PRESS RELEASE
NO.124/2025
SIAHA, 28 Phiata, 2025 (Hriaheinoh): Atamy dawh 7:00 AM khata Siaha Vaihpi District Playground liata Puhpa K. Chhuabei, EM i/c LAD, MADC ta Commercial Vehicle Drivers zy meeting a hneikhei ei.
Meeting he Pihnô S. Lalmuanpuii, Sr. LAO, MADC ta a chhihtha.
Puhpa K. Chhuabei, EM chata, “Siaha heta kyh totie liata hmahsiena hmô lymâ pi ta, cha liana chata, pathaihna kyh liata eima hmahsienapa he aly â chhih kaw tarawpa ta, tao awpa hluhpi a y. Kô 2023 lia khata Mizoram pôhpalôhpa liata pathaihna ataopasuana liata sâthôhna châ pi ta, kô 2024 liata sânona châ heih pi ta, atakô he sâkhana châ eimâ chhuah,” tahpa ta a reih.
“Anodeikua cha, pathaihna kyh liata hmahla awpa heta, zawpi he peimawh pi ta, sawhkhâ hmahlana liata department to nata NGOs, Awnanopazy hriaparaohpa ta, thata hmahla na y ta, hri-iah nano nanopazy tawhta aboh awpa ta cha eima chheipâhzy he a pathaih’pa a peimawh. Chata a châ nona chata, Commercial Vehicle Drivers zy nama peimawh kaw. Chyhsa hropa pathaihna kyh chho ta pahnosana kyh liata hmahla awpa ta nama peimawh ngaita kaw, cha liana chata, nama passenger hluh viapa ta nama motor ama kia nota hmo pualeipa motor chhôh tawhta thy chakhyh thlâh tyh ei ta, he kyh liana heta hmah maniah nama lakhei awpa eima khoh ngaita kaw,” tahpa ta ahawna a tao.
“Siaha khichhôh nata khôtho lâ nama sieno chhaota, nama passenger zy pathaihna kyh liata pachutuhpa maniah châpa lymâ awpa ei chi ta, ei châ haw hmeiseih ei. Khazohpa ta ano hawhta pathaih awpa ta miah tao ta, cha hleikhô ta Bible liata pathaihna a peimawhzie eima hmô hra, chavâta LAD ta pathaihna kyh liata campaign eima siekheipa he maniah bao awpa ta ei cha hrua hra ei. Tanoh ta Pocket dustbin holder eima raipa he thy chakhyh leipa ta hmâh phahnai awpa ta ei châ haw ei,” tahpa ta ahawna a tao chanei.
EM chata, “HIV Aids nata Hepatitis he Siaha District liata hluh kaw ta, India râh chhôh liata Population pachâpa ta Mizoram he â sâh chai ta, District liata Siaha he â sâh chai hra. Eima râh liata HIV Aids nata Hepatitis a pôh via lei n’awpa ta nama passengerzy Condom nata Syringe zy ahlyh lei awpa ta nama chhopasia pâ hr’awpa ta ei châ haw ei,” a tah.
“A chhâ chaina liata, eima râh liata chi hro pho hropazy raihriapa ama hluhna chhâ chaipa nata district hro lâ nata state hro lâ tawhta niebaw â vaw ngia hluh tupa he, eima thathi tu vâ châ ta, tiamana peimawhzie chyhsa hluhvia yna maih liata nama reih hluh awpa ta ei châ haw ei,” a tah.
Addl. SP Puhpa Beimosia Lapi chhaota biereina hnei hra ta, parina chôta ahluahtheipa haopa dâh ta a pasaih leizie reih ta, chata a châ nota, hâta eikha liata pakha chha he cha parina chôta motor ahaopa eima patu ngâthlâh bao, he he thyno (Rs. 20,000) taihta fine theipa châ ta, license taihta cancel theipa a châzie, a reih.
“Ahluahtheipa he accident atyh theipa châ ta, hrona taihta pahlei theina a châ, chavâta, parina chôta motor hao lei awpa ta ei châ haw ei. Document â ki leipa ta ahluahtheipa haopa he dâh ta pasaih leipa ta, kô tlohleipa ta ahluahtheipa haopa chhao he pasai leipa châ hra ta, nama sawnah zy nama nawhta nahzy ta ama vaw hao nahta, a taohtuh awpa cha, nâmo a hneituhpa nata driver-zy pyly châ ei chi ta, Cha hleikhô ta, Siaha lâpi he buah tlôh ta, vehicle park chakhyh leipa u la, nama stand lia ngâlâh ta aduah u la tahpa he traffic police lâ tawhta eima kho chaipa a châ. Chata a châ nona chata, pathaihna kyh liata, eima helipad he a pua kaw tyh, tahmâhlâ chhochhi cha police patrolling taihta atuah tyh pi ta, he kyh he nama passenger zy hnohta vaw reih hluh via u la ei khoh kaw. Nama association group nochâ liata chhao pathaihna kyh liata asohsi awpa ta a vaw pachu via hra u la. Police lâ tawh chhaota nama buana lia maihta cha bao awpa ta eimâ mâ thlâh haw,” tahpa ta pasyunabie pha kawpa a reih,
Pihnô S. Lalmuanpuii, Sr. LAO ta Sanitation pledge a pahneisa hra ei. Puhpa Henry PL. Hnaihly, LAO, MADC ta Pocket Dustbin Holder raina a hnei.
Puhpa Vanlalchhuanliana, SDO(S) ta vote of thanks reina a hnei khai tawhta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
