PRESS RELEASE
NO.12/2026
SIAHA, 06 Hmypi, 2026 (Chutynoh): Atanoh zâlâ dawh 12:30 PM khata Puhpa M. Laikaw, Hon’ble CEM, MADC ta Pala Tipo View Point Complex nata Cormorant Cottage pahy ta, Puhpa Tiahlei Syuhlo, EM i/c Forest, MADC ta Egret Cottage a pahy pâ hra.
Pala Tipo View Point Complex pahyna programme he Puhpa T. Beihronga, DCF (W&P), MADC ta chhihtha ta, Rev. Joseph Koma Chozah, AS & Phura Pastor bia Biatuhpa ta Abeipa lâta pavaosana devotion daihti â hmâh.
Puhpa M. Laikaw, Hon’ble CEM, MADC chata, “Atanoh programme avaw hlao theipa zydua MADC vyuhpa ta samaw ei cha hlâ ei. Atanoh he noh ngiatlâh châ kawpa a châpa ta pahno na ta, Mawrâh liata Tipo lai chaipa he Mawnah ta cha kha hlâ ta, Ridil châ ta Burma râh liata na a y e, tah ei ta. Eima Pala Tipo he pahno za hlao tu leipa ta, atanoh cha Mawrâh zawpi zydua chhaota Mawrâh liata Tipo lai chaipa cha Pala Tipo na a châ e, tahpa vaw châ ha bâ ta, Forest Department zy ta vaw mohôh lymâ ei ta, aly’pa a châ hmeiseih,” a tah.
“Puhpa Tiahlei Syuhlo, EM (Forest) nata a tliata liata vaw pension hapa Puhpa Thaly T. Azyu, Conservator of Forest (Rtd.) nata ama nawhtazy ta vaw mohôh lymâ ei ta, chadei châ leipa ta, Pala Tipo View Point Complex nata a chheipâhta liata tlôkia n’awpa Cottage zy vaw sa pâ heih ei ta, aly âchhih hmeiseih.”
“Foreign râh â hlapi tawhta hmahta Pala Tipo moh awpa ta tourist zy avy ei sala nata a khohpa mai châta tlô theina, arie theina Forest Rest House nata Cottage a ypa he a rônah tah na ta, cha liata, kei a pahytuhpa ei vaw châpa he vâhnei â tah na ta, ei ly hmeiseih.”
“Puhpa Thaly T. Azyu a vaw pension ha tarawpa ta ano a tiamana nata hriapasana nata hniehnôh sai vaw châ ta, ano heta cottage he pahy sala tahpazy khoh pi ta, anodeikua, a saw châ achuna lâ pathlie a vaw byuh hapa vâta miah a vaw hlao thei khao leipa ta, eimâ ly kaw taraw nota, eimâ lyna a ki thei vei.”
“Tahmâ Pala Tipo cha Ramsar site ta phuah hapa châ ta, tlytuhpa a vaw hnei hluh via lymâ aw. Marasaw châta Pala Tipo he ryusôh kawpa a vaw châ. Pala Tipo chheipâh liata pavaw, pazu, hmohrohhneipa, etc zy he eima pabohsa lymâ awpa he a peimawh ngaita kaw.”
“Palo Tipo chheipâh liata ypazy ta râhhmâh pabohsapa zy, pavaw pazu, etc pabohsapa he eima maophaohna na a châ e, tahpa he eima pahno chyu awpa a byuh. Pala Tipo he khizaw ta Ramsar site ta a phuah ha tawhta cha, eima mohôh pha kaw awpa a byuh tahpa pahnopa ta Mara zawpi eimâ hrua chanei,” tahpa ta CEM ta pasyunabie pha kawpa a reih.
Puhpa Tiahlei Syuhlo, EM (Forest) chhaota biereina hnei hra ta, “He Pala Tipo View Point liata Cottage sa awpa heta ano eihta ta fund y leipa ta, sôh head a y lei tarawpa ta sôh parai laihpa ta sapa châ ta, Puhpa Thaly T. Azyu, CF (Rtd.) tiamana nata hriapasana zawhzi ta vaw patlô theipa châ ta, atanoh ano miah ahlao thei leipa ta y hra sala, a chô liata alynabie eima reih hmeiseih,” a tah.
“Pala Tipo chheipâh liata pahrâpazy ta Râhsa, Pavaw, Pazu, etc nata râh pabohsana kyh liata tiama nama papua via lymâ awpa he a peimawh ngaita kaw,” tahpa ta pasyunabie pha kawpa EM ta a reih.
Puhpa M. Laikaw, Hon’ble CEM he Pihnô A. Nelly, MDC & Vice President, BJP Siaha District, Puhpa NT. Thatlua, Ex-MDC & President, BJP Minority Morcha, Puhpa H. Beitlolai, Secretary, BJP Siaha District, Puhpa Pawsa Lava, Asst. I&PO, MADC, Puhpa M. Baithai, Chhim Aw Editor, Puhpa M. Kaleba (Hana Paw), Pala nata Puhpa Martin L. Hlychho zy ta ama zi.
Atanoh programme a hmahna lia heta MTP Branch, Tôkalô zy ta Opening song ângia kawpa ta ama paryh.
Pihnô T. Merisa, Laihsa Teresa Ngiano Hlychho nata Laihsa Chhingpuii Azyu zy ta pahnie kawpa ta hlasapa ta zawpi ama palôhpahawh.
Puhpa NT. Beithlapalo, Forest Range Officer (S), MADC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
