PRESS RELEASE
NO.73/2025
SIAHA, 27 Chhiepa, 2025, Chutynoh – Atanoh dawh 12:00 Noon khata I&PR Conference Hall, Council Vaih, Siaha liata Media Workshop programme ahmâhpa châ ta, Puhpa M. Laikaw, Hon’ble Chief Executive Member, Mara Autonomous District Council chata khichhai laipa (Chief Guest) châpa ta â hmâkhei ei.
He Media Workshop he Mizoram Information & Public Relations Department nata Mizoram Journalists Association (MJA), Siaha District zy pachhuahpanohpa châ ta, Puhpa J. Jeffrey Khara, Editor of Moonlight and President (In-charge) MJA Siaha ta programme chhihtha ta, Puhpa Lalrosiama, Secretary, MJA Siaha ta daihtiziehpa â hmâh.
Puhpa M. Laikaw, CEM chata, “12th Term, tahmâ ta sawhkhâna siekhei haipa heta sawhkhâhna phapa (good governance) siekhei lymâ achhuah pi ta, dâh nah phôh â bei chai aw ta, MADC liata corruction-free a y thei n’awpazy, adona (Justice) a y thei n’awpa ta hmahla lymâ eimâ chhuah,” a tah.
“Khazohpa ta râh châta hria awpa nata nietlua n’awpa châta Journalist châ awpa ta cha padua ei ta, ngâchhih kawpa ta tiama kawpa ta rai nama hria lymâ awpa he peimawh kaw ta, Khazohpa khozie chhao a châ hrana tahpa he a thiehpa ta nama pahno awpa ei khoh,” Khichhai laipa ta a tah.
CEM chata, “Khazohpa ta nietluana miah piepa lia heta ngâhchhih kawpa ta hria ta, tiama kawpa ta eima hria lymâ awpa he peimawh kaw ta, eikhapi ta hneirôh achhuahna palôh hneipazy he pha leipa ta, Khazohpa khozie chhao châ hra vei. Khazohpa ta eima raihriana liata maophaohna miah piepa he a pha kawpa ta nata tiama kawpa ta eima tao hnolo khiahta cha a chhâ chhâna liata cha, Khazohpa ta hlaotlohna miah a pie tyh,” a tah.
“Media chyhsa châ ei chi ta, politics liata khokhei viapa hneipa he pha leipa ta, sawhkhâ tawhta bie puapa zawpi lâta pahnosa byuhpa cha â do kawpa nata a châna dâh ta hawhta nama pahnosa lymâ awpa he nama maophaohna a châzie a thiehpa ta nama pahno awpa he peimawh kaw ta, Khazohpa khozie chhao a châ hra,” CEM ta a tah.
“Ei châ ropa heta râh pabohsana kyh liata pei hriapa a y ma? apôhkhana paraona bie â hlao ma? eima châ ropa heta constructive ma hluh via ma? destructive mah tahpazy eima sai tyh awpa a byuh,” Khichhai laipa ta a tah.
CEM chata, “Eima râh Siaha District lia heta paritheipa taopa zy, chanô nata chapaw apualeinazie ta hro ahmâhpazy hluh kaw ei ta, HIV/AIDS, nata Hepatitis a veipa hluh kaw ei ta, he kyh lia heta MJA zy heta awareness zy hnei via lymâ ta Awnanopa nata Sawhkhâ zy ama peimawh kawna chôta , he pasana chôchâh liata a kawh viapa ta awareness apie theitupa cha MJA nahzy châ ei chi ta, he chôchâh liana heta thapiphia ta hmah nama la via lymâ awpa he a peimawh ngaita kaw,” a tah.
Atanoh ta workshop he Session sâ 2 lâta pachhaihpa châ ta, 1 session liata Pihnô K. Ngosai, DIPRO, Siaha ta vote of thanks reina a hnei khai tawhta 1 session daihti pachhâsapa a châ.
CEM he official lâ tawhta Puhpa LM. Beingalai, I&PO, MADC, Puhpa Ngôkô Chozah, I&P Department nata Puhpa K. Nehemia, Cameram zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
