PRESS RELEASE
NO.134/2025
CHAKHEI, 19 Phiapi, 2025 (Pakhynoh): Atanoh dawh 11:00 AM khata Puhpa M. Laikaw, Hon’ble Chief Executive Member, MADC chata Chakhei khih liata Circle Administrative Office a pahy.
Programme hmiatuapa he Puhpa Albert TT. Sachu, MDC ta chhihtha ta, Rev. M. Thachai, Biatuhpa Pastor, ECM Chakhei Pastor Bia ta Abeipa lâta pavaosana thlahchhâna a hnei.
Satlia S.Beidaosalai nata Valentine C. Nakhai ta pahnie kawpa ta programme ama host. Puhpa Lai-u Chozah ta khihtlâh vyuhpa ta welcome address reina a hnei.
Puhpa M. Laikaw, Hon’ble CEM chata, “Biatuhpa MLA nata Chakhei zawpizy samaw cha hlâ ei na ta, zâhnia tliata lia khata Chakhei khih liata CAO pahy awpa ta announcement tao pi ta, atanoh CAO pahy thei awpa ta a ypa he aly â chhih tah na ta, eimâ phuhleipa taihta palyupalihna dao pi ta, Chakhei zawpizy chô lâ liata ei ly hmeiseih.”
“MCHP nah ta keima eihrâh kawpa ta hla na phipa ei chi ta, ei ly ngaita kaw, chahleikhô ta MTP nah ta Sawlakia lâ mopha kawpa maniah pamosa ei ta, a pha ei tah ngaita, Siaha liata moh tyh pi ta, Chakhei liata Sawlakia he cha mopha ei tah kaw.”
“Atanoh ta programme he aly â chhih kaw ta, eima chhituh hmiatuapazy hriapasana vâta tahmâ ta thyutlia viapazy heta za padi pi ta, Nôpaw hmiatua viapanah ama hriapasana liata aly â chhih ei tah kaw.”
“Annoucement eima tao no khata a khih chyhsa cheingei ta officer maniah sopa u la tapa kha ahawna y ta. Office pahrâ tuachaipa heta, khihtlâh kyhpachâna a y khiahta la he tawhta a vaw y via lymâ awpazy ta amâ mopâ awpa châ ta, executive committee chhaota nama hiana he â do tah pi ta, Puhpa BeiRôkhu Beitâ CAO ta a tyuh aw ta, staff zy chhao a khih hneituhpa cheingei tlua pi ta, eima pahy theipa he aly â chhih kaw.”
“Chakhei CAO châ heta eima budget liata sôh awpa y mâh leipa ta, Executive ta pachâ ta CAO tao awpa he â chhuah ngâ ta hâhkô April liata thlai ta eima vaw tao aw. 16th finance commission lia chhaota office building sa n’awpa pahlao sih la tahpa ta paryhsapa a châ ha hra. Eima budget liata y mâh lei hra sala, eima officer nata staff a vaw y awpa nah he khihchhôh chyhsa sai châ ei ta, vaw tiama kaw muh vy.”
“Officer nata staff na bie ei ta khohpa cha, government servant châ ei chi ta, zawpi chakaotuhpa nama châna hawhta, zawpi hmahsiena awpa he nama pahno ngâthlâh h’awpa a byuh. Post â hnai chaipa y leipa ta, â sâh chaipa y lei ta, zawpi chakao awpa ta raihriapa châ pi ta, âmo amâ sosâhna awpa ta hmahlapa he eima tao awpa a châ.”
“Chakhei nôpawnahzy ta RO hiah ei chi ta, revenue ngâlâh châ ta , CAO lia deikua department nano nanopa â tlôh khai aw. Tahmâ ta officer heta RO nata CAO vaw pakaoh chy ta, he tawhta he liata hria awpa chhao sawhkhâ rai kaw la pi ta zyzyh ta palai via lymâ awpa a châ aw.”
“He office lia heta o-hmo pass zy, sahdô pass zy tao theipa châ aw ta, Siaha liata tao byuh khao leipa ta Chakhei, Chapi, nata Siata Bia liata a ypazy châta â rypaoh kaw bâ aw. Chahleikhô ta, department hropazy a vaw y via tita, teacher nah châ chhaota a zie y khai ha aw, Department nano nanopa so’pa achhuahpa châ ta, he su tawh heta zawpi chakaona siekheipa a châ aw.”
