PRESS RELEASE
NO.93/2026
SIAHA, 04 Phiapi, 2026 (Pakhynoh): Atanoh my dawh 11:00 AM khata MADC Golden Jubilee Hall, Siaha liata MSO General HQ, Siaha pachhuahpanohpa Mara Students’ Organisation aduana ei 61-na noh ahmâhpa châ ta, Puhpa M. Laikaw, Hon’ble Chief Executive Member, MADC chata Khichhai Laipa châpa ta â hmâkhei ei.
Programme he St. Henry Nôtlia, Asst. Gen. Secretary ta chhihtha ta, Rev. VBH. Sathei Thlyutha, Patron, MSO Gen. HQ ta Abeipa lâta pavaosana devotion daihti â hmâh.
Puhpa Judson KT. Zephatha, President, MSO Gen. HQ ta Welcome Speech reina a hnei.
Puhpa M. Laikaw, CEM, MADC chata, “Atanoh MSO aduana ei 61-na noh alyna programme ahmâh awpa ta â vypa zydua samaw ei cha hlâ ei,” a tah.
“MSO aduana ei 61-na noh liata Chief Guest châ awpa ta khokheina vaw to na ta, ei ly hmeiseih. Atahmâ ta sawhkhâna sie ngâhaipa lia heta Awnanopa nata NGOs zy chhaota pha kawpa ta raihria khoh sih la tahpa he eima first priority a châ.”
“Chipho chyh kawpa, Khazohpa ta Missionary hmâpa ta miah padua ta, a châhta eima hriaparaohna liata avaw eichhia tyh hr’ei sih la, ahmiahao pathlah thai’pa châ leipa pi ta, Mara chi chyh kawpa eima chapa atheithlâhna chôta, Mararâh thapasana hnei lymâna chôta rai eima hria lymâ awpa a châ.”
“Chi nah pho pabohsa n’awpa ta NGO zy a vaw duah ta, ahryuh lei paw sih la, chi nah pho thapasana hnei lymâna chôta lôraoh kawpa nata tiama kawpa ta rai eima hria lymâ awpa a peimawh ngaita kaw.”
“MSO liata eima hria nota Supplementary exam centre Lôlei liata ypa cha, eima theina rakha ta Siaha lia soh awpa ta hmahla pi ta, Siaha lâ sopa a vaw châ ha hra. He dei châ leipa ta Shillong liata Marasaw achuhaipazy châta Hostel a y thei n’awpa ta Puhpa S. Vadyu, CEM, MADC hnohta tlôkhei pi ta, eimâ hawnazy pachâ peimawh ta Shillong liata Marapasawzy châta Hostel sopa a vaw châ haw hra.”
“Paritheipa ta O to miah angiahnao ta, Pastor O a ngia hra, Machâ O a ngia hra, Politician O, etc a ngia hra. Châ achu patlô hapa hro parao hra, achu ngâhaipa hro parao hra, thyutlia thyudyupa hro parao hra. Paritheipa heta Chaihrai leipa ta eima luh a la ngâ kaw. Paritheipa he lôraoh kawpa ta eimâ dyuh lymâ awpa he a peimawh ngaita kaw. Chyhsa hmâtlâh kaw châ thlâh ha awpa hro thata parao ngâ kaw ta. Eimâ dyuh lymâ awpa he a peimawh ngaita kaw.”
“Eima hmiahaopa lai chaipa Drugs he eimâ dyuh lymâ awpa a châ. Marasawzy Viarâh liata châ zâ chu ei ta, thokhazy la achu pha hoh leipa ei ta, certificate zy châlei ei ta. He hawhta châ achu hoh leipa ei ta certificate ama chaleipa he âmo nata âmo adôvei ei ta, nô nata paw dôvei ei ta,Mararâh dôvei ei ta, a pei hmeiseih.”
“Fake document hmâpa ta council liata rai a vaw hiahpazy cha chado leip’aw pi ta, fake document hmâpa ta council liata rai a hriapa cha eima pabâh lymâ aw.”
“Hmo do leipa tao achhuah leipa ta, tiama kawpa ta châ achu sih la, adona pachâ peimawh sih la, Khazohpa china chô lymâ ta hmialâ tôh lymâpa ta Chi nah phoh châta tiama papua lymâ suh vy,” tahpa ta pasyuna bie pha kawpa Khichhai Laipa ta a reih.
Puhpa N. Ferdinand, Gen. Secretary, MSO Gen. HQ ta report piena a hnei.
Laihsa Teresa Ngianô Hlychho nata Laihsa Jessica Ngôdy Hlychho zy ta pahnie kawpa ta hlasapa ta zawpi ama palôhpahawh.
Puhpa M. Laikaw, CEM, MADC he official lâ tawhta Pihnô S. Lalmuanpuii, Sr. LAO, MADC, Puhpa Pawsa Lava, Asst. I&PO, MADC nata Puhpa K. Nehemia, I&PD, MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
