PRESS RELEASE
NO.24/2026
SIAHA, 13 Pamih, 2026 (Chutynoh): Atanoh zâlâ dawh 2:00 PM khata Siaha Meisatlâh Laikathi liata MADC AH & Vety Staff Quarter pahyna programme âhmâhpa châ ta, Puhpa M. Chiadung, EM i/c Vety, MADC ta a pahy.
Pahyna programme he Dr. Beizakaw Vyhtu, Sr. V.O, MADC ta chhihtha ta, Puhpa A. Hiasa, UDC, Vety Department, MADC ta Abeipa lâta pavaosana thlahchhâna a hnei.
Puhpa M. Chiadung, EM, MADC chata, “MADC liata EM ei vaw châ tawhta kô kha nata â khophie rachhôh vaw châ ta, cha liata he hawhpa programme pha kawpa nata rônah kawpa liata ei vaw hlao theipa he aly kaw na ta, achievement sâkha hawhta pachâ na ta ei ly hmeiseih,” a tah.
“MADC 12th Term eima vaw sie tawh heta Puhpa M. Laikaw, CEM chhihthana ry lia heta District Council heta hmahsiena hluhpi vaw hnei pi ta, achievement chhao hluh kaw ta, keimo AH & Vety Department chhao sôh nah thih a rairu thlâ bao nahta he hawhpa Staff Quarter he eima hnei thei nahta pangiasa leipa na ta, eima Officers nata Staff zy tiamana nata hriapasana zawhzi ta he hawhpa Staff Quarter zy eima vaw hnei theipa he aly kaw na ta, nama zydua chô lâ liata alynabie ei reih hmeiseih.”
“AH & Vety hmah a sie via lymâ thei n’awpa ta eima theina zydua papuapa nata Mawrâh sawhkhâ, Central sawhkhâ, eima CEM nata eima MLA-zy chhao reikheipa ta hmahla ngâhaipa a châ.”
“He su liata sahroh mohôhtuhpazy sahroh nama mohôhna kyh liata tiama papua ta, sahroh kyhpachâ kawna chôta nama mohôh lymâ awpa he a peimawh ngaita kaw. Sahrohzy he pasa theipa nata hri-iah ala theipa châ ei ta, chavâta, nâmo kyh namâ pachâpa hawhta sahrohzy kyh nama pachâ awpa a châ.”
“Eima zydua ta Department sâkha liata ykhohpa châ pi ta, family sâkha liata ykhohpa hawh châ pi ta, rairuna namâ tyhpa chhaota apahnosa lymâ pi ta, eimâ bao theina liata eimâ bao lymâ aw,” tahpa ta EM ta pasyunabie pha kawpa a reih.
Puhpa M. Chiadung, EM, MADC ta AH & Vety labour-zy hry liata raihria tiama viapa pano hnohta lymâ raina a hnei. Lymâ daotuhpazy cha:
- Puhpa Hasda, Labour.
- Puhpa Beichakao, Labour zy ama châ.
Puhpa Beitu Solo ta report piena a hnei.
Puhpa M. Chiadung, EM he Official lâ tawhta Puhpa Pawsa Lava, Asst. I&PO, MADC, Puhpa T. Pabua, I&PD, MADC nata Puhpa K. Nehemia, I&PD, MADC zy ta ama zi.
Dr. HC. Joane Mary, CVO, MADC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
Daihti pachhâsa khai tawhta aly kawpa ta refreshment pahâh kawpa niekhohpa a châ.
ISSUED BY:
Information & Publicity Department
Mara Autonomous District Council
Siaha.
