PRESS RELEASE
NO.117/2025
SIAHA, 01 Phiata, 2025 (Pakhynoh): Atanoh my dawh 11:00 AM khata I & PR Conference Hall, Council Vaih, Siaha liata Puhpa N. Viakhu, Chairman, MADC ta International Day of Older Persons (IDOP) Programme liata Khichhai Laipa (Chief Guest) châpa ta â hmâkhei ei.
December 14, 1990 khata UN General Assembly ta October 1 he the International Day of Older Persons châta vaw phuah ta, October 1, 1991 tawhta IDOP ahmâh (observe) pathaopa a vaw châ. He noh he senior citizens zy ama hmo taophana pahnokhei ta, phuazâhkhei ta, ama thaisona, zachhihnazy pasô thai ta, bao amâ ngiahnazy pahnokhei peimawhzie pachâkheina noh nata lymâzy ama pie tyh.
Atanoh programme he Puhpa C. Sangnuaia, President, Mizoram Upa Pawl (MUP), District Headquarters, Siaha ta chhihtha ta, Rev. Eden Remnalalduhawma, BCM Siaha West biatuhpa ta Abeipa lâta pavaosana thlahchhâna daihti â hmâh.
Puhpa N. Vaikhu, Chairman, MADC chata, “Atanoh International Day of Older Persons noh liata khichhai laipa châ awpa ta hruapa ei châpa he aly kaw na ta, programme pachhuahpanohtuhpazy hnohta alynabie ei reih hmeiseih,” a tah.
“Senior Citizens zy pachâ peimawhpa ta IDOP day zy pachhuahpanohpa ta programme ahmâh theipa a vaw châpa he aly â chhih hmeiseih. He noh eimâ hmâh haino heta, kô uhtheipazy zana châh pahno ta, ama hriapasanazy eima pasô thai kaw awpa he peimawh kaw ta, atanoh he su liata kô uhtheipa avy theipa zydua cha palyupalih pi ta, cha za kaw pi ta, nama sona zy, hmo namâ tyh hapa zy, nama tiamana zy, nama mao-oh theinazy Khizaw ta pahno ta, apyh ta, pahno ngâthlâh pi ta, eima râh nata khihtlâh châta lôbô pha kawpa bô ei chi ta, rai rônah kawpa nama hria tahpa he eima pahno ngâthlâh ha awpa a peimawh ngaita kaw,” a tah.
Khichhai laipa chata, “Apahâ thlâh ha leipa ta thyutliapazy châta lâthlôh phapa pahmô lymâ ei chi ta, nama raihria phana he rônah eima tah hmeiseih. Kô uhtheina he lôsôhpa hawhta sôhpa nata zachhihna ta biepa a châpa vâta zana nata uasana ta kô uhtheipazy mohôh tyh awpa ta eima District liata thyudyupazy ama pahno awpa khoh kaw na ta, charaohpa ta, thyutliapazy heta kô uhtheipa thâtih pachâ peimawhpa ta ama nahthliepa tyh awpa nata hmo amâ tyhpa tawhta achu awpa eima hneihluhzie pahno ta, ama yna su maih liata pasô thai awpa he, thyutliapazy ta nama pahno awpa ta ei châ haw ei. A chhâ chaina liata ei reih khohpa cha, uhtheipazy ei chi he, thatlôna, sona nata kyhpachâna châta lôbô châ ei chi ta, thyutliapazy hmophapa chho ta, nama pasyu via lymâ awpa ta ei châ haw ei,” tahpa ta pasyunabie pha kawpa a reih.
Puhpa Sena Ralte, Secretary, MUP, District HQ, Siaha ta report piena hnei ta, Puhpa RC. Chinzah, Vice President, MUP, District HQ, Siaha ta MUP members apahâhapazy taokheina one minute’s silence hnei khai tawhta taokheina thlahchhâna a hnei.
Atanoh programme avaw hlaotheipazy hry liata kô 80 chô lâ uhtheipazy lymâ ama raih pâ hra.
Laihsa Cindy Ramhlenpuii ta pahnie kawpa ta hlasapa ta zawpi a palôhpahawh.
Official lâ tawhta Puhpa Pawsa Lava, Asst. I&PO, MADC nata Puhpa Martin L. Hlychho, Cameraman zy ta Chairman, MADC he ama zi thei hra.
Rev. C. Valy, Fin. Secretary, MUP, District HQ, Siaha ta vote of thanks reina a hnei khai tawhta thlahchhâna ta daihti a pachhâsa. Programme chhâ khai tawhta aly kawpa ta refreshment dôhkhohpa a châ.
ISSUED BY:
Information & Publicity Department
Mara Autonomous District Council
Siaha.
