PRESS RELEASE
NO.141/2025
SIAHA, 26 Phiapi, 2025 (Pakhynoh) Atazâ dawh 7:00 PM khata MADC Golden Jubilee Hall, Siaha liata Puhpa K. Chhuabei, EM i/c LAD, MADC chata Shri K. Hrahmô, MLA Inter-Village Football Tournament 2025 Kick-Off Programme cha khichhai laipa châpa ta â hmâkhei ei.
Programme he Puhpa Reuben Hlychho, Sr. Vice President, SDFA ta chhihtha ta, MC. Beihrohmô, Finance Secretary, ECM KTP HQ ta Abeipa lâta pavaosana devotion daihti â hmâh.
Puhpa K. Chhuabei, EM chata, “Puhpa K. Hrahmô, MLA Inter-Village Football Tournament 2025 Kick-Off Programme a vaw hlao theipa zydua hnohta alynabie reih na ta, he programme ahlao thei awpa ta tlâhna nata daihti phapa miah pietuhpa Khazohpa hnohta alynabie ei reih.”
“Palâ biatuhpa phahnaingiahna vâta Inter-Village Football Tournament akhaih thei awpa a vaw châpa he aly â chhih hmeiseih. SDFA chhihtuhpazy tiamana nata hmahlana nata apasaih kawpa ta sôh vaw thyutuhpa Palâ biatuhpa hnohta alynabie ei reih hmeiseih.”
“He Inter-Village Football Tournament lia heta palôh pathaih kawpa ta akhaih chyu awpa ta cha pasyu khoh ei na ta, tiama papuapa ta sâkhana châ achhuah chyu u la, anodeikua, nama zydua ta sâkhana châ khai thai’pa châ leipa ta, palôh pathaih kawpa nata fair kawpa ta akhaihpa ta, sâkhana a châpa ta, châ dâh thai kawpa ta, chahawh pyly chata, sânona nata sâthôhna a châpa chhaota châ dâh thai kawpa ta nama y’pa he a peimawh ngaita kaw.”
“Paritheipa pahlaopahli pâna chôta châ leipa sa la, pathaih kawpa ta namâ khaih awpa a châ. He tournament ta â chhuahpa cha Sports liata hmahsiena y sa la, football he thotlâh khih tataw chaipa taihta a vaw khaih thei hra ei sa la tahpa he â chhuahna a châ.”
“He tournament he paritheipa adyuhna châta nata thyutliapazy Sports liata hmah ama sie lymâ thei n’awpa ta Puhpa K. Hrahmô, MLA ta a pasaih kawpa ta a pachhuahpanohpa a châ.”
“A rainao kawpa ta sôh la ta, hmô achhuahna palôhrupa he atanoh ta thyutliapazy liata za hluh kaw ta, he he eima bâhsai awpa a châ. A rainao kawpa ta chhihtuhpazy tawhta sôh hmô achhuah tuna pathipalôh he eima bâhsai awpa a peimawh ngaita kaw.”
“Sôhpaliena kyh lia heta chi hro pho hropazy heta miah control bâ ei ta, a pei ngâsâ. Chi hro pho hro ta ama tao thaipa zydua kha, tao thai khai thlâh hra pi ta, eima thathi tu vâta tao hoh tlâ leipa pi ta, a pei ngâsâ. Mydi ta Siaha khihpi lia heta chi hro pho hropazy ngâlâh ta daoh pahy ei ta, keimo lâ saw daoh pahypa hmô awpa y veih ei.”
“Eima râh liata chichei hoh tlâ leipa pi ta, Siaha khihpi lia nata thotlâh khih liata âhnalasi chalei awpa he Lai râh tawhtapa sai a châ. Noza â chhih hmeiseih.”
“District council lia sai ta rai angia’pa achhuah pi ta, châhrasala, eima zydua ta a tlôh khai thai’pa châ tlôh leipa pi ta, eimâ pasyu via lymâ awpa he a za peimawh ngaita kaw. Mawrâh sawhkhâ ry liata rai pahypa liazy heta a tliata tawhta cha tloh thei khao leipa pi ta, tiama eima papua via lymâ awpa he a za peimawh ngaita kaw.”
“Pathaihna sawhkhâ ta hmah alana kyh lia heta hmah miah nama lakhei chyu awpa ta ei châ haw ei. Football a pha kawpa ta akhaih chyu awpa ta khokheina ei cha hlâ chyu ei,” tahpa ta khichhai laipa ta pasyunabie pha kawpa a reih.
J. Ruby Marapawngia ta pahnie kawpa ta hlasapa ta zawpi a palôhpahawh.
Puhpa M. Sahnu, Vice Chairman, Joint VC, Siaha ta pasyunabie pha kawpa reina hnei ta, S. Thahlu (AIFF D Licence) ta Oath taking pahneisa ei ta, N. Ferdinand, Hon. Secretary ta vote of thanks reina a hnei. Atazâ ta programme he Siaha District Football Association (SDFA) pachhuahpanohpa a châ.
Khichhai laipa he official lâ tawhta Puhpa Pawsa Lava, Asst. I&PO, MADC nata Puhpa K. Nehemia, Cameraman zy ta ama zi.
Puhpa S. Vabeihrongia, Assistant Secretary, ECM KTP HQ ta thlahchhâna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
