PRESS RELEASE
NO.25/2026
SIAHA, 16 Pamih, 2026 (Hriatuanoh): Atanoh my dawh 11:00 PM khata Board of Mara Literature (BML) pachhuahpanohpa 1st Mara Literature Day 2026 Programme cha MADC Golden Jubilee Hall, Siaha liata âhmâhpa châ ta, Puhpa M. Laikaw, Hon’ble Chief Executive Member, MADC chata Khichhai Laipa châpa ta a hmâkhei ei.
Programme he Puhpa K. Beingiachhie, Secretary, BML & Sr. EO (M/S), MADC ta chhihtha ta, Rev. K. Laichhua Azyu, Senior Executive Secretary, ECM Assembly ta Abeipa lâta pavaosana devotion daihti â hmâh.
Atanoh 1st Mara Literature Day 2026 â hmâna Programme lia heta Puhpa M. Laikaw, Hon’ble CEM, MADC ta Rev. RA. Lorrain cha Father of Mara Literature ta a phuah.
Puhpa M. Laikaw, Hon’ble CEM chata, “Atanoh 1st Mara Literature Day eimâ vaw hmâh theipa he aly’pa châ hmeiseih ta, Mara chipho châta cha noh ngiatlâh châ kawpa a châ. Rev. RA. Lorrain he first Lakher Pioneer Mission châ ta, Kheihawhpa Awnanopa hmahta sponsor leipa independent kawpa ta Missionary raihriapa a châ.” a tah.
“Rev. RA. Lorrain he kô 1907 ta Saikao kaw tlô ta, ama thina taihta eima Beipa Zisu Krista â vy heihna hâpa ta Mara leilô liata apabupa ta a y thlâh hapa a châ. Thâtihpha chho awpa ta â vy ta, Biehrai nata Hlabuzy miah taopa ta, Grammar buzy taih miah a taopa.”
“Notlâ Mararâh lia heta reih sâpangawh y ta, Nochhi Mararâh liata cha a hluh via a y. Eima Missionary zy chhihthana ry liata common language châta Tlôsaih reih he hmâpa a vaw châ. Eima Missionary zy vâ deita ta eima reih ta Biehrai hnei pi ta, eima reih ta Hlabu hnei pi ta, eima reih ta Khazohpa eima reithai theipa a vaw châ.”
“Rev. RA. Lorrain heta Krizyhpa Chiahmie tahpa Magazine, etc zy Mara reih ta miah taopa ta, tahmâ taihta papua pazao lymâpa a vaw châ. Eima Missionary zy heta eima reih Mara reih ta Biehrai nata Hlabu zy miah taopa tlâ leipa vaw châ sa la, eima chipho he a lei thlâh ha thlyu na tahpa he ei pachâ tyh.”
“Tlôsaih reih he common language ta hmâpa châ leipa sa la, eima reih chyu palaiseihsa achhuah chyu pi ta, apôhkhana y leip’aw ta, ahiezâhpa ta y pi ta, District Council chhao eima hmô nahta pangiasa achhih vei. He chi nah pho chhao â duah hr’aw vei.”
“Khazohpa ta Missionary zy hmâpa ta Literature miah pie ta, chavâta Mara reih he pasô ta, chei hluh ta, roh hluh ta, châbuzy papua hluh ta, Mara Literature he pabohsa ta, eima palaiseihsa lymâ awpa he a peimawh ngaita kaw. Chhâ vaw aw lymâ awpa liata zikyu eimâ râ lymâ awpa he a peimawh ngaita kaw.”
“Mara sawzy foreign liata ypa nata chi hro pho hro a hnei hapazy nata Aizawl liata ypa Mara reih cheih khao leipazy Marapa pakhazie ma y aw ei tly tahpazy ei za pachâ tyh. Marapa châ thlâh tlôh ta, ama chhôhkha liata Mara reih a cheih khao leipa Mara reih a thi hapazy ei za pachâ nahta, pei ei za tah kaw tyh.”
“Mararâh Siaha District liata ypazy pi he, eima ochhôh liata Mara reih he eima cheih hluh ma? Mara reih he eima pabohsa tlai ma tahpa he eimâ zâ moh pasia awpa he a peimawh ngaita kaw.”
“Eima râh liata Mawreih cheihpazy ta ama reih ta Achhyna O liata Khazohpa reithai ei ta, a peina y vei. Anodeikua la, Marapa Mara reih acheihpa ta Mawreih service liata kaw y hra ta Mawreih sai ta Khazohpa bie reih ta, Maw hla sai kaw sa ta, Ochhôh Devotion liazy taih Mawreih sai cheihpa he, Mara reih pabohsana kyh liata a vaw pha lei kaw. Marapa châ tlôh ta, Mara reih ta Bâti achâ ta, thih noh daihti liazy taihta Mawreih ta apabupa he a vaw pha lei kaw.”
“Mara reih he pasô bâ sih la, zakhei leipa ta, cheih hluh sih la, roh thai achhuah chyu sih la, Mara reih ta châbuzy papua hluh sih la, Mara Literature hmah pasiesa lymâ suh vy,” tahpa ta CEM ta pasyunabie pha kawpa a reih.
Puhpa MH. Tiabi, Chairman, BML & EM i/c M/S, MADC chhaota biereina hnei hra ta, Mara reih pasô ta, pachâ peimawh ta, cheih hluh ta, a ro chhao thai lymâ achhuah awpa a peimawhzie reih ta, Mara reih eima cheih vâ deita ta District Council a hmôpa eima châzie a reih.
EM chata, “BIEPHUAH 7:9 liata “Cha hnôhlâ ta kaw moh na ta, râh to, chi to, phopi to nata reih to tawhta zawpi hluh ngaitapa, ahy hmahta reitiah leipazy cha poh diehpa abupa nata thiahrâ kuah chabapa ta, beidyuchhai hmiakô liata nata Mietakutaw hmiakô liata amâ duapa hmô na ta,” a tahpa hawhta khizaw liata hmo a kheihawhpa hmahta, vârâh kiakhei thei awpa y leipa ta, eima reih deita he Vârâh eima kiakhei theipa a châzie reih ta, eima reih Mara reih pasô ta, cheih hluh ta, roh thai awpa a peimawhzie, a reih.
Puhpa Benjamin F. Nôhro ta Mara reihchâ hmahsiena tahpa paper presentation a hnei.
MTP Branch, Meisavaih West, Siaha zy ta opening song ângia kawpa ta ama paryh. HC. Felyna Rosengia ta hlaphôh ângia kawpa reina hnei ta, Laihsa HC. Teresa Ngianô nata Laihsa Pricilla Nôtlia zy ta pahnie kawpa ta hlasapa ta zawpi ama palôhpahawh.
Phôhpa aropasuana result phuahna he Puhpa L. Beimokhai ta phuahna hnei ta, he a ry liata moh palâsapazy he lymâ daotuhpazy ama châ:
- Ng. Beirahrongia, Chhaolô (First Prize daotuhpa)
- Marvas TT. Beihrongia, Châkhei (Second Prize daotuhpa)
- Mara Sikusa Khithie, Saikao (Third Prize daotuhpa).
Consolation prize daotuhpazy:
- L. Sachhua, Chhaolô
- S. Beihmotaothei, Theivâ
- FC. Beingarili, College Vaih, Siaha.
Rev. A.Z. Beirakaw, Executive Secretary (Social Mission & Development), ECM Assembly ta byhnâ awna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
