PRESS RELEASE
NO.132/2025
SIAHA, 10 Phiapi, 2025 (Hriatuanoh): Atanoh dawh 11:00 AM khata Forest Hall, MADC Siaha liata Puhpa M. Laikaw, Hon’ble CEM, MADC chata khichhai laipa (chief guest) châpa ta Mara Thyutlia Py (MTP) Dâh bu (Constitution) a palâhâh.
Programme he Puhpa Pakhaw Chozah, President, MTP General Headquarters ta chhihtha ta, Rev. VL. Ngaia Hlychho, Sr. Adviser, MTP Gen. HQ ta Abeipa lâta pavaosana thlahchhâna a hnei.
Puhpa Vabeikhaihmô Solo, Secretary, Constitution Amendment Committee ta report piena a hnei.
Puhpa M. Laikaw, Hon’ble CEM chata, “Atanoh programme a vaw hlao theipa zydua nata Constitution Amendment Committee zy hnohta alynabie ei cha hlâ ei. Dâh he a hmâhtuhpa ta achupasia ta pha kawpa ta a hmâh khiahta cha, apôhkhana zy, thatlô vianazy tlôkhei ta. A pa-eipachhianazie ta dâh ahmâhpa châta deikua cha, apôhkhaleina a patlôsa thei. Nôpawzy ta ama reih tyhpa unwritten law chhao zyhpa vaw châ lymâ tyh ta, a tlia tawh deikua ta cha, nôpawzy ta chavah kao tihry haosâ chavei nata chachâh chakapa ta o sa beih v’ei, za tah ei ta, sa thlâh hra pi. Uhthei viapa bie palie ngâ kaw’pa châ vei, za ta tyh ei ta, khoh dâh hawhta palie thlâh ha pi, sâlâ via ngâ kaw pi. Kao totie liata eimâ taopathi n’awpa he a za hluh ngaita.”
“Mara sawzy pi ta Customary Law hnei leipa pi ta, tao pi ta, palâhâh hapa châ ta, châhrasala, hmâh awpa he achhuah tu tlâ leipa pi ta, Mararâh lia heta ahneina dâh he alyu tlâ leipa ta, zâkô liata Zyhno liata eima nawhtapa ei sawchanonô dyhchâ ta hmâh na ta, Zyhno nôpawzy chhaota he he za hmâh chi ta, keimo hmâh thei khao tlôh lei p’aw pi ta, eima chatôkhei ngâ kaw na, eima sie laih dâh n’awpa he tah ei ta, nama hmâh lyhlia laih hr’aw tlaih maw, tah ei na ta. He dâh tao awpa no heta, NGOs zydua, Awnanopa nata Council zy chhaota taopa châ ta, nama hmâh lyhlia hra awpa a châ tahpa ta ei chhy ei.”
“Marriage divorce dâh chhao tao ha pi ta, tahmâ châ, yzie hnei kawpa ta zachhih kawpa ta eima sie thei n’awpa ta vaw pachhuahpanoh pi ta, cha cha zyh sih la, hmâh lymâ sih la tahpa he eima kho chaipa a châ.”
“MTP he py uhthei kawpa kô 71 uhtheipa vaw châ ha ta, reileipa ta liata election chhao y awpa châ ta, Line up system ta atlyhna (election) chatôhpa a châ tyhpa he a pha tah lei kaw na ta, keimo hawhta reihkah thai leipa châta la, tloh awpa khoh tu vâta mo hropa reipachhie tlamawzy a za nao kaw aw. Tahmâ chhao line up sâthôh, sâpalih ta kaw y ta, âmo py cha, cha hawh kha hawh tahpa ta a reipachhie za nao kaw ta, line up system he a pha lei kaw. Nomination board paduapa ta, nomination board zy ta amo via he châ sy ama tahpa he lôraoh kawpa ta apyh thei lymâpa châ sa la a pha chai aw.”
“Mara Students’ Organisation (MSO) zy ta ama practice pa pha lei kawpa pahno heih na ta, viah daohtaopazy thlachareih ta phusâ khei tyh ei ta, he kyh he MTP hiahri ei na ta, pha tah hra v’ei, MCHP chhao hiahri hra ei na ta pha tah hra v’ei. NGO py kha heta Mara moh pachhie thei ta, committee ei ta tao khao lei awpa ta pathlu thei leipa ei ta, committee via heih u la, tao khao lei awpa ta kaw pathlu tuh u tah heih ei na ta, programme peimawh kawpa a y nota sôh ahiapa cha, pachâthai â chhih via, MSO Office run n’awpa ta thlachareih viah nah hnohta donation hiah thlâh hapa he cha a pha lei kaw. A tliata lia khata committee liata ama pachhâsa ha na tah ei ta, aly’pa châ hmeiseih ta, alynabie chhao ei hlâ ei.”
“District council he NGOs nata Awnanopazy nata pha kawpa ta hriaparaoh awpa he ei kho chaipa a châ. Election pha kawpa nama hnei awpa cha khokhei ei na ta, apôhkha kawpa ta nama sie lymâ thei n’awpa ta khokheina sâh chaipa ei cha hlâ ei,” tahpa ta khichhai laipa ta pasyunabie pha kawpa a reih.
ISSUED BY:
Information & Publicity Department
Mara Autonomous District Council
Siaha.
