PRESS RELEASE
NO.135/2025
SIAHA, 20 Phiapi, 2025 (Pobienoh): Atanoh dawh 10:00 AM khata Puhpa M. Laikaw, Hon’ble CEM, MADC chata Chapi khih liata Mara Thyutlia Py General Conference ei 33-na cha khichhai laipa châpa ta a pahy.
Khichhai laipa heta MTP Souvenir Lôpâ Thlihua chhao a palâhâh pâ hra.
Programme he Puhpa Pakhaw Chozah, President, MTP General HQ ta chhihtha ta, Rev. VL. Ngaia Hlychho ta Abeipa lâta pavaosana devotion daihti â hmâh.
Puhpa M.Laikaw, Hon’ble CEM chata, “Atanoh MTP General Conference ei 33-na Puhpa Hiphei Byurei liata pahy awpa ta khichhai laipa châ awpa ta programme pachhuahpanohtuhpa na khokheituhpa zydua hnohta alynabie ei reih.”
“Nôpaw hmiatuapazy ta târi 9 Phiata, 1954 khata MTP vaw padua ei ta, baongiapazy bao tah, deichhy byuhpazy deichhyna rai vaw hria lymâ ei ta, tahmâ cha kô 71 uhtheipa a vaw châ haw.”
“MTP Emblem (Ngiana) moh sih la, Pahmôhpi azaw ngâpa hmô pi ta, Motto moh hei sih la, “Chiehleipazy bao tah, deichhyna lia hmaohkha ta” tahpa hmô pi ta, Mara chi nah pho laiseih lymâ n’awpa, thyutliapazy hmahsie via lymâ n’awpa py rônah kawpa nôpaw hmiatuapazy ta vaw padua ei ta, chhâ vaw y lymâ awpa lia chhao MTP he â duah lymâ awpa hawhta pachâ sih la, eima Missionary zy ta London khihpi siesaipa ta Mararâh kaw pangai ei ta, he chipho châta Bible nata Hlabu miah taopa ei ta, Khazohpa ta Missionary hmâpa ta, he chi pho he a lei lei n’awpa ta miah a paduapapua haw.”
“Thâtihpha khaihna zawhzi ta District council chhao Khazohpa ta miah pie ta, Khazohpa lâ liata alynabie reih ngâthlâh ha awpa eima châ. Khazohpa ta a eihrâh kawpa ta chi pho a paduapa na eima châ e tahpa he thyutliapazy ta nama my lei awpa he a za peimawh ngaita kaw.”
“Khazohpa ngiachhiena vâta North-east liata District council hry liata uhthei viapa hawhta miah ama moh laih, chazy cha, eima thai vâ, so vâ châ vei, Khazohpa ngiachhiena vâ deita a châ.”
“Awnanopa, District council nata MTP (NGO) he hriaparaohna phapa eima hnei lymâ awpa a byuh. Khazohpa khozie hawhta rai eima hria khoh lymâ awpa he a peimawh ngaita kaw.”
“Hmo eima taopa heta chi nah pho pei a hria ma tahpa chhao he eima pachâ tyh awpa a byuh. Missionary zy eima râh leilô liata amâ pabu pâ. Thyutliapazy nôpi nôvah â chhaihpa ama hluh dâh, broken family a hluh bâ dâh, paritheipa sei liata â tâhpa ama hluh dâh, thyutliapazy hrona a pahlei hapa ama hluh dâh, eima moh pasia awpa he a za peimawh ngaita kaw.”
“Chhôhkha thokha la, eima râh he thyutliapazy laiseih n’awpa châta pha khao vei tah ei ta, ama hnei ma hnei vei ma, viahrâh lâzy ama sawnah ama pasiesa ngâ kaw. Eimâ taopathi awpa he aza peimawh ngaita kaw.”
“Eima public general hro rai he za moh tua sih la, easy money sai pachâ bâ pi ta, tiamana hro rai pachâ khao leipa pi ta, chavâta, eima mind set eima thla awpa he aza peimawh ngaita kaw.”
“Kei chhao riethei kawna chôta châ achu laihpa châ na ta, Khazohpa ngiachhiena vâta ei chuna ei kaw patlô hualua hra, achhuahna khâchâ eima hnei khiahta la, hlaotlohna a vaw y laih thlâh ha.”
“Trade licence cha pie pi ta, viahnahzy hnohta thlakha ta thykha ta pahmâsa ei chi ta, nama palôh namâ patlâhsa kaw. Tiamana hro he eima hnei hluh awpa a za peimawh ngaita kaw.”
“A hluh khia hmâh hluh, a chyh khia hmâh chyh, eimâ mohpakia awpa a za hluh ngaita kaw. Atanoh he leadership lia nata popularity lia ngâlâh bua leip’aw sih la, Pawhrâhpa pakha ta he hawhta reih ta, eima hmo miah parupatuhpa ahyma châ e, tahpa ta alaichadai pi ta, MTP member a vaw châ thlâh haw. Ataopathi n’awpa he a za hluh ngaita kaw.”
“Thâchhie â reinazy a hluh dâh, chyhsa vâtlâh ry lâ, everage ry lâ liata ypazy hena chyhsa thâchhie saina ama reih e ama tah. Eimâ mohpasia awpa a byuh ngaita kaw. Mydi ta thyu pi ta, Khazohpa bie reipazy, thlahchhâ zy, achhyna o pangai hluhzy eimâ chhuah lymâ awpa he a za peimawh ngaita kaw. Khazohpa hmia pasahna châh eima pahno vei khiahta la he chi pho he a boh khao vei tahpa eima pahno awpa a châ.”
“Election vaw hnei ei chi ta, ahy rai vaw tloh u la, kô thiehpa tawhta la, chhihtuh thiehpazy chhaota, DC lâ chhao hrua pâ hr’aw pi ta, drugs adyuh khoh pi ta, major operation eima hnei khoh tua aw.”
“Programme pachhuahpanohpa châ ta, a daihtita liata athao thei beih pi va, punctual beih pi va. Ataopathi awpa eima hnei hluh ngaita kaw,” tahpa ta khichhai laipa ta pasyunabie pha kawpa a reih.
Kô 2022 – 2025 likawh liata MTP members a vaw pahâhapazy taokheina one-minute silence hnei khai tawhta Revd. HB. Samuel, Biatuhpa, Chapi Pastor Bia ta taokheina thlahchhâna a hnei.
Puhpa R. Israel Chozah, GS MTP General HQ ta report pie ta, MTP Branch, Meisavaih East nata MTP Branch, Siahatlâh zy ta hla angia kawpa ta ama paryh. Chakhei MTP Sub-HQ zy ta Sawlakia pahnie kawpa nata angia kawpa ta ama lâh.
Laihsa Jessica B. Khuhly ta pahnie kawpa ta hlasapa ta zawpi a palôhpahawh.
CEM he Puhpa M. Chiadung, EM i/c Soil, etc., Puhpa N. Lalrosanga, Vice Chairman Planning, Puhpa Beihu Nôhro, Deputy Chief Whip, Puhpa B. Dawpho, MDC, Puhpa LM. Beingalai, I&PO, Puhpa John M. Beilaisei, PS to Chief Executive Member, Puhpa Pawsa Lava, Asst. I&PO, Puhpa L. Khai-u, UDC, Puhpa T. Pabua, Cameraman, Puhpa K. Nehemia, Cameraman, Puhpa Jeffrey Khara, Editor, Moonlight nata Puhpa C. Lalramnghaka, Editor, Kawl Eng zy ta ama zi.
Machâ K. Pawkhu, MTP Patron Member, New Laty ta thlahchhâna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
