PRESS RELEASE
NO. 103/2025
SIAHA, 29th Thlazoh, 2025 (Chutynoh): Atanoh dawh 11:00 AM khata Pre-Service Trainees Union, DIET Siaha pachhuahpanohpa DIET Siaha Graduation Day cha DIET Hall, Tlâhpi, Siaha liata ahmâhpa châ ta, Puhpa MH. Tiabi, EM i/c Middle School, MADC cha khichhai laipa (Chief Guest) châpa ta â hmâkhei ei.
Programme he Sir Sahlô Bôhia, Principal i/c, DIET Siaha ta chhihtha ta, Madam Vanlalchami Hnialum ta Abeipa lâta pavaosana devotion daihti â hmâh.
Puhpa MH. Tiabi, EM chata, “DIET Siaha graduation day liata khichhai laipa (Chief Guest) châta hruapa ei vaw châpa he ei ly hmeiseih. A hmiatua ta New Comer zydua hnohta alynabie reih na ta, DIET liata tiama kawpa ta achu ta Graduation Day liata degree la chyu awpa ta khokheina ei cha hlâ ei,” a tah.
“Atanoh he graduation day liata degree a hmôpa zydua châ ly khei hmeiseih ei na ta, kô 2 chhôh nama hriapasana theilâpa nama vaw hmô haw. Pachutuhpa châ theina degree vaw hnei ha ei chi ta, DIET institution ta nama professional line cha pathaopa ha ei ta, DIET vaw puasai aw ei chi ta, lâthlôh namâ kaw chhih laih lymâ n’awpa liata tiama kawpa nata rairuna namâ kaw tyh laihpa chhaota, chatôh lymâ ta hlaotloh namâ chhuah lymâ aw. DIET liata experience nama hneipa zydua hmâh phahnai lymâpa ta namâ chupazy hmâhphahnai lymâpa ta pachutuhpa nama kaw châ daihti lia chhaota siku hawti hmah pasiesa lymâ ta râh hmahpasiesa namâ chhuah lymâ aw,” a tah.
Khichhai laipa chata, “Hawti nata râh châ dei chhao châ leipa ta nâmo nata nama chhôhkha châ chhaota hmahsiena nama pachâsa lymâ awpa a châ. Atanoh ta degree nama lapa ngâlâh he â daih tah leipa u la, B.Ed nata D.El.Ed a patlôhapazy Mizoram Teacher Eligibility Test (MTET) tao pâ khai u la, tahpa khokheina ei cha hlâ chyu ei,” a tah.
Puhpa K. Beingiachhie, Sr. EO (M/S), MADC nata Sir C. Laitha, Lecturer, DIET Siaha zy ta pasyunabie pha kawpa reina ama hnei hra.
DIET Choir, Group Song, 1st Semester, Esthy, 1st Semester, Elisha Hlychho, 3rd Semester zy ta pahnie kawpa ta hlasapa ta zawpi ama palôhpahawh.
Puhpa MH. Tiabi, EM, MADC he official lâ tawhta Puhpa K. Beingiachhie, Sr. EO (M/S), Puhpa John Chozah, Sr. CEO, Puhpa S. Zatha, Sr. CEO, Puhpa S. Thachha, CEO, Puhpa L. Beirangia, CEO, Pihnô S. Meryl Vanramngaihzuali, CEO, Puhpa Pawsa Lava, Asst. I&PO nata Puhpa Martin L. Hlychho, Cameraman zy ta ama zi thei hra.
Madam B. Dorene Lalchhanhimi Solo, Lecturer, DIET Siaha ta vote of thanks reina a hnei khai tawhta graduation day programme pachhâsapa a châ.
ISSUED BY:
Information & Publicity Department
Mara Autonomous District Council
Siaha.
