Daihti pachhâsa khai tawhta aly kawpa ta zâ pati dôhkhohpa a châ.
ISSUED BY:
Information & Publicity Department
Mara Autonomous District Council
Siaha.
