PRESS RELEASE
NO. 105/2025
SIAHA, 30 Thlazoh, 2025 (Pachynoh): Puhpa M. Laikaw, Hon’ble Chief Executive Member, MADC ta Ahmypi, Khôpai nata Laki khihzy a tly.
Puhpa M. Laikaw, CEM chata, “Atanoh Ahmypi, Khôpai nata Laki khihsawzy ta eimâ phuh vâ châ leipa ta, he hawhpa palyupalihna eima daopa he palôh hmeiseih ta, ei châ ly hmeiseih ei. Keima nata ei hrialâhpa sawhkhâna alykheina a châpa hawhta pachâ na ta, Ahmypi, Khôpai nata Laki khihsawzy chô liata aly hmeiseih na ta, District Council moh chhaota alynabie ei cha hlâ hmeiseih ei,” a tah.
“Khazohpa ta Missionary zy hmâpa ta chi nah pho ta miah padua ta, Awnanopa paduapa vaw châ ha ta, Awnanopa deichhy awpa ta District council miah pie ta, Awnanopa nata District Council he pachhaih thai’pa châ vei,” a tah.
CEM chata, “Khazohpa ngiachhiena topa nata ei hrialâhpazy khokheina topa ta CEM vaw châ na ta, ei hrialâhpazy deichhyna zawhzi ta atanoh taihta sawhkhâna siekhei pazao lymâ theipa a vaw châpa he, Khazohpa ngiachhiena vâ nata ei hrialâhpazy vâ deita a châ,” a tah.
“MADC he kô 50 kaw sie ha pi ta, Khazohpa khoh dâh hawhta eima sie lymâ thei n’awpa ta thlah miah nama chhâkhei lymâ awpa ta ei châ haw ei. Tahmâ ta sawhkhâna sie ngâhaipa heta goal sia kawpa hneipa ta, ryureina pathaihpa, ryureina dopa siekhei ta, new maraland vision hneipa ta he sawhkhâna he kaw sie pi ta, eima system bâhta thla byuhpazy thla laih pi ta, sawhkhâna he a sie ngâ kawpa a châ,” a tah.
“MADC liata sawhkhâ rai hriapazy paritheipa taona chôta raihria haipazy ama pathleih thei n’awpa ta chance pie pi ta, a pathleih khoh leipa cha action eima la lymâ aw. Chahawh pyly hra chata, promotion piena kyh lia chhaota khokhei patluapa y aw vei. Promotion hmôtlâh a châpa cha pathluana y leipa ta pie lymâpa ama châ aw. Biehneina lai viapa chhao a hlaotloh thei n’awpa ta hmahla lymâpa a châ,” a tah.
“Dâh nah phôh hmâpa ta pathluapaeihpa hnei leipa ta raizy la lymâpa a châ aw. Dâh nah phôh â bei chai awpa a châ. Reikheituhpa hnei leipa chhao ama thâtih achu lymâ pi ta, Office kiahphapa, â do kawpa nata tiama kawpa ta rai a hria lymâpa cha promotion eima pie lymâ aw. Ahy hmah khokheipatluapa y aw v’ei,” a tah.
CEM chata, “Achuna (Education) lia heta arâpasua via lymâ si, achuna liata sôh nah thih pahryuhpa he a pasa tah khah ei suh u. Achuna liata sô nah thih hmâpa he investment pha chaipa a châ,” a tah.
“Mara eimâ tobina (dress) zy pasô ta, eima cheihchalo via lymâ awpa a byuh. Mara reih chhao eima pasô via lymâ awpa a châ,” a tah.
“Paritheipa (Drugs) eimâ dyuh lymâ awpa he a peimawh ngaita kaw. Paritheipa adyuh awpa ta py apadua u la, parina chôta Motor haoh ta khihchhôh avaw ngiapa cha, a heihpa liata eima khih nâ vaw ngia heih tita cha, parina chôta motor vaw haoh khao khah y, nama tah lymâ awpa a châ,” a tah.
CEM chata, “Delhi liata eimâ chhai n’awpa Mara House sa haipa châ ta, aly’pa a châ hmeiseih. India liata khihpi lai viapa Bangalore, etc lia chhao Mara House sa via lymâ achhuahpa a châ,” a tah.
