PRESS RELEASE
NO.31/2026
AIZAWL, 1 Pachawh, 2026 (Pakhynoh): Zâhnia târi 31.03.2026 khata MZU Auditorium, Tanhril, Aizawl liata Lyuva Khutla 2026 âhmâhpa châ ta, Puhpa M. Laikaw, Hon’ble CEM, MADC chata Azipa châpa ta a hmâkhei ei.
Lyuva Khutla 2026 Biepipa châta “Chi nata pho thapasana” tahpa hmâpa a châ.
Laihsa K. Ngôrili nata Laihsa Sharon K. Vahneiki zy ta chhihtuhpa (comperes) châpa ta pahnie kawpa ta programme ama chhihtha.
Programme he chhaihno lâta pachhaihpa châ ta, daihti â thaona lâ liata Rev. S. Beizawzi ta Abeipa lâta pavaosana thlahchhâna a hnei.
Pahyna hla (Pho hla) he MADC Girl’s Hostel, Chawlhhmun zy ta pahnie kawpa ta ama paryh.
Prof. Bobby Beingachhi, Chairman, MCA ta welcome speech reina a hnei.
Lyuva Khutla programme âhmâhna lia heta Laihsa Elsa Byhnapaw Chozah (MIS), Chhaolô khih puapa cha alykheina châta Ryuchâ hlâpa cha ta, Ryuchâ (Citation) he Prof. K. Robin, Adviser, MWCA ta a hlâ.
Puhpa M. Laikaw, Hon’ble CEM, MADC chata, “Marasaw su to liata ypazy he su tawh heta Lyuva Khutla samaw ei cha hlâ ei. Lyuva Khutla programme pachhuahpanohtuhpa Mara Welfare Committee, Aizawl zy ta Azipa châ awpa ta nama khokheina patosapa vaw châ na ta palôh hmeiseih ta alynabie ei cha hlâ ei,” a tah.
“Lyuva Khutla chaypi he District Council chhaota papeimawhsa ta Official Festival ta phuah ta, âhmâh tyhpa a châ. Lyuva Khutla noh heta eimâ tobina dress zy ta a vaw tobi pi ta, eima culture, eima lâ, etc eima pabohsa lymâ awpa he a za peimawh ngaita kaw.”
“Aizawl Mara Church liata apakhy na ta, eima reih Mara reih ta, hlasa pi ta, eima reih ta Khazohpa lâ liata thlahchhâpa ta eima khopazy hiah pi ta, tlôkhei pi ta, eima reih cheingei ta Khazohpa eima reithaipa he Khazohpa chhao â ly kaw nahta ei pangiasa.”
“Khazohpa ta reih miah pie ta, atobina anoeih ta miah pie heih ta, eima reih Mara reih hmâpa ta bie reih pi ta, Mara atobina ta atobi pi ta, Hlasa thaipazy ta Khazohpa ta reih miah piepa Mara hla cheingei vaw sa ei ta, Lyuva Khutla eimâ hmâhpa he Khazohpa chhao â ly kaw nahta ei pangiasa.”
“Nôhmei nô heta a khihsana rairu tu vâta mara atobina origin a hneipa kha zua khoh sala, Art & Culture Department, MADC lâ avykhei sa la, eima chaleipa lymâ aw. Khazohpa ta Missionary hmâpa ta Mara chi nah pho miah aw papua ha ta, Khazohpa ta Mara Identity pabohsa n’awpa ta reih miah pie ta, District council ryureina eihrâhpa miah pie ta, Biehrai miah pie ta, chhaichhi â ki kawpa ta miah a pie khai haw. Eima palaiseihsa lymâ awpa he a peimawh ngaita kaw.”
“Notlâ Mara liata Khazohpa ta reih pangawh miah pie ta, common language châta Tlôsaih reih miah pie ta, Mawnah hlâta Bible hnei tua ha pi ta, ropa ta, he chi nah pho cha eima reih ta Khazohpa reithai thei ha pi ta, eima identity a pahnopasiapa châta la Khazohpa arâsai thai’pa châ ma pi.”
“Khazohpa ta Mara sawzy pi chi nah pho ta miah padua ta, cha liata, Khazohpa eimâ râsai hapa a châ khiahta la, chyhsa pitlohpa châ thei khao va na tahpa he thyutliapazy ta nama pahno awpa he a peimawh ngaita kaw.”
