PRESS RELEASE
NO.129/2025
SIAHA, 4 Phiapi, 2025 (Hriaheinoh): Atamy dawh 11:30 AM khata Government Siaha College Auditorium, Siaha liata Puhpa Lalduhoma, Chief Minister, Government of Mizoram chata Mara Students’ Organisation, General Headquarters, Siaha Diamond Jubilee Celebration 2025 programme cha khichhai laipa châpa ta â hmâkhei ei.
Celebration First Session programme he Puhpa T. John Tennyson, Vice President, MSO Gen. HQ ta chhihtha ta, Rev. K. Vabeinocho, Moderator, ECM Assembly ta Abeipa lâta pavaosana devotion daihti â hmâh.
Puhpa Lalduhoma, CM, Gov’t of Mizoram chata, “MSO Gen. HQ kô 60 a tlohna Diamond Jubilee Celebration hmâh thei awpa a vaw châpa he aly âchhih hleikhô ta, ngiatlâh châ kawpa a châ,” a tah.
“MSO he achuna lâta hmahlatuhpa ama châna hawhta MSO founders zy reithai tlâh ama châ hmeiseih. MSO chhihthatuhpazy ei chi he thyudyupazy chhihthatuhpa nama châ hleikhô ta, chi pho châta hmahlana siekheituhpa châ ei chi ta, mylâ hânoh eima chhihtuh awpa chhao châ ei chi ta, chavâ chata, ei cha pachâ peimawh tyh ei. Achuhaipazy ta ama programme liata ahlao awpa ta eina hrua ei khiahta la, ahlao cheingei ei chhuah tyh.”
“He hawhta achuhaipazy programme pasô ta, ahlao lymâ ei chhuahna chhâpa cha, nama hnohta bierei khopa ei hnei vâ a châ, Mawrâh lia heta, reih nano nanopa a cheihpa châ pi ta, châhrasala, eima reih alyupa word he a hluh kaw. eima reih cheipazy â nano vâta alapananona palôh phaoh leipa ta apôhkhana palôh phaoh ta, adyryh kawpa ta rai eima hria khoh lymâ awpa he a peimawh ngaita kaw. Zisu ta, “Khinarâh chhao anosasyh ta â dyuh khiahta cha kheihta â duah thei aw? Chhôhkha nata chhôhkha adyuh ei sala, cha chhôhkha cha aduah thei aw vei.”
(MÂKA 3:24-25), a tahpa hawhta, apôhkhana he eimâ duahpapuana a châ.”
“Mara thyutliazy ei chi he Competitive liata ataophapa châ ei chi ta, District hropazy mopâtlâh châ awpa ta nama sâh patlua, he he vaw taopha pazao lymâ t’u. MSO chhao he he hawhpa hmahlana kyh liata thapiphiatuhpa nama châ nahta ei pangiasa. Anodeikua la, Mizoram level lia ngâlâh châ leipa sa la, India level lia chhao tloh thei namâ chhuah awpa a châ. Central service liata chhao Mawrâh tawhta atloh theipa eima chyh kaw vâta nâmo Mara thyutliazy tloh thei a vaw chhuah t’u. Achuna liata hmahsiena a y via lymâ thei n’awpa ta keimo chhao hmah eima la lymâ hra,” khichhai laipa ta a tah.
“Thyutliapa hluhpi paritheipa sei liata atâh ei ta, ama hrona chhao pahlei ei ta, eikhata taopachhina tawh heta iahzaipa ta y thei ei ta, chavâta, MSO members zy ta la taopachhi tlâ rai rai kh’u,” tahpa ta CM ta a pasyu ei.
“MSO Diamond Jubilee Celebration liata na hrua ei chi ta, ei châ ly hmeiseih ei. MSO tlâh parei mawh sy. Ei châ ly kaw ei,” tahpa ta CM ta a biereipa a pachhâsa.
Guest of honour Puhpa M. Laikaw, CEM, MADC chhaota biereina hnei hra ta, “MSO lia heta term 2 MSO President vaw châ ha hra na ta, ei pahnochhei vei khiah, MSO programme liata Mawrâh Chief Minister eikha â hlaona a châ nahta ei pangiasa,” a tah.
“Eima Chief Minister ta students zy a pachâ peimawh kaw ei, tahpa â lâ kaw. Tahmâ ta CM heta Marasawzy nata eima District council miah khokhei kaw ta, a chô liata ei ly hmeiseih. CM ta MADC, Mara zawpi miah pachâ peimawhnapa lia heta, MADC nata Mara zawpizy vyuhpa ta alynabie ei reih hmeiseih.”
“Atanoh Students py nano nanopa ypazy hriaparaohna phapa hnei u la, paritheipazy adyuh lymâ u la, achuhaipazy châta career guidance zy pachâpa lymâ u la, achuna kyh liata hriaparaohna phapa nama hnei lymâ awpa ei châ haw ei.”
“MSO kô 60 vaw tloh ha ta, chavâta, MSO chhihtuhpazy nama sie dâh, pachâ dâh, nama thaina zydua, decision taona kyh lia chhaota pitloh kawpa, mature kawpa hawhta eima cha pachâ bâ aw.”
“Châ achu pha leipa ta certificate chalei khoh thlâh hapa hluhpi y bâ ei ta, he kyh lia heta NGOs chhaota hmahla u la, he hawhpa hmo khochhih lei kawpa pahleipadia eimâ chhuah chyu awpa he a peimawh ngaita kaw. Leadership châna ngâlâh khoh leipa ta, certificate zuahtuhpazy he NGOs zy ta pahnopapua achhuah u la, eima zydua ta hriaparaoh ta, hmo doleipa adyuhna kyh lia heta hriaparaohna phapa eima hnei awpa he a peimawh ngaita kaw.”
“Akheihawhpa hmo rai tao ei sih la, Khazohpa hmia eima pasah lymâ awpa he a peimawh ngaita kaw,” tahpa ta CEM ta pasyunabie pha kawpa a reih.
Puhpa Pakhaw Chozah, MTP Gen. HQ Siaha nata Pihnô P. Chaki, President, MCHP Gen. HQ Siaha zy ta pasyunabie pha kawpa reina ama hnei hra.
Elson Eliasah Nôtlia, President, MSO Gen. HQ ta welcome speech reina hnei ta, S. Arona, General Secretary, MSO Gen. HQ ta report piena nata MSO founders felicitation daihti â hmâh.
Laihsa Dinai C. Lalruatdiki nata Laihsa Florence Hlychho zy ta pahnie kawpa ta hlasapa ta zawpi ama palôhpahawh.
MTP Branch College vaihzy ta special item hneipa ta Sawlakia angia kawpa ta ama lâh, MSO Branch New Colony chhaota Khocheinô lâ angia kawpa ta ama lâh hra.
ISSUED BY:
Information & Publicity Department
Mara Autonomous District Council
Siaha.
