PRESS RELEASE
NO.66/2026
SIAHA, 15 Thlazoh, 2026 (Pachynoh): Atanoh dawh 1:30 PM khata Siaha DFA Playground liata Siaha District Football Association pachhuahpanohpa Indian Independence Day Celebration Football Tournament Final 2026 Programme cha Puhpa Beirahmô Syhly, EM i/c RD, etc MADC chata Khichhai Laipa (Chief Guest) châpa ta â hmâkhei ei.
Programme he Puhpa VT. Martin Vabeiduakhei, President, SDFA ta chhihtha ta, Puhpa T. Samuel, Sr. Advisor ta Abeipa lâta pavaosana devotion daihti â hmâh.
Puhpa Beirahmô Syhly, EM, MADC chata, “Football hmâpa heta paritheipa adyuhna châta hmah ei sih la, thyutliapazy football team liazy ta pahlao ta, football nama pakhaihsa thei lymâ khiahta la, paritheipa nama pathleihsa thei ha tahna a châ aw,” a tah.
“Chavâta atanoh he su liata â vypazy, thyutliapazy paritheipa ama pathleih thei n’awpa ta hmahla chyu awpa ta ei cha hrua chyu ei.”
“Sapa hnatlâna a pha vei khiahta la, khihsatôhtu pha thai leipa ta, palôhru tha tlô thai hra vei. Sapa hnatlâna, hri-iah pathaihna hnei awpa ta cha eima pôhpa apielyu hluh awpa byuh ta, cha pôhpa apielyu awpa ta cha Sports pyly hena a peimawh. Sapa hnatlâna, hri-iah pathaihna heta khihsatôhtu zy, hri-iah pathainazy tlôkhei khai ta, thaina sona zydua chhao a tlôkhei khai hra.”
“Football final match akhaih awpa team zy khokheina cha hlâ chyu ei na ta, tiama kawpa nata pha kawpa ta akhaih awpa ta khokheina ei cha hlâ chyu ei,” tahpa ta Khichhai Laipa ta pasyunabie pha kawpa a reih.
Clara K. Melita ta pahnie kawpa ta hlasapa ta zawpi a palôhpahawh.
Model United Football Club nata Meisavaih Football Club zy ta Final Match akhaih ei ta, MUFC zy ta 3-1 ta ama tlô.
Puhpa Reuben F. Lalhruaizela, Assistant Match Commissioner ta report piena hnei ta, Puhpa Khusa Khaila, Vice President, SDFA ta vote of thanks reina a hnei.
ISSUED BY:
Information & Publicity Department
Mara Autonomous District Council
Siaha.
