PRESS RELEASE
NO.15/2026
SIAHA, 11 Hmypi, 2026 (Pakhynoh): Atanoh zâlâ dawh 1:00 PM khata MYA Multipurpose Hall, New Siaha liata Akashvani (CRS) Siaha pachhuahpanohpa Odôh Ku (Mara Festival) âhmâhpa châ ta, Puhpa S. Lalremthanga, Hon’ble Dy. CEM, MADC chata Khichhai Laipa (Chief Guest) châpa ta programme â hmâkhei ei.
Programme he Puhpa Zôkhai Khuhly ta chhihtha ta, Rev. VL. Ngaia Hlychho ta Abeipa lâta pavaosana devotion daihti â hmâh. Pihnô Rosepawngia Hlychho nata Laihsa S. Byhnazi zy ta programme he pahnie kawpa ta ama host.
Khichhai Laipa (Chief Guest) Puhpa S. Lalremthanga, Hon’ble Dy. CEM, MADC chata, “Atahmâhlâ Mara Thyutliapazy ta nama pahno khao leipa Apalypauasana Ku Odôh Ku (Mara Festival) Akashvani (CRS) Siaha zy ta vaw pachhuahpanoh ei ta, he programme ahmâh thei awpa a vaw châ thlâhpa he aly’pa a châ hmeiseih,” a tah.
“He Odôh Ku he mahnô mahpaw daihti tawhta Thyutliapazy châta apalypauasana châta ama vaw hmâh tyhpa a châ. Thyutliapazy heta khih kha liata khihsa thei viapazy O pangaipa ta ama ochhizy chakhyhpa ta “Nôhrâh nô y Ochhi miah kaw pahypa ly” tahpa ta awsao ei ta, O hneituhpazy ta ama paryhsapa a châ khiahta la, Ochhizy kaw pahypa ta nata vaozy thie ei ta, niebaw hluhpi nata sahmazy chhaota aly kawpa ta azozâkhihdei he Odôh Ku he aly kawpa ta amâ hmâh tyh.”
“He programme ahlao awpa ta Aizawl, Lôlei, Champhai, Tipa tawhzy ta a kaw hlao thei ei chi ta, aly’pa a châ hmeiseih. Eima raihriana kyh liata tiama papua lyma sih la, a kheihawhpa su lia rai miah soh hra ei sa la, zawpi châta hriapa eima châpa he my leipa ta tiama kawpa nata aly kawpa ta eima hria lymâ awpa he a peimawh ngaita kaw.”
“Keimo Primary, Middle nata High School eima kia nota la, Sawlakia nata lâ chi nano nanopa period sâkha chhôh eimâ chu tyh. Atahmâ cha khahawhpa kha y khao leipa ta, anodeikua cha, MADC ta eima mohôhpa Elementary School lia heta la tao heih eimâ chhuah. Chavâta, he eima pho lâ Khazohpa ta miah a piepa he pasô ta, Thyutliapazy ta lâh thai namâ chhuah lymâ awpa he a peimawh ngaita kaw,” tahpa ta Dy. CEM ta pasyunabie pha kawpa a reih.
Guest of Honour Puhpa D.R. Lalropuia, (IBES) Director (E) & Cluster Head chata, “All Indio Radio Siaha, Akashvani (CRS) Siaha eima tahpa he kô 2000 tawhta operational pa kha vaw châ ta, MADC ta land lease (building) chhao miah pahmâsapa kha châ ta, chavâta, MADC he a vaw peimawh hmeiseih,” a tah.
“Aksahvani (CRS) Siaha he tahmâ cha nama Radio Programme zy YouTube tawhzy ta vaw live thei ha bâ ei chi ta, aly’pa a châ hmeiseih. Aizawl nata Lôlei hlâ chhaota viewers hnei hluh via ei chi ta, nama hriaparaohna a pha tahpa he tawhta â lâ, nama taopha hmeiseih.”
“Khizawh hmahsie lymâpa lia heta eima culture nata tradition zy hmahsie sai tlamaw lahpi tahpa he hmo chichhih chaipa a châ. Chavâta, eima cultute nata tradition zy pasô ta, hmah pasiesatuhpa eima châ lymâ awpa he a peimawh ngaita kaw.”
“Reih hmâh pado he peimawh kaw ta, â do thlâhpazy he â do lei via khiah ma, tah awpa heta vaw y khai ha bâ ta. Reih do leipa hmâpa he pôh chatlie kaw ta, he he kheihta ma hmah eima la aw tahpazy he eima pachâ peimawh awpa a byuh kaw. Thyutliapazy ta a padotuhpa châ eimâ chhuah chyu awpa he a peimawh ngaita kaw.”
“India he World Largest Economies liata sâpalihna kaw châ ha hra tlôh GDP Growth Rate chhao asâh kaw tlôh, Khâpa vâta ma developed nation eima châ thei vei eima tah khiahta la, developed nation he râh 37 y ta, chahry liata India he a hlao thei vei. Developed Country liata la chyhsa ama hrohpareih. India chyhsazy eima hrohpareih leina he developed country eima châ thei leina cha a châ. He hawhta reih sih la, eima lâthlôh a chhie kaw khiahta la, hmahsiena y thei vei, hrohpareihna chhao y thei hra vei.”
“Motor a pua thiehpa a phazie, a part chi to rai thâtih pahno thei kaw tlôh ta, chahrâsala, eima pôhpa liata thisaih reading chhao pahnopasia lei, Motor nata scooty meter reading pahno thei kaw tlôh, eima thisaih reading chhao pahnopasia leipa eima hluhtu vâ heta eikhapi ta thipa ama hluh ngâsâ. Eima pôhpa reading eima pahnopasia kaw khiahta la, eikhapi ta thina he eima khôkhâh thei lymâ aw. Prevention is better than cure tahpa he eima pachâ peimawh kaw awpa he a byuh.”
“Developed Country lia heta la ama pôhpa reading ama pahno kaw vâ heta, ama hrohpareihna, ama life expectancy he kô 80 to 86 châ ta, India liata hrohpareihna life expectancy cha kô 72.1 a châ, â hlie kaw. Mizoram (Mawrâh) liata chapaw hrohpareihna life expectancy he kô 66 châ ta, chanô he kô 81 ama châ. Mawrâh lia heta chapaw heta hmo pha leipa eima tao hluh tahna châ ta, eimâ mohpasia awpa he a peimawh ngaita kaw,” tahpa ta ta Guest of Honour ta pasyunabie pha kawpa a reih.
Puhpa Lalrinpuia, LAH ta Introductory speech reina hnei ta, Laihsa Jenny Lalrinpuii ta pahnie kawpa ta hlasapa ta zawpi a palôhpahawh.
MTP Branch, New Colony zy ta Awhkhypa lâ â ngia kawpa ta lâh ei ta, MTP Branch, Siahatlâh zy ta hla â ngia kawpa ama paryh.
Odôh Ku (Mara Festival) Programme he PWD, MADC Siaha, LAD, MADC Siaha nata Sangpuia Electrical Store, New Colony, Siaha zy ta ama sponsor.
ISSUED BY:
Information & Publicity Department
Mara Autonomous District Council
Siaha.
