PRESS RELEASE
NO.148/2025
SIAHA, 12 Di, 2025 (Chutynoh): Atanoh dawh 1: 00 PM khata MADC Golden Jubilee Hall, Siaha liata Mara Hlasa Py Gen. HQ Siaha nata Art & Culture Department MADC Siaha pachhuahpanohpa Hla phi Ataopasuana Result phuahna programme liata Puhpa M. Laikaw, Hon’ble Chief Executive Member, MADC chata khichhai laipa (Chief Guest) châpa ta â hmâkhei ei.
Programme he Puhpa John Beizachhi Phuto, President, MHP ta chhihtha ta, Satlia MC. Beihrohmô, Finance Secretary, ECM KTP HQ ta Abeipa lâta pavaosana devotion daihti â hmâh.
Puhpa M. Laikaw, Hon’ble CEM chata, “Atanoh ta programme he programme peimawh kawpa châ ta, MHP chhihtuhpazy, programme avaw hlaopa zydua alynabie ei cha hlâ ei.”
“Atanoh programme he member chyhta ta apahmaohpakhypa hmah châhrasala, atanoh hawhpa programme zy, atanoh hawhta Mara reih ta bie reih pi ta, hla hlasapa zy, Mara chi nata pho, he vâ heta eima District Council eima hmôpa na a châ e tahpa he a thiehpa ta atanoh he su liata â vypa nata â vy leipa chhaota eima pahno awpa he a peimawh ngaita kaw.”
“District Council a y chhâpa he Art & Culture Department vâ a châ tahpa he eima pahno awpa a peimawh ngaita kaw. Atanoh râh hro lâ tawhta research vaw tao ei sa la, Mara reih he eima chi nata pho reih châ ta, eima museum zy moh ei ta, kha hlâ tawhta Mara eima thyutôna khâpa ma a châ, ama reih he kheihta ma châ ta tahpa ta eima identity miah ama study khiahta cha Art & Culture Department tawhta miah amâ ngiahnao awpa a châ.”
“Atahmâ sawhkhâna heta Customary Law pachâ peimawh kaw ta, chavâta Customary Law tao pâ pi ta, release hapa a châ. Marriage & Divorce Act chhao tao hapa châ ta, hmâh theipa a châ ha hra. Eima chi nah pho â boh lymâ thei n’awpa ta eima hmâh lymâ awpa he a peimawh ngaita kaw.”
“Eima chi nah pho pabohsa lymâ awpa heta, Mara reih eima cheih hluh via lymâ awpa byuh ta, Mara hla eima sa hluh via lymâ awpa byuh ta, Mara reih ta châ eima roh hluh via lymâ awpa byuh ta, Mara reih ta châbu chhao eima papua hluh via lymâ awpa a byuh.”
“Art & Culture nata Law & Judicial he ei pachâ peimawh kawpa Department a châ. CEM ei vaw châ khiahta la he Department sânopa he la pathlie vâ na ei tah tyhpa a châ. Mara pho hla chhao azâ tlyh ha pi ta, aly’pa a châ hmeiseih. Central minister a vaw tlô no chhaota Indian national anthem ta pathao pi ta Mara pho hla ta pazao pi ta, a chhâna chhao Mara pho hla ta eima pachhâsa.”
“Eima chysia chhao yzie hnei via ta tao eimâ chhuah lymâ. Eima chysiazy pabohsa lymâ awpa ta Art & Culture Department tawhta hmah eima la lymâpa a châ. Art & Cultute Department tawhta châbu tao n’awpa sôhzy chhao eima paso pazao lymâ hra.”
“Mara hla he vaw hluh via lymâ sa la tahpa he eima palôh liata y ta, Mara hla thiehpa a phi pasuana he Mara Hlasa Py nata Art & Culture Department hriaparaohpa ta hmah eima la lymâpa a châ. He châ heta sôhzy chhao eima soh via lymâ aw.”
“Hla phi ataopasuana liata hla phi ta hla phi thiehpa hluhpi ama vaw pangia tahpa chairman ta vaw phuah ta aly’pa a châ hmeiseih. Hla phi thaipazy Khazohpa ta miah pie lymâ ta, hla phi thaipa ta hla phi via lymâ sa la, hla sa thaipa chhaota hla sa via lymâ hraw ei ta, eima reih nata chi pho he eima pabohsa lymâ aw. Hlasa thaipa chhaota aophana Khazohpa ta a cha piepa ei he hmâh phahnai ta, hla sa hluh via lymâ achhuah u la, Mara reih nama pabohsa lymâ awpa he a peimawh ngaita kaw,” tahpa ta khichhai laipa ta pasyunabie pha kawpa a reih.
Hla aphi pasuana liata lymâ a lapazy:
- B. Beihmopie – A hawtu hlâ heta (New Colony, Siaha)
- Ronald Beibiepha – Ei vaw my ha tyh (Siaha Bazar)
- Z. Chhuahmô – Na châ deita (New Colony – III)
- N. Beihrokhochhi – Dythapa ta vaw y ha na, Ei kâru leipa, Mara a tahpazy (Meisavaih West)
- Tluanga Sailo – Einâ vaw thei tyh hra chi ma (Meisavaih West)
- KL. Ngiazi – Paritheipa bâhsai teh (Chapi)
- M. Hrothie – Na hmô ma? (Meisavaih West)
- Judson KT Jephatha – Golda, Kho tuanô (Siaha Bazar)
- Albert Kypacha – Ei ngie tyh (Chhaolô)
- John Litus – Ei kyhpachâ na cha (Zyhno).
Puhpa JB. Chozah, Art & Culture Promotion Officer, MADC ta pasyunabie pha kawpa reina a hnei hra.
St. S. Beihmôsia, Assistant General Secretary, MHP ta Secretary report piena hnei ta, Beirapatha Lapi, Vice President, MHP ta lymâ raina a hnei.
Joseph Zawtha, A. Beilaipha, Teresa Ngiano Hlychho, Pricilla Nôtlia, Jessica Ngody Hlychho zy ta pahnie kawpa ta hlasapa ta zawpi ama palôhpahawh.
Pihnô T. Merisa, Senior Vice President, MHP ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
