PRESS RELEASE
NO.41/2026
SIAHA, 09 Patô, 2026 (Pachynoh): Atanoh 11:00 AM khata MADC Golden Jubilee Hall, Siaha liata Mara Students’ Organisation General Headquarters, Siaha nata Education Department, MADC pachhuahpanohpa palyupalihna programme (HSLC & HSSLC Distinction holders with letter marks in four subjects & above, 100% passed school & subject toppers) liata Puhpa M. Laikaw, Hon’ble CEM, MADC chata Khichhai Laipa châpa ta â hmâkhei ei.
Programme he Puhpa Vabeilyma Solo, Vice President, MSO Gen. HQ, Siaha ta chhihtha ta, Puhpa Vabeikhaihmô Solo, Sr. Adviser, MSO Gen. HQ, Siaha ta Abeipa lâta pavaosana devotion daihti â hmâh.
Puhpa M. Laikaw, CEM chata, “Atanoh HSLC & HSSLC liata taopha patluapazy palyupalihna programme avaw hlao theipa zydua MADC mohta samaw ei cha hlâ ei. Atanoh programme liata Khichhai Laipa châ awpa ta na khokheituhpa MSO Gen. HQ Chhihthatuhpazy hnohta alynabie ei hlâ ei,” a tah.
“HSLC nata HSSLC liata taopha patluapazy ama y vâta he hawhpa programme eimâ hmâh theipa châ ta, aly’pa a châ hmeiseih. Palyupalih tlâh châpazy palyupalihpa he hmo pha kawpa a châ.”
“Achuhaipazy taopha patluapazy hlaotlohna hnei awpa heta âmo tiamana hleikhô ta, School liata pachutuhpa zy, O lâta Nô nata Pawzy tiamana vâ châ ta, pachutuhpazy nata Nôpawzy hnohta chhao alynabie ei hlâ hra ei.”
“Achunapa he chhâ thai leipa ta, thlâkhaoh liata a chhâ tahpa ta thaisopazy ta ama reih tyh. Atanoh ta achuhaipazy chi he mylâ hânoh ta eima râh chhihthatuh awpa zy, Officer kaw châ awpa zy, Pastor kaw châ awpa zy, NGO liata chhihthatuhpa kaw châ awpazy nata eima vaih nata tlâh liata nôpawpa kaw châ awpazy châ ei chi ta, atahmâ tawhta tiama kawpa ta châ namâ chu lymâ awpa he a peimawh ngaita kaw.”
“Atahmâ achuna lâta facility zy a pha kaw eima tah no heta, râkha lâta eima za pachâ nah heta, thyutliapazy hro parao theituhpa paritheipa hluh kaw ta, avaih kaw awpa byuh ta, paritheipa sei liata atâh tlamaw lahpi tahpa he namâ vaih kaw awpa a byuh. Thyutliapa châthai thei kawpazy paritheipa iahzaina liata pao hapazy châ achu hoh khao leipa, chhôhkha liata Nô nata Paw pabua ngâthlâh hapa hluhpi y bâ ei ta, nâmo atanoh he su liata avypazy namâ sohsi kaw awpa a byuh.”
“Atanoh ta ei cha pasyu khoh kawpa ei cha, Khazohpa china he nâmo liata khâchâ y sala, Khazohpa china nama hnei lymâ khiahta la, nama hro lâthlôh â do lymâ aw. Apakhy papeimawhsa u la, Sunday school kia papeimawhsa u la, Nô nah paw nata pachutuhpazy pachuna pathlie leipa ta nama papeimawhsa lymâ awpa a byuh.”
“Viasa phaleipazy apakyh ta, lâthlôh do leipa achhih leipa u la, hmo pha leipa ahla sai lymâ ta, riahpha kawpa ta namâ heihsai ngâh lymâ awpa he a peimawh ngaita kaw. Mobile liata hmo pha leipazy sai moh ta daihti pachhâ thlâh leipa ta, hmo pha leipa hnôh nama chhy ngâh awpa he bie chata khoh ei na ta, eima nôpaw hmiatuapazy kha achuna he riethei kawpa ta na ama chatôh papua. Chavâta tiama kawpa ta châ namâ chu awpa he a za peimawh ngaita kaw. Achhuahna sianô kawpa nama hnei awpa he a peimawh ngaita kaw.”
“Atanoh ta palyupalihna he â thaona châ sala, palyupalihna to ta, nama tlâpahnai thlâh heih khiahta la, âdo thai lei paw ta, Khazohpa hmiapasah lymâ u la, kei chhao ei nô ta kheihawhpa hmo rai tao la, Khazohpa hmiapasah lymâna chôta, thlahchhâ tua lymâ mah y tahpa ta na pasyu ta, cha hawhta ei tao lymâ hra.”
“Châ eimâ chu daihti liata chyhsa O liata y pi ta, chanô rai nata chapaw rai pathlua paeina y tlâ leipa ta tiama kawpa ta raihria lymâna chôta châ eimâ chu. Atahma ta achuhaipazy ei chi la, keimo daihti no’pa hawhta châ khao leipa ta, thadâh kawpa ta châ achu ei chi ta, facility chhao pha hra ta, nama vâhnei kaw.”
“Rietheina hriapasana a y tua leipa ta hmo phapa y thei vei tahpa khâchâ nama pathipalôh liata y sala, tiama kawpa ta châ namâ chu lymâ awpa he a peimawh ngaita kaw,” tahpa ta Khichhai Laipa ta pasyunabie pha kawpa a reih.
Puhpa Judson KT. Zephatha, President, MSO Gen. HQ, Siaha ta welcome speech reina hnei ta, Satlia K. Lychhi, Education Secretary, MSO Gen. HQ, Siaha ta report piena a hnei.
Puhpa Beimosia Lapi, Sr. Adviser, MSO Gen. HQ, Siaha, Puhpa N. Beithlapahrua, Secretary i/c Information & Publicity, MTP Gen. HQ, Siaha nata Pihnô K. Sangi, President, MCHP Gen. HQ, Siaha zy ta pasyunabie pha kawpa reina ama hnei hra.
Laihsa Teresa Ngiano Hlychho ta pahnie kawpa ta hlasapa ta zawpi a palôhpahawh.
CEM he official lâ tawhta Puhpa Pawsa Lava, Asst. I&PO, MADC nata Puhpa K. Nehemia, IPD, MADC zy ta ama zi.
Satlia Francis Bôhia, Finance Secretary, MSO Gen. HQ, Siaha ta lymâ raina hnei ta, Puhpa N. Ferdinand, General Secretary, MSO Gen. HQ, Siaha ta alynabie reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
