PRESS RELEASE
NO.19/2026
SIAHA, 19 Hmypi, 2026 (Pohbiehnoh): Atanoh dawh 1:00 PM khata MADC Golden Jubilee Hall, Siaha liata MTP General Headquarters, Siaha pachhuahpanohpa MTP Kô phuah (Parithei Adyuh) Kick Off Programme cha Puhpa M. Laikaw, Hon’ble CEM, MADC ta â hmâkhei ei ta, kô phuah pahyna a hnei pâ hra.
Programme he Puhpa FC. Khihnia, Vice President, MTP Gen. HQ, Siaha ta chhihtha ta, Rev. B. Beilua, Sr. Adviser, MTP Gen. HQ, Siaha ta Abeipa lâta pavaosana devotion daihti â hmâh.
Puhpa M. Laikaw, Hon’ble CEM, MADC chata, “Atanoh ta Programme eimâ hmâpa he noh peimawh ngaitapa a châpa ta pahno na ta, paritheipa adyuhna he eima thyutliapazy rescue operation peimawh kawpa nata thlai ta hmahla byuhpa a châ,” a tah.
“MTP heta chiehleipazy bao ta chhienoh daihti liata hmia âsahtuhpa châ ei chi ta, tiama nama papua via lymâ awpa he a peimawh ngaita kaw. Eima râh ta a buakheipa paritheipa he MADC ta zâkô kha paritheipa tawhta pathaihna kô ta phuah ta, pakhazie lei châ ma warning pie pi ta, atakô tawhta cha paritheipa ataopa eima patupa maih cha suspend pi ta eima terminate lymâ aw.”
“MTP ta paritheipa adyuhna kô phuah nama vaw hnei thlâhpa he châ ly ngâsâ ei na ta, MADC mohta alynabie ei cha hlâ ei. He paritheipa adyuhna kyh lia heta Mara zawpi, py nata sawhkhâ zydua chhaota cha support pi ta, eimâ hlao khai thlâh hrana tahpa he nama pahno awpa ta ei reih khoh kaw.”
“MTP he Mararâh liata NGO lai chaipa châ ta, Mara zawpi apahniehna na a châ e tahpa he nama pahno awpa byuh ta, bie chata khoh kaw ei na ta, discrimination nama hnei awpa châ vei. Eima râh he râh phapa, râh pahrâ tlâh, râh thlalôh chhihpa ta eima tao awpa he eima zydua maophaohna na a cha e tahpa eima pahno chyu awpa a byuh.”
“Pathaihna kyh liata LAD, MADC nata miah chhihtha ei ta sâkhana la ha pi ta, eima hmiahao lai chaipa Drugs adyuhna kyh liata MTP Gen. HQ chhihthana ry liata paritheipa Drugs he eimâ dyuh lymâ aw. Maraland he Drugs free ta eima tao awpa a byuh.”
“Bieso sâkha liata cha chyhsa zachhihpa châ awpa ta la, ano nata ano zachhihpa ta atao tua mawh sy, a tah. Drugs adyuh awpa ta cha eima pathaih tua awpa a byuh. Paritheipa adyuhna chôta MTP Office liata paritheipa roh pahnâhna chôta raizy eima hria thlâh hapa a châ khiahta la â do thai vei. Chavâta, keimo he eima pathaih tua awpa a byuh.”
“Hmo khôchiehpa liata chyhsa ta he hawhta reih ei ta, MTP ta paritheipa sahma patu ei ta, âmo sahma roh ama pahnâh thlâh ha na tah tyh ei ta, function peimawhpa hneina liata MTP leaders nah na sahma roh ama pahnâh thlâh ha e, adyuhtuhpa hmahta a roh ama pahnâh thlâhpa cha tahpa reih tyh ei ta, â do la, â do ngyu vei. Decision sia kawpa tao ta, keimo he eima pathaih tua awpa a byuh.”
“MTP ta Paritheipa adyuhna kyh lia heta MADC 12th Term sie ngâhaipa heta a byuh â ngiahna maih liata nôpaw eima cha châpa ngâthlâh ha aw na tahpa he ei reih khoh kaw. Khataih lâ rai vaw sih la, thyutliapa paritheipa iahzaipa he ama hluh ngâsâ. Chhôh to, khih to ta â rôhkhei chaipa a vaw châ. Tiama papua ta eimâ dyuh khoh lymâ awpa he a peimawh ngaita kaw.”
“Mydi dawhpangawh ta thyu na ta Achhyna o pangaipa ta mydi thlahchhâna lâ ei zu no ta, parithei taopa a py py ta ama y thlâh ha tyh. Khichhôh liata Drivers apahâ n’awpa ta ama taopazy he paritheipa tao n’awpa ta ama hmâh thlâh ha tyh. A pei hmeiseih.”
“Agape Home lia a tlôh khao leipa ei ta, TNT lâzy apaphao pi ta, Achhyna O chokua via lymâ pi ta, Sunday School enrollment chyh via lymâ pi ta, a pei hmeiseih. Hnabeidy leipa ta tiama papua ta eimâ dyuh lymâ awpa he a peimawh ngaita kaw,” tahpa ta CEM ta pasyunabie pha kawpa a reih.
Puhpa S. Vabeihasa, President, MTP Gen. HQ, Siaha, Puhpa Beimosia Lapi, Addl. Superintendent of Police, Pihnô Lalrengpuii Ralte, CMO nata Major Sukraj Singh, 20th Assam Rifles, Siaha zy ta pasyunabie pha kawpa reina ama hnei hra.
Puhpa N. Solomon Beihlôtha, General Secretary, MTP Gen. HQ, Siaha ta vote of thanks reina a hnei khai tawhta Rev. NC. Vabeilua, Sr. Adviser, MTP Gen. HQ, Siaha ta byhnâ awna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
