PRESS RELEASE
NO.11/2026
SIAHA, 05 Hmypi, 2026 (Pobienoh): Atanoh zâlâ dawh 1:00 PM khata MADC Golden Jubilee Hall, Siaha liata Puhpa M. Laikaw, CEM, MADC ta Rev. Dr. Laiu Fachhai châbu ropa sâthôh a palâhâh, chazy cha:
- Mara reih: Na cheih aw ma, na pahlei aw?
- Maraland thi hluhna: Eima pachyh via thei.
- Achhaih heih khao lei awpa sy.
Puhpa MH. Tiabi, EM, MADC ta Rev. Dr. Laiu Fachhai châbu ropa sâthôh a palâhâh heih hra, chazy cha:
- Maraland: From a Land of the Gods to Christianity.
- Pâhkao 1938: Lorrain mothlih tlana su nata kô.
- Mara RV’22 hmiapahnosana (Edited by Laiu Fachhai).
Châbu palâhâhna programme he Puhpa KH. Beithie ta chhihtha ta, Rev. B. Beilua ta Abeipa lâta pavaosana devotion daihti â hmâh.
Khichhai laipa (Chief Guest) Puhpa M. Laikaw, CEM, MADC chata, “Information ma eima pie pha vei ma, atanoh châbu palâhâhna liata vaw pua chyh kaw pi ta, Delhi tawhta zâhnia zâlâ ta vaw tlô na ta, châbu palâhâhna banner chhao y va, pei a tahzie,” a reih.
“Châbu rohtuhpa ta tiama kawpa ta ama daihti pahryuhpa nata ama sôh hluhpi hryuhpa ta nata ama thazâh hmâpa ta roh ei ta, pasôna châh chhao pahno leipa pi ta, eima mindset he eima thla bâ awpa a peimawh. Atanoh he hlasa ataopasuana final result na ama phuah aw tahpa châ sala hyhkha eima pua thlâh heih aw. Châbu palâhâh awpa a châ nahta pua hoh pi va, pasôna châh pahno pi va, a pei hmeiseih.”
“Atanoh Rev. Dr. Laiu Fachhai châbu ropa bu charu tlai palâhâhpa vaw châ ta, Art & Culture Department, MADC ta sôh bao tlâ leipa pi ta, ano sôh ta a tao khai bao. Ano private ta Mara chi nata pho thapasana nata future pachâpa ta tao ta, aly’pa a châ hmeiseih.”
“Alykheituhpa attendance a vaw chhie kawpa deikua pei ei tah kaw. District council liata hriapa nata su hro lâ liata ypa Marasaw zydua, atahmâ tawhta la châbu Mara reih ta ropa palâhâh daihti liata pasôna châh pahno ta, pua hluh awpa achhuah chyu suh vy.”
“A pahchaipa ta MADC liata HoDs nata Officers zy châbu palâhâhna programme he nama pachâ peimawh via awpa ta bie eimâ ta khoh kaw.”
“Rev, Dr. Laiu Fachhai he Mission field liata vâropi vaw hria ta, eima râh lâ kaw pua ei ta, ECM HQ Siaha liata vaw hria heih ta, eima râh châta, Awnanopa châta contribution pha kawpa vaw tao ta, Pastor mopâtlâh châ kawpa, nôpawpa a vaw châ. Atanoh a châbu ropa sâcharu tlai palâhâh thei awpa a vaw châpa he aly âchhih hmeiseih,” tahpa ta CEM ta a reih.
Guest of Honour Puhpa MH. Tiabi, EM, MADC chhaota, Rev. Dr. Laiu Fachhai châbu ropa sâcharu tlai pahâhâh thei awpa a vaw châ thlâhpa aly âchhih zie, a reih hra.
EM chata, “Mara reih acheihpa eima châpa vâ deita ta District Council a hmôpa châ pi ta, chavâta, eima reih Mara reih he eima pasô kaw awpa byuh ta, Mara reih cheih hluh ta, a ro chhao eima thai kaw awpa a byuh,” a tah.
Guest of Honour chata, “Rev. Dr. Laiu Fachhai hnohta ahawna ei tao khohpa cha , Mara reih ta châbu roh via lymâ ta, papua via lymâ awpa ta ei haw pâ heih hra,” a tah.
Puhpa Pachi Hlychho ta Mara reih: Na cheih aw ma, na pahlei aw? tahpa saichhielie (review) na hnei ta, Dr. S. Beihrokhu ta Maraland thi hluhna: Eima pachyh via thei tahpa saichhieliena hnei ta, Rev. AZ. Beirakaw ta Achhaih heih khao lei awpa sy tahpa saichhieliena a hnei hra.
Dr. Steffi C. Beingiachhiezi, Teaching faculty, Government Siaha College ta Maraland: From a land of the Gods to christianity tahpa saichhieliena hnei ta, Pihnô Lynn H. Ngôhei, Secretary, KHP, ECM Hqrs ta Pâhkao 1938: Lorrain mothlih tlana su nata kô tahpa saichhieliena hnei ta, Puhpa Pabei Hnaihly, KTP EC Member, Bethesda Local Church, ECM & Ambassador Media Ministry Member, KTP Hqrs., ECM, Siaha ta Mara RV’22 hmiapahnosana (Edited by Laiu Fachhai) saichhieliena a hnei.
Laihsa Vasty Azyu nata Laihsa Shebby Hlychho zy ta pahnie kawpa ta hlasapa ta zawpi ama palôhpahawh.
Pihnô P. Chaki, President, MCHP Gen. HQ ta vote of thanks reina a hnei khai tawhta Rev. C. Beima ta thlahchhâna ta daihti a pachhâsa.
ISSUED BY:
Information & Publicity Department
Mara Autonomous District Council
Siaha.
