PRESS RELEASE
NO. 63/2026
SIAHA, 14 Thlazoh, 2026 (Chutynoh): Atanoh dawh 12:00 Noon khata Puhpa M. Laikaw, CEM, MADC chata a Official Chamber (Chhôhpadâh) liata Media-zy Press Meet a hneikhei ei.
He Press Meet hneina liata Puhpa M. Laikaw, CEM, MADC biereipazy:
Atakô India Independence Day ei 80th-na eimâ kaw hmâh awpa liata Maraland zawpi zydua alykheina cha hlâ chyu ei na ta, Samaw ei cha hlâ ei. Atakô I-Day alyna programme he State Sawhkhâ nata MADC â noeih ta ahmâh awpa a vaw châ thlâhpa he a chhâpa nata a vâpa zawpi hnohta reihpasia’pa a byuhpa ta ei pahno.
MADC he eima pahnopa hawhta Khazohpa nata eima chhituh hmiatua penawhzy hriapasana zawhzi ta kô 54 tlai a vaw sie haw. Eima Budget he State sawhkhâ ta kô tota tovyuh (Fund Allocation) miah apiepa hawhta tao tyhpa châ ta, kô chhâna lâta hlao âdaih leipa cha Revised Estimate (RE) ta pabie lymâ tyhpa a vaw châ, chahawhna chata 1st State Finance Commission â vaw duah tawh chhaota RE cha pie lymâpa eima châ. Kô 2023-24 FY taihta RE he pie lymâpa eima châ. Cha nota Mizoram liata ZPM Sawhkhâna â vaw duah tawhta kô 2 châta (2024-25 & 2025-26 FY) RE tlawkha hmahta piepa eima châ khao leipa vâta MADC ta thla 1 nata khophie hlao pie awpa hnei khao vei. Chavâta atanoh Maraland zawpi, Awnanopa, Achuhaipa, Sôdaohpa, Ku raihriapa mo to châta rairuna atlôhpa a châ.
State sawhkhâ chhaota kô to ama Budget khô lâta Supplementary Demand ta sôh adaih leipa Centre ta pie ta, ama pamai tyhpa a châ hra. Mizoram sawhkhâ ta kô 2024-25 FY châta Supplementary Demand Centre tawhta sôh 3512.33 cr, kô 2025-26 FY châta 3724.25 cr, a hmô nota ADC zy hnohta tlawkha hmahta miah a pie khoh leipa he Riasawpazy mohôh ta miah a mohôh tahpa â lâna châ ta, atahmâ he LADC ta 7000 Lakhs hryh, CADC ta 6300 Lakhs, MADC ta 2500 lakhs hryh leibâh hneipa ta miah a soh. He hawhta State Sawhkhâ ta miah a taona dâh he palôhpasa â chhih eima tah hmeiseih. Mawrâh liata Congress, MNF a vaw sawhkhâ tua penawhzy ta he hawhta ADC chô liata ku kaw pathla beih veih ei. Sawhkhâ sie dâh tyhpa a châpa vâta a châ.
Chief Minister, Mizoram ei hluhpi ahmôpa ta RE he hiapa châ ta, ano chhaota hlao thiehpa vâta MDC Executive, Ex-MDC, Family pension apôhpa nata Staff Salary increment, DA apôhpa nata Officer & Staff Promotion & Upgradation, Officer pension benefits etc, (Hlao châta hmâpa) zy cha ei cha pie aw ei tahpa ta ei hluhpi eima MADC chhituhpa nawhzy hnohta a vaw chho tyh. Lai nata Chakma zy Instalment (2nd quarter) cha papua khaipa a châ tawh chhaota MADC File cha hâta eikha hlei tlai pahawhpasâhpa ta zâhnia tlai kha papuapa a châ. Atanoh taihta tlawkha hmahta RE & Additional Fund piepa châ ma pi. MADC ta ahriatuhpa hlao he a thlachareih ta 1700 Lakhs rachhôh a raihpapua tyh nota thla 1 nata khophie hlao Mizoram Sawhkhâ ta maniah a pie khoh khao leipa vâta eima râh ta rairuna eimâ tyhpa Maraland zawpi ta a maohphaohtuh siapa Mawrâh Sawhkhâ a châzie eima pahnopasia awpa chhao a pha kaw.
He hawhta râh zawpi miah tlyhny ta miah pathluapa-eih khohpa State Sawhkhâ nata hmaohkha ta I-Day programme aly kawpa ta ahmâh khoh awpa he MADC Executive Committee ta âryh a tah leipa vâta atakô I-Day he MADC ta a eih ta eimâ hmâh awpa a châ. He chôchâh liata Dt. 13/08/2026 noh ta All Political Parties, All NGO’s, Church Leaders & MADC Leaders Joint Meeting chhaota MADC bietluna apyhkheipa châ ta, support lymâ awpa ta bietluna a vaw taopa vâta All Parties, All NGOs, Church Leaders zy chô liata alynabie eima reih hmeiseih. Râh Cause liata zawpi chhao apôhkha sih la, palôh miakha phaohpa ta keih chakâ lymâ awpa ta eimâ hrua hra.
Atanoh duasu liata cha LADC & CADC zy nata Joint Meeting hnei hmâ’pa a châ leipa vâta âmo rypaohhna hawhta vaw sie chy aw ei ta, he khai tawhta Joint meeting hneipa ta State Sawhkhâ chô liata eima palôhtlâh leina zydua hmaohkha ta eima zawpi nata eima Autonomy pabohsa ta palaiseihsa n’awpa kyh liata keih eima chakâ khoh lymâ hra aw.
Atanoh Mawrâh Sawhkhâ (ZPM) ta sôh hmâpa ta âdo lei kawpa ta miah riepako ta, eima Autonomy miah a siehnao awpa hawhta achhuahnohna chhao he MADC Executive ta cha riahpha kawpa ta eima MADC Autonomy pabohsapa ta, zawpi châta â duah lymâ aw tahpa reih khoh na ta, atakô I-Day he aly kawpa ta MADC ta a pachhuahpanohpa Siaha MADC Office Complex nata Tipa DAO Office Complex liata namâ vaw hlao chyu awpa ta zawpi eimâ hrua.
Ei châ ly kaw ei.
May God bless Maraland.
ISSUED BY:
Information & Publicity Department
Mara Autonomous District Council
Siaha.