“Lyuva Khutla 2026 Biepipa châta “Chi nata pho thapasana” tahpa hmâpa vaw châ ta, he biepipa namâ vaw tlyhpa he pha ta namâ tlyh thai hmeiseih.”
“Marapa châ chi ta, khazia vâta ma, na ochhôh liata reih hropa nama hmâh thlâh haw. Eima ochhôh lia heta eima reih he eima pabohsa khao ma? duah alaichadai tua suh u. He su liata avypakhy pi ta, Mara reih cheih pi ta, Mara hla sa pi ta, lâh pi ta, na ochhôh liata na reih na pabohsa ma? Ahiahri chyu u la, Bible hmâpa ta na ochhôh tawhta Mara reih ta Khazohpa na aw sao thei ma? Mara hla ta Khazohpa na palyupalih thei khao ma?”
“Bieso liata Meihli ta na Opi a kâ e, a tah. Hmo chynawhpa liata pei bao vei, pei bao vei kaw tah laih lymâpa liana heta hmo peipa a kaw pua ha tyh. Eima châna pahno sih la, eima châna pabohsa sih la, cha chana thapasana chuh.”
“Mara reih lei ngâ kaw sa la, tha pasana eima hnei vei khiahta la cha chana leina â thaona châ chuh. Papeipahliasa leipa hmo lia heta ly, hmo pei kawpa a y ha tyh. Hawtizy ochhôh liata Mawreih ama cheih hluhpazy he a vaw pei kaw.”
“Reih thai hluhpa cha a pha, anodeikua, papeipahliasa leina lia heta tlaichâna y ta, Marapa nata Marapa liazy la, hawti hra khia, pitlohpa hra khiah mawreih cheih ngâ kaw byuh vei. Tlaichâna heta hro liata laiseih ta, su hro râh hro lâ ama sie nahta, ano reih cheihpa hlâta, ano ta achei anaokhei viapa reih hropa kha acheih hluh via thla ha tyh.”
“Siaha lia hmahta cha hawhta reih liata eimâ sohsi leipa pi ta, ochhôh liata marapa ochhôh lia chhaota mawreih a hluh kaw khiahta la, Aizawl lia chhochhi cha nama sohsi kaw awpa a byuh,” tahpa ta Azipa ta pasyunabie pha kawpa a reih.
Laihsa Zine P. Fachhai ta pahnie kawpa ta Lyuva khutla hla sapa ta zawpi a palôhpahawh.
MTP Sub. Hqrs. Zyhno Cultural Troupe zy ta Pho lâ â ngia kawpa ta ama lâh. Lunaris (Hawtizy) ta lâ â ngia kawpa ta ama lâh hra.
Puhpa James Miahlung, M.C.S chhaota pasyunabie pha kawpa reina a hnei hra. Puhpa KT. Rokhaw, Adviser, MWCA chhaota pasyunabie pha kawpa reina a hnei hra.
Lyuva Khutla 2026 liata Chhivaw châta Ls. Mandy atlyhpa châ ta, Khydi châta St. Thaisa a châ.
Saliah Beipaw : Moses Beirona Nôhro
Best costume Nôhrâhpa liata Pihnô Devora (Laichhua nô).
Best costume Pâwhrâhpa : Pupa PP. Thawla
Saliah Beinô : Gloria Z Nophazi.
Judges nahzy cha:
- Pihnô Christine Nana W/o Er. A. Chhalai
- Pihnô Caroline Hlychho W/o Prof. Dr. K. Robin
- Pihnô K. Minuti
- Pihnô JV. Ngongia zy ama châ. Huasua daihti âhmâhna liata Ls. Jessica Hc. Ngody, St. B. Lalthachianga, Ls. Pricilla Nôtlia, St. NT. Vabeido, St. Domi, Ls. Fc. Nipari zy ta pahnie kawpa ta hlasapa ta zawpi ama palôhpahawh.
Daihti chhâna lâ liata Puhpa L. Beihrohmo, Asst. Secy., MWCA ta alynabie reina a hnei.
Programme a chhâ khai tawhta aly kawpa ta kyhchhina pati dôhkhohpa a châ.
Lyuva Khutla 2026 he Mara Welfare Committee, Aizawl zy ta ama pachhuahpanohpa (organised) pa a châ.
ISSUED BY:
Information & Publicity Department
Mara Autonomous District Council
Siaha.
