PRESS RELEASE
NO.74/2025
SIAHA, 27 Chhiepa, 2025, Chutynoh – Atanoh zâlâ dawh 1:30 PM khata Farmers’ Training Hall, MADC, Siaha liata Education Department, MADC (Primary School) pachhuahpanohpa, White Board raina programme ahmâhpa châ ta, Puhpa M. Laikaw, Hon’ble Chief Executive Member, Mara Autonomous District Council chata khichhai laipa (chief guest) châpa ta â hmâkhei ei.
Programme he Puhpa Albert Hlychho, Sr. EO (P/S) ta a chhihtha.
Puhpa M. Laikaw, Hon’ble CEM, MADC chata, “Daihti he â thla hmâ kaw ta, keimozy châ eimâ chu no cha, châ rona châta lôchâpa hmâh tyh pi ta, cha khai tawhta, teacher zy ta Black board zy vaw hmâh heih ei ta, tahmâ cha white board ama hmâh ha bâ,” a tah.
“White board atanoh ta eima raipa he peimawh kaw ta, pachutuhpazy chhaota ama hmâh phahnai kaw aw nahta ei hnabeiseih. Cha hleikhô ta, chhaichhi thiehpa heta eima tha maniah pathyu ta, white board thiehpa eima raih theipa he aly â chhih hmeiseih. Kei chhao High School ei chu nota Oxford Learner Dictionary maniah rai ei ta, ei pahnothai lei tarawpa ta, azo zâ khihdei taihta ei moh thlâh ha hra,” Khichhai laipa ta a tah.
CEM chata, “Sawhkhâ siku a kiahpa student ama chyhzie reih ta, Mid-day meal nata free textbook raipa châ ta, chah chôta siku hawti ama chyh kaw. Private school liata deikua students ama hluh kaw bao. He heta pachâna a pahsisa kaw,” a tah.
“Mara chi nah pho aduahpapua n’awpa ta education he peimawh kaw ta, eima education a pha khiahta cha Mara chi nah pho he aduahpapua pi ta, khâpa rai tao sih la achuna phapa eima hnei lei khiahta cha khâpa lia hmahta hlaotlohna pitlohpa hmô beih aw ma pi,” CEM ta a tah.
CEM chata, “Education department zy maophaohna he asâh kaw ta, eima sawnahzy mylâ hânoh ta ama kuphei ta amâ duahpapua thei n’awpa ta hmahla via lymâ ta thapiphia awpa ta nata eimâ chunazy he kheihta ma eima papha via lymâ thei aw tahpa he eima pachâpa peimawh kaw awpa a byuh,” a tah.
Puhpa S. Lalremthanga, Dy. CEM i/c Primary School chhaota pasyuna bie pha kawpa reina a hnei hra.
He daihti liata Executive Members, Puhpa K. Chhuabei, EM i/c LAD, Puhpa M. Chiadung, EM i/c Vety, Puhpa Beihu Nohro, Deputy Chief Whip, nata Puhpa L. Prisila, EM i/c PWD zy chhao amâ hlao hra.
White board he MADC constituency 25 ry liata Primary School zy hnohta raipa châ ta, atanoh programme liata Vahia MDC Constituency, Siaha South-I Constituency, Tipa V-I Constituency, Amôbyu Constituency, Tipa V-II Constituency, Chhaolô Constituency, Chakhei Constituency, Zyhno Constituency, Siaha South-II constituency, Siata Constituency nata Tokalo Constituency ry liata primary school a ypazy hnohta raih papuapa a châ.
CEM he official lâ tawhta Puhpa LM. Beingalai, I&PO, MADC, Puhpa Ngôkô Chozah, I&P Department nata Puhpa K. Nehemia, Cameram zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