“New Maraland vision ry liata zawpi chakaona kyh liata sia kawpa ta siekhei pi ta, paritheipa a taopa ta ahyhmah ta raihria pasaipa châ leipa ta, eima leilô a lei lei n’awpa ta MADC he Khazohpa ta maniah pie ta. He sawhkhâna he, he lia he chhâ leipa ta, hmahlana nano nanopa siekhei awpa châ ta, chahleikhô ta, biehneina lai viapa chhao Central BJP chhituh nah ta, PM hnohta eima chareikhei aw maniah ama tah hra.”
“Eima sawhkhâna heta party sâkha châ ngâlâh hmahla leipa pi ta, eima râh zawpi zydua ama hmâh phahnai thei n’awpa ta hma eima la lymâ aw,” tahpa ta pasyunabie pha kawpa CEM ta a reih.
Puhpa K. Hrahmo, MLA chhaota biereina hnei ta, MADC vâ heta, Mara reih he â bohpa châ ta, MADC he y leipa sala eima reih he lei haw ta eima chheipâh liata a ypa nahta maniah ama disao khai ha bâ aw. Rev. RA. Lorrain khata maniah vaw chhihtha lymâ ta, ama chhihthana ry liata, Mara beizy ta tahmâ ta Sixth Schedule a y thei n’awpa ta alaichadai ei ta, tahmâ duasu he tlô theipa eima châ . Andaman and Nicobar lsland liata a ypa Bo pho cha tahmâ he UN ta a leidia hapa ta a za reih, a chyhsapa la Tamil Nadu rachhôh lia khu ama hluh kaw aw, anodeikuala, a reih he lei ha ta chavâta a leidia hapa hawhta phuahpa a châ.
Chakhei sawzy cha a chakuhchavei awpa ta pasyu ta, Mobyu khih liata khihtlâh ta a riethei viapazy ama deichhyna reih ta, chakhei khih liata tao hra awpa ta a pasyu hra ei.
MCHP Branch, Chakheizy ta opening song angia kawpa paryh ei ta, MTP Branch, Chakheizy ta Sawlâkia thai kawpa ta ama lâh.
Laihsa FC. Nipari, Laihsa J. Vahneisô nata C. Vangiazi, Chakhei – II zy ta pahnie kawpa ta hlasapa ta zawpi ama palôhpahawh.
Puhpa BeiRôkhu Beitâ, CAO, Chakhei ta vote of thanks reina a hnei.
CEM he Puhpa Tiahlei Syuhlô EM i/c EF & CC, etc., Puhpa T. Seido, EM i/c Sports, etc., Puhpa M. Chiadung, EM i/c Soil, etc., Puhpa N. Lalrosanga, Vice Chairman Planning, Puhpa Beihu Nôhro, Deputy Chief Whip, Puhpa Delson Nôtlia, MDC & BJP National Minority Morcha Secretary, Puhpa B. Dawpho, MDC, Puhpa K. Laitha, Under Secretary, GAD, Puhpa N. Khumtira, SO, Puhpa KT. Vabeikhokhei, ASO, Puhpa John M. Beilaisei, PS to Chief Executive Member, Puhpa Pawsa Lava, Asst. I&PO, Puhpa David K. Azyu, AHEO, Puhpa A. Sachhua, H/S, Puhpa Jeffrey Khara, Editor, Moonlight, Puhpa C. Lalramnghaka, Editor, Kawl Eng zy ta ama zi.
Party lâ tawhta Puhpa Pawkhu T. Azyu, General Secretary, BJP Siaha District, Puhpa B. Luaha, Ex-MDC, Secretary, BJP Siaha District, Puhpa K. Malsawma, President, Kissan Morcha zy ta CEM ama zi.
Tipa khih tawhta Puhpa C. Hetha, Mandal President, BJP Tipa, V, Puhpa V. Palua, Vice President Mandal, BJP Tipa nata Puhpa C. Beirahnei, Secretary Local Committee, Tipa D – II zy ta CEM ama zi thei hra.
Puhpa C. Ngachhi (Rowland Paw) Chakhei khih liata CAO office vaw ypa alynabie rei n’awpa châta CEM hnohta Seih nawhnopa a pie. Puhpa C. Ngachhi (Rowland Paw) pyly heta atanoh kyhchhi n’awpa châta Seih a vaw thyu heih hra.
Pro Pastor H. Vabeihmôkhai, Biatuhpa, ECM Chakhei Pastor Bia ta thlahchhâna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
