Siaha, 27th Thlazoh, 2025 (Pakhynoh): Târi 26.08.2025 zâ dawh 7:00 pm pa ta New Siaha MTP Opi su liata Co-operation Department, MADC ta Mara Thyutlia Py, Branch, New Siaha East-1 manôhzy hry liata Co-operative Education Training Programme a pachhuahpanoh.
Programme he Puhpa N. Lalhmingmawia, ARCS ta chhihtha ta, Puhpa C.L. Hranga, MTP Adviser ta devotion â hmâh.
Pihnô N. Maki, DRCS ta biereina chyupa hnei ta, Khizaw py laipa UNO hmahlana ta kô 2025 he “International Year of Cooperatives” tahpa ta kôphuah vaw hnei ta, a theme châta, “Cooperatives Build a Better World” tahpa hmâpa a châzie reih ta. Kôphuah pachhaipadaipa ta, Khizaw su nano nanopa nata India râh su nano nanopa liazy ta, he International Year of Cooperatives he ahmâh hai ei ta, keimo Cooperation Department, MADC chhaota pachâ peimawh hrapa ta, he hawhpa programme pachhuahpanohpa a chazie, a reih.
MTP manôhzy chhao Cooperative Movement he pahâhkhei ta, Cooperative Society phapa padua thei awpa ta, achhuahna hnei awpa ta pasyuna a hnei hra.
Programme liana heta, Puhpa J. Lalthianghlima, Cooperative Education Instructor (CEI) tawhta, pachuna nahthliepa châ ta, keimo Siaha District chhôh lia cheingei chhaota achhuahna hmeiseihpa, pahâhna hmeiseihpa nata tiamana hmeiseihpa hneina chôta paduapa society hlaotlohpa vaw hnei laih ngâ kaw bâ hra pi ta. Ama hlaotlohna hawhpa hnei hra ta, society phapa padua via lymâ awpa ta Cooperative Movement he thyutliapazy ta pahâhkhei via bâ ei suh u tahpa pasyuna a hnei hra.
Interaction session chhao ahmâhpa châ ta, zawpi lâ tawhta hiahrina ama hneipazy cha Pihnô N. Maki, DRCS; Puhpa N. Lalhmingmawia, ARCS nata Puhpa N.S. Beihruasa, SICS zy ta achhyna ama hnei.
New Siaha MTP Branch President Puhpa S. Lalrelkima chhaota biereina chyupa hnei ta, Puhpa K. Mara, President, Siaha District Cooperative Union ta Vote of Thanks daihti â hmâh hra.
