SIAHA, 30 Nawh, 2026: Cooperation Department, MADC hmahlana ta Noh-aotlâh nata Siata khih liata MPACS (Multipurpose Primary Agriculture Credit Society) pahypa a châ.
He MPACS sânopazy he Shri Udit Prakash Rai, IAS, Commissioner & Secretary to the Government of Mizoram, Cooperation Department ta a pahy.
Office pahyna daihti liana heta, Shri Udit Prakash Rai, IAS ta biereina hneipazi ta, Cooperation Department, MADC hmahlana ta Siaha District liata MPACS office su no liata pahy theipa a vaw châpa cha aly âchhihzie reih ta, he MPACS zy ta service nano nanopa ama tao theipazy he khitlâh zawpizy ta pasô thaipa ta hmâh phahnai chyu awpa ta zawpi hrua ta, charaohpa ta MPACS Society zy hnohta pasyuna hnei ta, khitlâh châta byhnâ châ via lymâ awpa nata laiseih via lymâ awpa ta a pasyu hra ei.
Puhpa Abraham Beirazi Khithie, Additional DC, Siaha District nata Puhpa NS. Beihruasa, CAO, Cooperation Department, MADC zy chhao biereina hnei hra ei ta, MPACS office zawpi châta a phahnaizie zy, khitlâh châta byhnâ a châziezy nata hmahlana nano nanopa a y via theipazy reina ama hnei hra.
Atanoh liata MPACS Office ama pahypazy he, Noh-aotlâh Consumer Cooperative Society Ltd. (MPACS) nata Sanghe Multipurpose Cooperative Society Ltd. (MPACS) zy ama châ.
Shri Udit Prakash Rai, IAS, Commissioner & Secretary to the Government of Mizoram, Cooperation Department ta atanoh MPACS Office a pahyna lia heta Puhpa Abraham Beirazi Khithie, Addl. DC, Siaha nata Puhpa NS. Beihruasa, CAO Cooperation Department, MADC zy hleikhô ta, Pihnô C. Galilee, APO, BDO, Siaha nata Cooperation Department, MADC staff zy ta ama zi hra.
