PRESS RELEASE
NO. 106/2025
SIAHA, 4 Thlarâh, 2025 (Pobienoh): Puhpa M. Chiadung, EM i/c Soil, etc., MADC chata, Siata khih liata Teachers’ Day Celebration Programme cha Khichhai Laipa (Chief Guest) châpa ta a hmâkhei ei.
Programme he C. Vanlallawmi, Secy. i/c Education ta chhihtha ta, Evan. LC. Khailawng ta Abeipa lâta pavaosana devotion daihti â hmâh.
Puhpa M. Chiadung, EM, MADC chata, “Siata khih nôpawpa, Pachutuhpa nata ei hrialâhpa zydua PACHUTUHPA NOH ta khichhai laipa châta nama hruana he za âchhih tah palôh hmeiseihta alynabie ei reih,” a tah.
Khichhai laipa chata, “Siata khih tawhta atakô liata achuna liata ataopha chaipa sâkhana Rs.10,000, sanona Rs. 7,000 nata sâthôhna Rs. 5,000 lymâ pie aw ei na ta, MPSC coaching akiapa châta Rs. 5,000 ama chuna châbu chaleina châta ei pie aw ei,” a tah.
EM chata, “Khizaw hmahsiena thliena chaipa cha Achuna he a châ. Achuna liata hmahsie viapa maih râh hmahsiepa ama châ. Eima râh liata chhao Achuna liata hmahsie viapa khih cha hmahsiepa khih ama châ. Cha tlupo ta peimawhpa a châpa vâta keimo chhao palôh hmeiseih ta pachâ ta hmah eima la khoh awpa he Abeipa ta tao awpa miah a piepa hryta peimawh chaipa a châ nahta ei pangiasa. Development hlâ chhaota peimawh viapa cha Achuna he a châ. Siata khih hmahsie awpa ta cha Achuna liata lôhraoh kawpa nata yzie hnei kawpa ta eima hria khoh awpa a peimawh.”
“Deichhy byuhpa deichhy ta bao ngiahpa eima bao lymâ awpa he eima tao awpa hawhta eimâ pyh cheingei awpa a peimawh. Siata khih nôpawzy pachâna miakha liata eima sie awpa ei khoh. Reiraoh leina he raona châ ta, cha raona cha eima khih liata a y awpa eima paryhsa awpa châ vei.”
“Pachutuhpa rai he Missionary rai nata â lyu. Hawtipa, palôh pathaih kawpa lâpi dopa nata thaina/sona liata chhihtha awpa he pachutuhpa maophaohna a châ. Cha maophaohna eima ngiatlâh liata â pahniehpa cha Khazohpa asaohiah lymâna chôta hlaopatloh eimâ chhuah lymâ awpa a châ.”
“Chavâta Pachutuhpa cha a tha a thi awpa châ vei. Kyhpachâna a hneipa, paritheipa a tao leipa, Khazohpa chyhsa ama châ awpa a châ. He hawhpa pachutuhpa eima châ mâh leipa chhao ta châ cheingei eimâ chhuah awpa a châ. Sona nata novâhna cha Abeipa tawhta puapa châ ta, a lâpi pahmôtuhpa deikua pachutuhpazy nama châ.”
“Chavâta Pachutuhpa cha kyhpachâna a hneipa, Khazohpa chyhsa, chyhsa tiamapa, zawngiah theipa, khokhei viapa a hnei leipa chyhsa ama châ awpa a châ. Eima khih hmahsiena hmeiseihpa tlôkheituhpa cha Pachutuhpazy he châ ei chi ta, he maophaohna he eima khih liata Pachutuhpazy ta a sia kawpa ta namâ pahnopa dei châ leipa ta hlao patloh namâ chhuah cheingei awpa ta ei châ haw hmeiseih ei. Nama tiamana zy, hriapasana zy, kyhpachanazy Abeipa ta pahno thlâh ha ta, eima khih châta byhnâ a vaw châ cheingei aw.”
“Tanoh ta achuhaipazy daihti rei leipa liata eima rah nôpaw vaw châ awpa nama châna he namâ pahnopasia awpa ei khoh. Chavâta achhuahna siapa, reingiahna, tiamana, riahphana nama hrokhei cheingei awpa ei khoh. Eima khihsa rairuna vâta châ achu leipa ta eima y awpa châ vei. India President parohpa Puhpa APJ. Abdul Kalam chhao Primary â chu nota roleipa Bu chalei n’awpa chhao a hnei leipa a châ. Achhuahna sia kawpa hneina chôta, cha ama rairuna cha riahpha kawpa ta hmiachhy ta, India President dei châ leipa ta khizaw a y chhôhta a moh dia khao lei awpa “Missile Man” tahpa bipa a châ.”
India Prime Minister, Puhpa Modi chhao a chyh via no cha thopi zuah tyh ta, rairu kawpa chhôh tawhta laiseihpa a châ. Chhôhkha rairuna cha riahpha kawpa ta, hmiachhy lymâ ta, tahmâ India Prime Minister dei châ leipa ta khizaw ta Leader pakha hawhta ama mopa a châ.”
“Keimo nôpaw chhaota hmahsiena hropa Motor, o phapa, atobina etc. lia arâpasua leipa ta lâpi dopa, achuna liata eima sawnah chhihthana kyh liata eimâ râpasua awpa he a peimawh,” tahpa ta khichhai laipa ta pasyunabie pha kawpa a reih.
Valeria KC. Vanlalchhuangi, Siata – 11 P/S ta Teachers’ Day message reina hnei ta, Puhpa John VT. Hniehu, IDO, MADC, Puhpa T. Hrebi, Chairman Joint VC nata Puhpa Malsawma, Chairman STU zy ta pasyunabie pha kawpa reina ama hnei hra.
Laihsa Clara K. Melita, Nelly K. Lalfakmawii, Sanghe Middle School, Marina, Primary School – 11 Siata nata Sanghe Middle School Siata zy ta pahnie kawpa ta hlasapa ta zawpi ama palôhpahawh.
Raekhui, President MSO Branch Siata ta welcome speech reina a hnei.
Programme chhâ tawhta kyhchhina pati aly kawpa ta dôkhohpa a châ.
Puhpa M. Chiadung, EM, MADC he Official lâ tawhta Puhpa Vabeikhaihmô Solo, SCO, MADC, Puhpa John VT. Hniehu, IDO, MADC, Puhpa Pawsa Lava, Asst. I&PO, MADC nata Puhpa Martin L. Hlychho, Cameraman zy ta ama zi.
ISSUED BY:
Information & Publicity Department
Mara Autonomous District Council
Siaha.