“National Education Policy (NEP) 2020 of India ta pachuna (teaching) liata pikheipa reih (mother tongue or regional language) ta achu awpa he pachâ peimawh kaw ta, India sawhkhâ heta school hawtizy châ amâ chuna liata reih hropa ta amâ chupa hlâta cha pikheipa mother tongue ta amâ chupa ama pahno pasia via, thai thei viapa a châzie pahno pasia ta, Khazohpa ta reih miah piepa he pasô sih la, thai achhuah ta, eimâ chu via lymâ awpa he a peimawh ngaita kaw,” a tah.
Puhpa Beirahmo Syhly, EM i/c RD, etc., Puhpa Tiahlei Syuhlô i/c E&F, etc., Puhpa T. Seido, EM i/c Sports, etc., Puhpa M. Chiadung, EM i/c Soil, etc., Puhpa Beihu Nôhro, Deputy Chief Whip zy ta CEM he ama zi hra.
Siaha tawhta Laki khih pangaipa ta eima siena lâta, Ahmypi khih liata programme ahmâhpa châ ta, Machâ V. Zawsia, Primary Headmaster ta a chhihtha. Ahmypi khih liata Breakfast pahâh kawpa dôh khohpa a châ. Khôpai khih liata chhao programme ahmâhpa châ ta, Puhpa C. Rahmô, VC Member ta programme chhihtha ta, Machâ B. Vamo, Local Church Secretary & Middle School Headmaster) ta Abeipa lâta pavaosana thlahchhâna a hnei. Machâ HC. Dahlu, Fin. Secy Local Church & Primary Headmaster retired) ta thlahchhâna ta daihti a pachhâsa. Khôpai khih liata programme ahmâh khai tawhta nohchhô pati aly kawpa ta dôkhohpa châ ta, Laki liata zâ pati miah chhuahnohpa ei ta, aly kawpa ta dôkhohpa a châ.
Puhpa T. Seido, EM i/c Sports, etc., chhaota pasyunabie pha kawpa reina a hnei hra.
Laki khih liata programme ahmâna liata Puhpa HC. Rabei, Laki-1 VCP ta chhihtha ta, Machâ T. Tluatha, Awnano Hyutuhpa ta Abeipa lâta pavaosana thlahchhâna a hnei. Puhpa S. Hrohlu, Vice President, Laki VCP- 11 ta welcome speech reina hnei ta, Puhpa HK. Beihô, Laki VC 11 VCP ta vote of thanks reina a hnei.
Laihsa Pricilla Nôtlia, Laihsa J. Vâhneisô, Laihsa Jennifer Khithie nata Laihsa B. Sarojini zy ta pahnie kawpa ta hlasapa ta zawpi ama palôhpahawh.
Party lâ tawhta Pihnô A. Nelly, MDC & Vice President, BJP Siaha, Puhpa C. Lawbei, Ex-MDC, Vice President, BJP Siaha, Puhpa LC. Apaw, Ex-MDC, General Secretary, BJP Siaha, Puhpa H. Beitlôlai, Secretary, BJP Siaha, Puhpa NT. Thatlua, Ex-MDC, President Minority Morcha, BJP Siaha, Pihnô S. Nathlua, President, Mahila Morcha, Pihnô K. Juliet, General Secretary, Mahila Morcha, Puhpa K. Rosiama, Vice President, ST Morcha, Laihsa Caroline Chhaihlô, Vice President, Yuva Morcha, Puhpa L. Lepai, District Executive Member, Puhpa B. Beitua, District Executive Member nata Puhpa J. Rosangliana, Active Member zy ta CEM ama zi thei hra.
CEM he Official lâ tawhta Puhpa S. Pawkhu, CEO, MADC, Puhpa Pawsa Lava, Asst. I&PO, Laihsa Gospel Khithie, PA to Deputy Chief Whip, Puhpa Lalnunfela NK, PSO to CEM nata Puhpa Martin L. Hlychho, Cameraman zy ta ama zi thei hra.
ISSUED BY:
Information & Publicity Department
Mara Autonomous District Council
Siaha.
